Korinth Khuaa Mite Hnêna Lehkhathawn Pahnihna 6:1-18
6 Pathian hnathawhpuitute kan nih angin, Pathian khawngaihna nasa tak chu pawm tûr leh ṭha taka hmang tûrin kan ngên a che u.
2 Ani chuan: “Duhsakna lantîr hunah ka ngaithla che u a, chhandamna nîah ka ṭanpui che u,” tiin a sawi si a. Ngai teh u! Tûn hi a bîk taka duhsakna lantîr hun a ni. Ngai teh u! Tûn hi chhandamna nî chu a ni.
3 Kan rawngbâwlna hi sawichhiat a nih lohna tûrin, tlûk phahna tûr rêng rêng kan siam lo.
4 Kawng engkimah Pathian rawngbâwltute kan nihzia kan lantîr zâwk ṭhîn: fiahna hrang hrang te, hrehawm te, hun harsa te leh, buainate kan tuar chhuak a,
5 vuak kan ni a, tân ina khung kan ni a, mipui thinrim kan hmachhawn a, kan thawkrim a, zân mut loh châng kan nei a, ei tûr neih loh châng kan nei a;
6 thianghlim takin kan nung a, hriatna nêna inmilin kan nung a, kan dawhthei a, kan ngilnei a, thlarau thianghlim kan inkaihhruaitîr a, kan hmangaihna chu vervêkna tel lo a ni a,
7 thu dik kan sawi a, Pathian thiltihtheihna kan rinchhan a, kan kut ding lam* leh vei lamah* felna râlthuamte kan keng a,
8 chawimawi leh tihmualpho kan ni a, sawichhiat leh fak kan ni. Bumtute anga ngaih kan ni chung pawhin thu dik kan sawi a,
9 mite hriat ni lo mah ila Pathianin min hria a, thi lek lekin awm mah ila kan nung a, hremna tuar mah ila tihhlumin kan awm lo.
10 Mite’n lungngai emaw min ti a; nimahsela, kan lâwm fo ṭhîn, rethei mah ila mi tam tak hnênah thil ṭha tam tak kan pe a, eng mah nei lo mah ila thil zawng zawng kan nei si ṭhîn.
11 Korinth mite u, in hnêna thu sawi tûrin kan kâ kan âng a,* kan thinlung pawh zau takin kan hawng a ni.
12 Kan hmangaihna che u hian tâwp chin a nei lo va, nangni min hmangaihna erawh chuan tâwp chin a nei si.
13 Chuvângin, ka fate angin ka hrilh a che u, nangni pawhin in thinlung zau takin hawng ve rawh u.
14 Ring lotute nên rual lo takin nghâwngkawl bât* suh u. Felna leh suahsualnain inzawmna eng nge an neih? A nih loh leh, thim leh êng pawhin inanna eng nge an neih?
15 Chu bâkah, Krista leh Beliala’n inremna an nei thei dâwn em ni? A nih loh leh, ringtu leh ring lotuin inṭâwm eng nge an neih?
16 Pathian biak in leh milemte’n inremna eng nge an neih? Pathian nung biak in kan ni si a. Pathianin: “An zîngah ka awm ang a, an zîngah ka lêng bawk ang; an Pathian ka ni ang a, anni pawh ka mite an ni ang,” tia a sawi ang khân.
17 “‘Chuvângin, an zîng aṭangin chhuak ula, intihrang rawh u,’ ‘thil bawlhhlawhte khawih tawh suh u,’ Jehova’n a ti”; “‘tichuan, ka lâwm ang che u.’”
18 “‘Tin, in tân pa ka lo ni ang a, nangni pawh ka tân fapate leh fanute in lo ni ang,’ Engkimtithei Jehova’n a ti.”
Footnote-te
^ Beih lêt nân a ni mai thei.
^ Invênhim nân a ni mai thei.
^ A nih loh leh, “tlang takin thu kan sawi a.”
^ A nih loh leh, “zawmin.”
