Korinth Khuaa Mite Hnêna Lehkhathawn Pahnihna 8:1-24
8 Tin, unaute u, Makedonia rama kohhrante hnêna Pathian khawngaihna nasa tak pêk a nih chungchâng kha hriattîr che u kan duh a ni.
2 Hrehawmna hnuaia fiahna nasa tak an tawh chhûng khân, an rethei êm êm chung pawhin lâwmna nasa tak nên an thilphalzia an târ lang a ni.
3 An theih ang tâwk zêlin an pe a, an theih tâwk aia nasa hial pawhin an pe tih ka hriatpui bawk.
4 Phal taka thil pêk theihna chanvo hlu an neih theih nân leh, mi thianghlimte tâna chhawmdâwl rawngbâwlnaa an tel ve theihna tûrin, anmahni ngeiin hma la hmasain nasa takin min ngên a ni.
5 Chu chu kan beisei aia nasain an ti a, Pathian duh zâwng angin anmahni ngei Lalpa hnênah an inpe hmasa a, kan hnênah pawh an inpe a ni.
6 Chuvângin, Tita chu phûr taka in thilthlâwnpêk lâk khâwm hna in zînga a lo thawh ṭan tawh chu thawk zo tûrin kan fuih a ni.
7 Engkimah ṭha takin in ti a, rinna chak tak in nei a, thusawi theihna in nei a, hriatna nasa tak in nei a, in thiltih engkimah theih tâwp in chhuah a, kan hmangaih che u angin mi dangte in hmangaih hle a ni. Chutiang bawk chuan, phal takin pe chhunzawm zêl ang che u.
8 Hei hi in hnêna thu pe zâwngin ka sawi lo, mi dangte ṭhahnemngaihna in hriat theihna tûr leh in hmangaihna takzia fiah nâna sawi ka ni zâwk.
9 Kan Lalpa Isua Krista khawngaihna nasa tak chu in hria e, a retheihna avânga in lo hausak theihna tûrin hausa mah se, in tân a lo rethei ta zâwk a ni.
10 Ka ngaih dân ka han sawi ang e: Hei hi in ṭhatna tûr a ni, nikumah khân hma in la hmasa chauh pawh ni lovin, chutianga tih chu in duhzia in lo lantîr tawh a.
11 Chutichuan, in neih tâwk ang zêla in inpeihna a famkim theihna tûrin, in lo ṭan tawh chu thawk zo rawh u.
12 Inpeihna a awm hmasak phawt chuan miin a neih loh pui ni lovin, a neih ang zêla a pêk chu pawm tlâk a ni.
13 Nangni phurrit phurhtîr che u a, mi dang tihzângkhai ka duh tihna a ni lo;
14 inchawhrualna a awm theih nân leh in neih chuang liam chu tûnah hian an mamawh phuhrûkna a lo ni theihna tûrin; tin, an neih chuang liam pawh in tlâkchham phuhrûkna a lo ni thei ang a; chutichuan, inchawhrualna a awm thei ang.
15 “A nei tam chuan a chuang a liamin a nei lo va, a nei tlêm pawhin a tlachham hek lo,” tih ziak ang khân.
16 Keimahni ang bawka Tita’n a ngaihsak che u avângin Pathian hnênah lâwmthu awm rawh se.
17 Kan thu hrilhte chu a chhâng lêt a, ti tûra kan hrilhte tih a duh tak zet bawk a ni. Chuvângin, ama duh thu ngeiin in hnênah a lo kal ang.
18 A rualin chanchin ṭha avânga kohhran zawng zawnga fak hlawh unaupa pakhat kan rawn tîr bawk a ni.
19 Chu chauh pawh a ni lo va, ani hi kohhran zawng zawngin kan ruala kal tûra an ruat a ni a; chutiang chuan, thawhlâwm semna kawngah min ṭanpui ang. Chu ṭanpuina chu Lalpa chawimawina tûrin kan sem ang a; chutichuan, mi dangte ṭanpui kan inpeihzia kan lantîr ang.
20 Chutiang chuan, he thawhlâwm tam tham tak kan enkawl dânah hian mite sawisêlna kan pumpelh ang.
21 ‘Jehova mit hmuhah chauh ni lovin, mihringte mit hmuhah pawh engkim rinawm taka tih’ kan tum si a.
22 Chu bâkah, an rual hian kan unaupa kan rawn tîr a, ani chu vawi tam tak kan fiah tawh, thil tam taka taima êm êm a ni a. Nangmahni a rin êm che u avângin tûnah hian a taima lehzual a ni.
23 Tin, tu pawhin Tita chungchângah rinhlelhna a nei a nih chuan ringhlel suh se, ani hi ka ṭhian leh in ṭhatna tûra ka hnathawhpui a ni si a. Tin, kan unaupate chungchângah tu pawhin rinhlelhna a nei a nih chuan ringhlel suh se, anni chu kohhranho tirhkohte leh Krista ropuina an ni si a.
24 Chuvâng chuan, anmahni in hmangaihzia târ lang ula, kohhranho hnênah kan chhuan nachhan che u lantîr rawh u.
