Korinth Khuaa Mite Hnêna Lehkhathawn Pahnihna 9:1-15
9 Mi thianghlimte tâna rawngbâwlna chungchâng chu in hnêna ka ziah a ṭûl lo ve.
2 In inhuamzia ka hre si a, “Akaia mite chu kum khat chuang ṭanpui tûrin an inpeih tawh,” tiin Makedonia mite hnênah chhuang takin ka sawi a, in ṭhahnemngaihna hian an zînga a tam zâwk chu a chawk tho a ni.
3 Nimahsela, hemi chungchânga kan chhuanna che u hi eng mah lo mai a nih loh nân leh, ka sawi ang chiaha in lo inpeih tak zet theih nân, in hnênah unaupate ka rawn tîr dâwn a ni.
4 Chuti lo chuan, Makedonia mite ka rualin lo kal ta sela, inpeih lova an hmuh che u chuan in chunga rinna kan nghah avâng hian, in tân leh kan tân a zahthlâk hle dâwn si a.
5 Chuvângin, a hun a thlen hmaa nangmahni fuih tûra unaupate lo tirh a ṭûlin ka hria a ni; tichuan, kan lo thlen hunah he thilthlâwnpêk hi peih sain a lo awm thei ang a, chu chuan he thilthlâwnpêk hi kan nawr luih vâng che u ni lovin, phal taka in pêk a ni tih a târ lang ang.
6 Nimahsela, hei hi hre reng rawh u, tlêm tê tuhtu chuan tlêm tê a seng ang a, tam tak tuhtu erawh chuan tam tak a seng ang.
7 Mi tinin an thinlunga an tum sa ang zêlin pe rawh se, ui* chungin emaw, pêk lo theih loh anga ngaiin emaw pe suh se, Pathian chuan hlim taka petu chu a hmangaih si a.
8 Chu bâkah, eng mah in tlâkchham ngai loh nân leh, hna ṭha tinrêng thawk tûra in mamawh zawng zawng tam taka in neih theih nân, Pathian chuan in chungah a khawngaihna nasa tak lantîr tûrin thiltihtheihna a nei a ni.
9 (“Phal takin* a sem darh a, retheite hnênah a pe a. A felna chu kumkhuain a awm reng,” tih ziak ang khân.
10 Chi thehtu hnêna chî tam tak petu leh ei atâna chhang tam tak petu chuan, in theh atân chî pe che uin a tipung ang a, in felna rah a tipung bawk ang.)
11 Tam taka in pêk theihna tûrin Pathianin mal a sâwm che u a ni. Chuvângin, mite hnêna kan sem tûr in thilthlâwnpêk avâng hian, mite’n Pathian hnênah lâwmthu an sawi ang.
12 Vântlâng rawngbâwlna hi mi thianghlim tlachhama awmte mamawh phuhrûk nân chauh a ni lo, Pathian hnêna lâwmthu sawina tam tak a awm theih nân a ni bawk.
13 He chhawmdâwl rawngbâwlna hian eng ang mi nge in nih a târ lang a, Krista chungchâng chanchin ṭha in puan chhuah nêna inmila thil in tih avâng leh, mi thianghlimte leh mi zawng zawng tâna phal taka thawhlâwmte in thawh avângin, mite’n Pathian an chawimawi ang.
14 In chunga Pathian khawngaihna nasa tak a awm avângin, in tân ṭawngṭaia dîlna thlenin an ngainat thu che u an sawi a ni.
15 A thilthlâwnpêk sawi fiah theih rual loh avângin, Pathian hnênah lâwmthu awm rawh se.
