Johana Ziak 13:1-38
13 Tin, Isua’n khawvêl chhuahsan a, Pa hnêna a kal hun a thleng tawh dâwn tih Kalhlên Kût hmain a hria a, khawvêla awm a hmangaih, a tate chu a tâwp thlengin a hmangaih reng a ni.
2 Zanriah an ei laiin, Diabola chuan Simona fapa Juda Iskariota thinlungah chuan, Isua phatsan duhna a lo neihtîr tawh a.
3 Tin, Isua chuan Pain a kutah thil engkim a pe tawh tih leh Pathian hnên aṭanga lo kal a ni a, Pathian hnênah a kîr leh dâwn tih hre reng chungin,
4 zanriah a ei lai chu a tho va, a kawrfual a phelh a, a sîrah a dah a. Inhrûkna puan lain, a kâwngah a hrêng a.
5 Chumi hnuah chawhtawlhah tui a dah a, a zirtîrte kê chu silin, inhrûkna puan a hrên chuan a hru hul zêl a.
6 Tichuan, Simon Petera hnên a lo thleng a. Petera chuan a hnênah: “Lalpa, ka kê i sil dâwn a maw?” a ti a.
7 Isua’n a hnênah: “Ka thiltih hi tûnah i hre thiam lo a ni; nimahsela, nakinah i la hre thiam ang,” tiin a chhâng a.
8 Petera chuan a hnênah: “Ka kê i sil hauh lo vang,” a ti a. Isua’n: “Ka silsak loh che chuan ka hnênah chan i nei lo vang,” tiin a chhâng a.
9 Simon Petera chuan a hnênah: “A nih chuan Lalpa, ka kê chauh ni lovin, ka kut leh ka lû pawh le,” a ti a.
10 Isua’n a hnênah: “Tu pawh inbual tawh chu a kê bâk sil a ngai lo, a pumin a fai a ni. Nangni pawh in fai e, in vai erawh chuan a ni lo,” a ti a.
11 Amah phatsantu tûr chu a hre si a. Chuvângin a ni: “In vai chuan in fai lo,” tia a sawi ni.
12 Tin, an kê a sil zawh chuan a kawrfual dah kha a ha leh a, dawhkân kîl lehin an hnênah: “In chunga ka thiltih hi a awmzia in hria em?
13 Nangni’n, ‘Zirtîrtu’ leh ‘Lalpa’ min ti ṭhîn, in ti dik e, ka ni rêng si a.
14 Chuvângin, kei Lalpa leh Zirtîrtu mahin in kê ka sil chuan, nangni pawh in kê in insilsak tûr a ni.
15 In chunga ka tih anga in tih vena tûrin entawn tûr ka siamsak che u a nih hi.
16 Tih tak meuhvin, tih tak meuhvin ka hrilh a che u, bâwih a pu aiin a ropui lo va, a tirha pawh a tîrtu aiin a ropui hek lo.
17 Chûng thilte chu in hre tawh a, in hriat anga in tih chuan in hlim ang.
18 In vaia chungchâng ka sawi lo; ka thlante chu ka hria. Nimahsela, hei hi: ‘Ka chhang eitu chu ka hmêlma a lo ni ta,’ tih Pathian Lehkha Thu kha a thlen famkim theihna tûr a ni.
19 Chu thil lo thleng tûr chu ka hrilh che u hi; chuvângin, ka chunga a lo thleng in hmuh hunah, he Pathian Lehkha Thu hian ka chungchâng a sawi tih in hria ang.
20 Tih tak meuhvin, tih tak meuhvin ka hrilh a che u, tu pawh ka mi tirh lâwm chu mi lâwm a ni a; tin, tu pawh mi lâwm chu mi Tîrtu lâwm a ni,” a ti a.
21 Chûng thute a sawi zawh chuan, Isua chu a rilruin a mangang ta êm êm a: “Tih tak meuhvin, tih tak meuhvin ka hrilh a che u, in zînga pakhatin mi phatsan ang,” tiin tlang takin a sawi a.
22 Tu chungchâng ber nge a sawi tih hre lovin zirtîrte chu an inen hlawm a.
23 Zirtîrte zînga pakhat Isua’n a hmangaiha chuan, Isua hnaih takah* dawhkân a kîl a.
24 Chuvângin, Simon Petera chuan zaizirin chu mi hnênah chuan: “Min hrilh teh, tu chungchâng nge a sawi?” tiin a zâwt a.
25 Tin, chu mi chuan Isua âwm nghêngin a hnênah: “Lalpa, chu chu tu nge ni?” a ti a.
26 Isua’n: “Chhang them ka chiah a, ka pêk tûra chu a ni,” a ti a. Tichuan, chhang a chiah hnuah, Simon Iskariota fapa Juda hnênah a pe a.
27 Juda chuan chhang them a lâk hnuah, a kawchhûngah chuan Setana a lût a. Tin, Isua’n a hnênah: “I tih tûr chu ti thuai rawh,” a ti a.
28 Nimahsela, dawhkân kîltute zîngah tu mahin chu thu a hrilh chhan chu an hre lo.
29 Ṭhenkhatin Juda chu pawisa bâwm kawltu a nih avângin Isua’n, “Kût atâna kan mamawh lei rawh,” a tihna emaw, mi retheite hnêna thil pe tûra a hrilhna emaw an ti a.
30 Tichuan, chhang them a lâk hnuah a chhuak ta nghâl a. Chu chu zân a ni.
31 Tin, a kal chhuah hnu chuan Isua’n: “Mihring Fapa hi chawimawiin a awm ta, Pathian pawh amah avângin chawimawiin a awm a ni.
32 Pathian ngeiin ani chu a chawimawi ang a, a chawimawi nghâl ang.
33 Ka ṭhiante u,* in hnênah rei lo tê ka la awm ang. Min la zawng ang a; nimahsela, Judate hnêna ka hrilh ang chiahin, ‘Ka kalnaah chuan in lo kal thei lo vang,’ tih nangni pawh ka hrilh che u a nih hi.
34 Thupêk thar ka pe a che u, inhmangaih tawn ula; keiin ka hmangaih che u ang bawk hian, nangni pawh inhmangaih tawn rawh u.
35 In inhmangaih tawn chuan, mi zawng zawngin ka zirtîrte in ni tih an hria ang,” a ti a.
36 Tin, Simon Petera chuan a hnênah: “Lalpa, khawiah nge i kal dâwn?” a ti a. Isua chuan: “Ka kalnaah chuan min zui thei rih lo vang; nimahsela, nakinah min la zui ang,” a ti a.
37 Petera chuan a hnênah: “Lalpa, engvângin nge tûnah ka zui theih loh che? I tân chuan thih pawh ka inhuam asin,” a ti a.
38 Isua’n ani chu chhângin: “Ka tân thih i inhuam tak zet a maw? Tih tak meuhvin, tih tak meuhvin ka hrilh a che, vawi thum mi phat hma loh chu âr a khuang lo vang,” a ti a.
Footnote-te
^ A ngial a ngan chuan, “ângchhûngah.”
^ A ngial a ngan chuan, “naupang tête u.” Hei hi inkoh duatna ṭawngkam a ni.
