Johana Ziak 21:1-25
21 Chumi hnuah, Isua chu Tiberia Dîlah zirtîrte hnênah a inlâr leh a. Hetiang kawng hian a inlâr a ni.
2 Chuta awmte chu Simon Petera te, Thoma (Phîra tia koh) te, Galili rama Kana khuaa mi Nathanaela te, Zebedaia fapa te leh, a zirtîr dang pahnihte an ni.
3 Simon Petera chuan an hnênah: “Sangha man tûrin ka kal dâwn,” a ti a. Anni chuan a hnênah: “I rualin kan lo kal ve ang e,” an ti a. Tichuan, an kal chhuak a; nimahsela, chumi zân chuan eng mah an man lo.
4 Khua a lo vâr chuan Isua chu dîl kamah a ding a, zirtîrte erawh chuan Isua a ni tih an hre lo va.
5 Tin, Isua’n an hnênah: “Ṭhiante u, ei tûr eng emaw* in nei lo maw?” a ti a. Anni chuan: “Nei lo!” tiin an chhâng a.
6 Ani chuan an hnênah: “Lawng ding lamah khân lên dêng ula, sangha ṭhenkhat in man ang,” a ti a. Tichuan, an dêng a, sangha a tam êm avângin an hnûk chhuak zo lo va.
7 Tichuan, zirtîr Isua’n a hmangaiha khân Petera hnênah: “Lalpa a nih saw!” a ti a. Tin, Simon Petera’n Lalpa a ni tih a hriat chuan, a kawr a hâ a,* saruaka awm* a ni si a; tin, dîlah chuan a zuang thla ta a.
8 Nimahsela, zirtîr dangte chuan sanghaa khat lên hnûk chungin lawng tê chuan an rawn pan a, vau kam aṭanga feet 300 vêl* leka hlaa awm an ni si a.
9 Vau kam an thlen chuan meihawl inchhêm, a chunga sangha leh chhang inhem an hmu a.
10 Isua’n an hnênah: “Tûna in sangha man ṭhenkhat kha rawn la rawh u,” a ti a.
11 Tin, Simon Petera chu lawngah chuan a va chuang a, sangha lian tak tak 153 laia khat lên chu vaukamah chuan a hnûk chhuak a. Tam hle mah se, lên chu a ṭet lo.
12 Isua’n an hnênah: “Lo kal ula, tûkṭhuan* ei rawh u,” a ti a. Zirtîrte zînga tu mahin: “Tu nge i nih?” tiin an zâwt ngam lo. Lalpa a ni tih an hre si a.
13 Isua a lo kal a, chhang chu lain an hnênah a pe a; chutiang bawkin, sangha pawh chu a pe bawk a.
14 Chu chu, Isua thihna ata a thawhleh hnua a zirtîrte hnêna a inlâr vawi thumna a ni.
15 Tûkṭhuan* an ei zawh chuan, Isua’n Simon Petera hnênah: “Simon, Johana fapa, hêngte ai hian min hmangaih zâwk em?” a ti a. Ani chuan a hnênah: “Aw, Lalpa, ka ngaina che tih i hria e,” a ti a. Isua chuan a hnênah: “Ka berâm note châwm rawh,” a ti a.
16 A vawi hnihna atân a hnênah: “Simon, Johana fapa, min hmangaih em?” a ti leh a. Petera chuan: “Aw, Lalpa, ka ngaina che tih i hria e,” tiin a chhâng a. Isua’n a hnênah: “Ka berâm note enkawl rawh,” a ti a.
17 A vawi thumna atân a hnênah: “Simon, Johana fapa, min ngaina em?” a ti a. A vawi thumna atân: “Min ngaina em?” tia a zawh avângin Petera chu a lungngai ta hle a. Tichuan, a hnênah: “Lalpa, engkim i hria a; ka ngaina che tih i hria e,” a ti a. Isua’n a hnênah: “Ka berâm note châwm rawh.
18 Tih tak meuhvin, tih tak meuhvin ka hrilh a che, i naupan lai chuan nangmahin thawmhnaw i hâ a, i duhna apiangah i kal ṭhîn. Nimahsela, i upat hunah i kutte i phar ang a, mi dangin thawmhnaw an hâktîr ang che a, i duh lohna hmunah an hruai ang che,” a ti a.
19 Chu chu, engtianga thiin nge Petera’n Pathian a la chawimawi dâwn tih târ lan nâna sawi a ni. Isua’n chu thu a sawi zawh chuan Petera hnênah: “Min zui zêl rawh,” a ti a.
20 Petera chu a hawi a, zanriah an kîl laia Isua âwm nghêng a: “Lalpa, a phatsantu tûr che chu tu nge ni?” tia zâwttu zirtîr, Isua’n a hmangaiha khân a rawn zui a hmu a.
21 Tin, Petera’n ani chu a hmuhin Isua hnênah: “Lalpa, ani chungah hian eng nge thleng ang?” a ti a.
22 Isua’n a hnênah: “Ka lo kal thlenga ani hi awm reng tûra ka duh a nih chuan, i lo buaina tûr eng nge awm? Nang chuan min zui zêl rawh,” a ti a.
23 Tichuan, chu zirtîr chu thi lo tûr angin unaute zîngah thu a lo darh a. Nimahsela, Isua’n a hnênah, ‘A thi lo vang,’ a ti lo va: “Ka lo kal thlenga ani hi awm reng tûra ka duh a nih chuan, i lo buaina tûr eng nge awm?” tiin a sawi zâwk a ni.
24 Chu zirtîr chu hêng thute hriattîrtu leh ziaktu hi a ni a, a thu hriattîr chu a dik a ni tih kan hria.
25 Isua thiltih dang tam tak pawh a la awm a, chûngte chu kim chang taka ziah ni vek sela chuan, lehkha zialte chu khawvêlah hian a len ka ring lo.
Footnote-te
^ A nih loh leh, “sangha.”
^ A nih loh leh, “a veng a.”
^ A nih loh leh, “thawmhnaw ha mumal lo.”
^ Meter 90 vêl. A ngial a ngan chuan, “cubit 200 vêl.”
^ A nih loh leh, “zîng chaw.”
^ A nih loh leh, “zîng chaw.”
