Johana Ziak 4:1-54
4 Tin, Johana aiin Isua’n zirtîr a siam tam zâwkin, a baptis tam zâwk thu Pharisaite’n an hria tih Lalpa’n a lo hriat chuan—
2 Isua chuan a baptis lo va, a zirtîrte zâwkin an baptis a ni—
3 Judai ram chhuahsanin Galili ram lam a pan leh a.
4 Nimahsela, Samari ram a kal tlang a ngai a.
5 Tichuan, Samari rama khaw pakhat Sukar khua a lo thleng a, chu chu Jakoba’n a fapa Josefa hnêna ram a pêk bula awm a ni.
6 Chutah chuan Jakoba tuichhunchhuah* a awm a. Tin, Isua chu a kal hah avângin tuichhunchhuah bulah chuan a ṭhu a, chutih lai chu chhûn dâr sâwm pahnih vêl a ni.*
7 Samari hmeichhe pakhat tui chawi tûrin a lo kal a. Isua’n a hnênah: “In tûr mi pe rawh,” a ti a.
8 (A zirtîrte chu khaw chhûngah ei tûr leiin an kal si a.)
9 Chu Samari hmeichhia chuan a hnênah: “Nang Juda mi i ni a, kei lah Samari hmeichhia ka ni si a, engati nge ka hnênah in tûr mi dîl?” a ti a. (Juda mite’n Samari mite an be ngai si lo.)
10 Isua’n ani chu chhângin: “Pathian thilthlâwnpêk leh i hnêna, ‘In tûr mi pe rawh,’ tia sawitu hi hria ni la chuan a hnênah i dîl zâwk ang a, ani chuan tui nung a pe ang che,” a ti a.
11 Ani chuan a hnênah: “Ka pu, tui khai chhuahna tûr eng mah i nei si lo va, tuichhunchhuah lah a thûk si. Khawi aṭangin nge chu tui nung chu i neih?
12 He tuichhunchhuah min petu, min thlahtu Jakoba chuan a fapate leh a ran rualte nên he tuichhunchhuaha mi hi an in ṭhîn a; ka pu, ani aiin i ropui zâwk em ni?” a ti a.
13 Isua’n ani chu chhângin: “Tu pawh he tui in apiang chu a tuihâl leh ang.
14 Ka pêk tûr tui in apiang erawh chu a tuihâl leh tawh ngai lo vang. Tui ka pêk chu a kawchhûngah tui hna ang a lo ni ang a, chu chuan chatuana nunna a pe ang,” a ti a.
15 Hmeichhia chuan a hnênah: “Ka pu, chu tui chu min pe rawh, ka tui a hâl tawh loh nân leh tui chawi tûra he hmuna ka rawn kal a ngaih tawh loh nân,” a ti a.
16 Ani chuan a hnênah: “Kal la, i pasal va ko la, he hmunah hian lo kal ang che u,” a ti a.
17 Hmeichhia chuan: “Pasal ka nei hlei nêm,” tiin a chhâng a. Isua’n a hnênah: “‘Pasal ka nei hlei nêm,’ tia i sawi hi i tidik e.
18 Pasal panga i nei tawh a, tûna i chênpui hi i pasal a ni lo. Chuvângin, i sawi dik e,” a ti a.
19 Hmeichhia chuan a hnênah: “Ka pu, zâwlnei i nih ngei dâwn hi.
20 Kan pi leh pute’n he tlângah hian Pathian chibai an bûk ṭhîn a; nimahsela, nangni chuan Jerusalem chauh hi amah chibai bûkna hmun tûr a ni in ti a,” a ti a.
21 Isua’n a hnênah: “Hmeichhia, tih tak meuhvin ka hrilh a che, he tlângah kher lo pawh, Jerusalemah kher lo pawh Pa chibai in bûk hun a lo la thleng ang.
22 Nangni chuan in hriat loh chibai in bûk ṭhîn a; keini erawh chuan kan hriata chu chibai kan bûk ṭhîn, chhandamna chu Judate hnên aṭanga inṭan a nih avângin.
23 Nimahsela, a hun a thleng dâwn ta, tûnah pawh a thleng tawh mêk a ni. Pathian chibai bûktu dik takte’n thlarau leh thutakin Pa chibai an bûk ang, chutianga amah chibai bûktu tûr chu Pain a zawng si a.
24 Pathian chu Thlarau a ni a, amah chibai bûktute chuan thlarau leh thutakin chibai an bûk tûr a ni,” a ti a.
25 Hmeichhia chuan a hnênah: “Messia, Krista an tiha chu a lo kal dâwn tih ka hria. Ani chu a lo kal hunah, kan hnênah thil engkim a puang chhuak ang,” a ti a.
26 Isua’n a hnênah: “Keimah, a betu che hi amah chu ka ni,” a ti a.
27 Chutih lai chuan a zirtîrte chu an lo thleng a, hmeichhia a lo biak avâng chuan mak an ti hle a; nimahsela, tu man: “Eng nge i duh?” emaw, “Engvângin nge hmeichhia kha i biak?” emaw pawh an ti lo.
28 Tin, hmeichhia chuan tuibêl chu a hnutchhiah a, khuaah a va kal a, mite hnênah:
29 “Ka thiltih apiang min hrilh zêltu mi pakhat a awm a. Lo kal ula, en teh u. Krista a ni thei mai lo maw?” a ti a.
30 Tin, khua aṭang chuan chhuakin Isua hnênah an kal ta a.
31 Chutih lai chuan, zirtîrte chuan: “Rabbi, ei ta che,” tiin an ngên a.
32 Nimahsela, an hnênah: “In hriat loh chaw ei tûr ka nei,” a ti a.
33 Tichuan, zirtîrte chu: “Miin ei tûr an rawn kensak emaw ni le?” tiin an inzâwt hlawm a.
34 Isua’n an hnênah: “Mi tîrtu duh zâwng tih leh a hna thawh zawh hi ka chaw a ni.
35 ‘Buh sengna tûrin thla li a la awm,’ in ti ṭhîn a ni lâwm ni? Ka hrilh a che u, dâk ula, lote en rawh u, seng theih tûrin a êng tawh a ni.
36 A sengtuin hlawh a la tawh a, chatuana nung tûrin rah a seng khâwm mêk a ni, a tuhtu leh a sengtu an lâwm dun theih nân.
37 ‘Pakhatin a tuh a, pakhatin a seng ṭhîn,’ tih thu hi a dik e.
38 In thawhrim rah ni lo seng tûrin ka tirh che u hi, mi dangin rim takin an thawk a, nangni’n an thawhrim rah in seng a ni,” a ti a.
39 Hmeichhiain, “Ka thiltih zawng zawngte min hrilh,” tia a hriattîr avâng khân, chu khuaa Samari mi tam tak chuan Isua chu an ring ta a.
40 Tin, Samari mite a hnênah an lo kal a, an hnêna châm tûrin an ngên a; tichuan, ni hnih a châm ta a.
41 Mi dang tam tak pawhin a thusawite avâng chuan ani chu an ring ta a.
42 Tin, anni chuan hmeichhe hnênah chuan: “Tûnah chuan i thusawi avâng chauhva ring kan ni tawh lo, keimahni ngeiin a thusawite kan hre si a, ani hi khawvêl chhandamtu a ni ngei tih kan hre ta,” an ti a.
43 Tin, ni hnih hnuah chuan Galili lam panin a chhuak a.
44 Nimahsela, Isua ngeiin zâwlnei chu ama khaw lama chawimawia a awm ngai loh thu a lo sawi tawh a.
45 Tin, Galili a thlen chuan Jerusalema kût laia a thiltih zawng zawngte an hmuh avângin, Galili mite chuan an lo lâwm a, anni pawh kûtah chuan an kal ve si a.
46 Tichuan, tui uaina a chantîrna khua, Galili rama Kana khuaah khân a kal leh a, Kapernaum khuaah chuan lal upa pakhat fapa dam lo a awm a.
47 Judai ram aṭangin Galili ramah Isua a lo kal tih a hriat chuan lal upa chu Isua hnênah a kal a, a fapa chu thih ngama a dam loh avângin Kapernaum khuaa kal a, tihdamsak tûrin a ngên a.
48 Nimahsela, Isua’n a hnênah: “Nangni hian chhinchhiahnate leh thil makte in hmuh loh chuan in awih ngai lo vang,” a ti a.
49 Lal upa chuan a hnênah: “Lalpa, ka fapa a thih hmain lo chhuk hrâm rawh,” tiin a ngên a.
50 Isua’n a hnênah: “Kal tawh rawh le, i fapa chu a dam tawh e,” a ti a. A hnêna Isua thusawite chu a ring a, a kal ta a.
51 Tin, a kal chhuk lai mêkin a chhiahhlawhte chuan a fapa a dam leh tawh thu hrilh tûrin an lo hmuak a.
52 Ani chuan an hnênah a dam hun lai tak chu a zâwt a. Anni chuan a hnênah: “Nimin chawhnu dâr khat vêl* khân a khawsik a reh a ni,” tiin an chhâng a.
53 Naupang pa chuan chu chu Isua’n: “I fapa chu a dam tawh e,” tia a hrilh hun ngei kha a ni tih a hre ta a. Tichuan, amah leh a ina chêng zawng zawng chuan Isua an ring ta a.
54 Hei hi Judai ram aṭanga Galili rama a lêt leh hnua Isua thil mak* tih vawi hnihna a ni.
Footnote-te
^ A nih loh leh, “tui hna; tuikhur.”
^ A ngial a ngan chuan, “a dârkâr rukna vêl.” Chu chu ni chhuah aṭanga chhiar ṭan a ni.
^ A ngial a ngan chuan, “a dârkâr sarihna vêl.” Chu chu ni chhuah aṭanga chhiar ṭan a ni.
^ A ngial a ngan chuan, “chhinchhiahna.”
