Johana Ziak 9:1-41
9 Tin, Isua chuan a kal pahin pian tirh aṭanga mitdel pakhat a hmu a.
2 A zirtîrte chuan a hnênah: “Rabbi, mitdel saa a piang hi ama tihsual nge ni a, a nu leh a pa tihsual?” tiin an zâwt a.
3 Isua’n anni chu chhângin: “He pa hian a tisual lo va, a nu leh a pate pawhin an tisual hek lo. Hetianga a awm hi Pathian hnathawh a lan chhuah theihna tûr a ni.
4 Chhûn a nih lai hian mi Tîrtu hna kan thawk tûr a ni, tu man hna an thawh theih loh hun, zân a lo thleng dâwn si a.
5 Khawvêla ka awm chhûng hian khawvêl êng ka ni,” a ti a.
6 Chûng thute a sawi zawh chuan leiah chil a chhâk a, a chilin lei a tidiak a, chu chu a mitah a hnawih a.
7 A hnênah: “Kal la, Silom dîlah va sil rawh,” a ti a. (Silom tih chu, “Tirh,” tihna a ni.) Tichuan, a kal a, a va sil a, mit vârin a lo lêt leh a.
8 Tichuan, a vêngte leh a kutdawh lai hmu ṭhîntute chuan: “He pa hi ṭhua kutdawh ṭhîn kha a ni lo vem ni?” an ti a.
9 Ṭhenkhatin: “Amah ngei kha a nih hi,” an ti a. Mi dangte chuan: “Ni lo. Mahse, an inang khawp mai,” an ti a. Ani chuan: “Amah kha ka ni e,” a ti a.
10 Tin, anni chuan: “A nih chuan engtin nge i mit a lo vâr?” tiin an zâwt a.
11 Ani chuan: “Isua an tih khân lei a tidiak a, ka mitah hnawihin, ‘Silom dîlah va kal la, sil rawh,’ min ti a. Tichuan, ka kal a, ka va sil a, ka hmu thei ta a ni,” tiin a chhâng a.
12 Anni chuan a hnênah: “Chu pa chu khawiah nge a awm?” an ti a. Ani chuan: “Ka hre lo,” a ti a.
13 Anni chuan a hmaa mitdela kha Pharisaite hnênah an hruai a.
14 Isua’n lei tidiak a, a mit a tihvâr nî chu Sabbath Nî a lo ni kher kher a.
15 Tin, chumi ṭumah chuan Pharisaite pawhin a mit a lo vâr tâk dân chu an zâwt a. Ani chuan an hnênah: “Lei tidiakin ka mitah a hnawih a. Tichuan, ka sil a, ka lo hmu thei ta a ni,” a ti a.
16 Pharisai ṭhenkhat chuan: “Sabbath a serh loh avângin, he pa hi Pathian hnên aṭanga lo kal a ni lo,” an ti a. Mi dangte chuan: “Engtin nge mi sualin hetiang thil makte* hi a tih theih ang?” an ti a. Tichuan, an zîngah inṭhen hranna a lo awm ta a.
17 Tin, mitdel hnênah chuan: “I mit a tihvârsak che avângin ani chu engtin nge i ngaih?” an ti leh a. Chu pa chuan: “Ani chu zâwlnei a ni,” a ti a.
18 Nimahsela, Judate chuan mit lo vâr taa nu leh pate an koh hma chuan, ani chu mitdel a ni ṭhîn a, khua a lo hmu thei ta, tih chu an awih lo va.
19 Anni chuan: “Ani hi in fapa mitdel saa piang in tih kha a ni em? A nih chuan, engtin nge tûnah a lo hmuh theih tâk?” tiin an zâwt a.
20 A nu leh a pate chuan: “Hei hi kan fapa a ni tih kan hria a, mitdel sain a piang tih pawh kan hre bawk.
21 Nimahsela, tûna a lo hmuh theih tâk dân hi kan hre lo va, a mit tihvâr saktu pawh kan hre hek lo. Amah hi zâwt mai rawh u, puitling a ni alâwm, a chanchin chu aman sawi rawh se,” an ti a.
22 A nu leh a pate chuan Judate an hlauh avângin chûng thute chu an sawi a ni. Judate chuan tu pawh ani chu Krista anga pawmtu apiangte chu inkhâwmna in aṭanga hnawh chhuah tûr tia rem an lo tih tlân tawh avângin.
23 Chuvâng chuan a ni, a nu leh a pate’n: “Puitling a ni alâwm. Amah zâwt rawh u,” an tih ni.
24 Tichuan, a vawi hnihna atân mitdel chu an ko leh a, a hnênah: “Pathian chawimawi rawh, he mi hi mi sual a ni tih kan hria,” an ti a.
25 Ani chuan: “Mi sual a nih leh nih loh ka hre lo. Thil pakhat ka hria, ka mit a del ṭhîn a, tûnah erawh ka hmu thei ta,” tiin a chhâng a.
26 Tin, anni chuan a hnênah: “I chungah eng thil nge a tih? Engtin nge i mit a tihvâr?” an ti a.
27 Anni chu chhângin: “Ka hrilh tawh che u a, in hre duh lo a nih kha. Engvângin nge in hriat leh duh tâk? Nangni pawh a zirtîrte nih ve in duh ta em ni?” a ti a.
28 Chu veleh, anni chuan deusawh takin: “Nang hi kha pa zirtîr kha i ni a, keini erawh chu Mosia zirtîrte kan ni.
29 Pathianin Mosia a bia tih kan hria. He pa erawh hi chu khawi lama mi nge a nih kan hre lo ve,” an ti a.
30 Chu pa chuan anni chu chhângin: “Chu tak chu a ni, a makna chu! Khawi aṭanga lo kal nge a nih in hre lo va; mahse, ka mit a tihvâr miau si hi.
31 Pathianin mi sualte thusawi a ngaithla lo tih kan hria. Nimahsela, tu pawh Pathian ṭih a, a duh zâwng ti apiangte chu a ngaithla ṭhîn.
32 Hmân lai aṭang tawhin tu mahin mitdel saa piang mit an tihvârsak thu hriat a la ni ngai lo.
33 He mi hi Pathian lak aṭanga chhuak ni lo sela chuan, eng mah a ti thei lo vang,” a ti a.
34 Anni chuan a hnênah: “Nang, sual lailet dêra piang hian min zirtîr vei a ni maw?” an ti a. Tichuan, an hnawt chhuak ta a!
35 Isua’n an hnawt chhuak tih a lo hria a, ani chu zawng chhuakin, a hnênah: “Mihring Fapa i ring em?” a ti a.
36 Chu pa chuan: “Ka pu, ani chu ka rin theih nân, amah chu tu nge ni? Min hrilh rawh,” a ti a.
37 Isua’n a hnênah: “Amah chu i hmu tawh a, a be mêktu che hi a ni alâwm,” a ti a.
38 Chu pa chuan: “Lalpa, ka ring a che,” a ti a. Tichuan, kûnin Isua chu chibai a bûk ta a.
39 Tin, Isua chuan: “He khawvêl hi rorêlsak a nih theihna tûrin khawvêlah hian ka lo kal a ni. Hmu thei lote’n an hmuh theihna tûr leh hmu theite mit a lo del theihna tûrin,” a ti a.
40 A bula awm Pharisaite’n, chûng thute an hriat chuan a hnênah: “Keini pawh mitdelah min ngai em ni?” an ti a.
41 Isua chuan an hnênah: “Mitdel ni ula chuan sual in nei lo vang. Nimahsela, tûnah, ‘Kan hmu thei,’ in ti si a. Chuvângin, in sual chu a awm reng a ni,” a ti a.
Footnote-te
^ A ngial a ngan chuan, “chhinchhiahnate.”
