Luka Ziak 11:1-54
11 Tin, Isua chu khawi hmunah emaw a ṭawngṭai a, a ṭawngṭai zawh chuan a zirtîrte zînga pakhatin a hnênah: “Lalpa, Johana’n a zirtîrte ṭawngṭai dân a zirtîr ang khân min zirtîr ve rawh,” a ti a.
2 Tichuan, an hnênah: “In ṭawngṭai apiangin heti hian sawi ang che u: ‘Kan Pa, i hming tihthianghlim ni rawh se.* I Ram lo thleng rawh se.
3 Nî tin kan ei khawpin chaw min pe ang che.
4 Kan sualte min ngaidam ang che, keini pawhin kan lei batu* apiangte kan ngaidam ṭhîn si a; thlêmnaah min hruai lût suh ang che,’” a ti a.
5 Tin, ani chuan an hnênah: “In zînga pakhatin ṭhian nei ta ang ula, zan laiah a hnênah va kalin, ‘Ṭhiana, chhangpêr pathum mi pûktîr rawh,
6 ka ṭhian pakhat zinin mi rawn tlawh a, ei tûr chhawp tûr eng mah ka nei si lo,’ ti ang sela.
7 A ṭhian chuan in chhûng aṭangin: ‘Min tibuai suh. Kawngkhâr kalh a ni tawh a, ka fate pawh khumah ka bulah an mu tawh. Thovin eng mah ka pe thei lo che,’ tiin lo chhâng sela.
8 Ka hrilh a che u, a ṭhian a nih avângin thovin eng mah va pe lo mah sela, a dîl ngut ngut avângin a tho vang a, a mamawh apiang a pe ang.
9 Chuvângin, ka hrilh a che u, dîl zawm zêl rawh u; tichuan, pêk in ni ang; zawng zawm zêl rawh u; tichuan, in hmu ang; kik zawm zêl rawh u; tichuan, hawnsak in ni ang.
10 A dîl apiangte chuan an dawng ang a, a zawng apiangte chuan an hmu ang a, a kik apiangte chu hawnsak an ni ang.
11 A nih leh, nangni paho zînga tu emaw hi a fapain sangha dîl sela, tuin nge sangha aiah rûl pe ang che u?
12 A nih loh leh, artui dîl sela, tuin nge khawmualkaikuang pe ang che u?
13 Nangni mi sualte mahin in fate thil ṭha pêk nachâng in hriat chuan, in Pa vâna mi chuan a dîltute chu thlarau thianghlim a va pe nasa lehzual dâwn êm!” a ti a.
14 A hnuah, Isua’n ramhuai ṭawng thei lo a hnawt chhuak a. Ramhuaiin a chhuahsan hnuah, ṭawng thei lova chu a lo ṭawng ta a, mipui chuan mak an ti hle a.
15 Nimahsela, an zînga ṭhenkhat chuan: “Ramhuaite lal Beelzebula* avângin ramhuaite a hnawt chhuak a nih hi!” an ti a.
16 Tin, mi dangte chuan amah fiah nân, vân aṭanga chhinchhiahna hmuhtîr tûrin an phût a.
17 Ani chuan an ngaihtuahnate a lo hria a, an hnênah: “Eng ram pawh mahni indo apiang chu a tlu chhe ṭhîn a, khawi chhûngkua pawh mahni indo apiang chu a keh darh ṭhîn.
18 Chutiang bawkin, Setana pawh mahni a indo chuan, engtin nge a lalram a din chhuah ang? Nangni lahin Beelzebula avânga ramhuaite hnawt chhuak angin min sawi si a.
19 Beelzebula avânga ramhuaite hnawt chhuak ka nih chuan, in zirtîrte’n tu thiltihtheihnain nge ramhuaite an hnawh chhuah? Chuvângin, in zirtîrte ngeiin in thusawi dik lohzia hi an la hai lang ang.
20 Nimahsela, Pathian kutzungṭang avânga ramhuaite hnawt chhuak ka nih chuan, in hriat loh hlânin Pathian Ram a lo thleng tihna a ni ang.
21 Mi chakin râlthuam famkima a in a vên chuan a thil neihte chu a him reng ṭhîn.
22 Nimahsela, amah aia chak zâwkin a rawn beiha a hneh chuan, a rinchhan a râlthuam zawng zawng chu lâksakin, a thil lâksakte chu a sem darh ṭhîn.
23 Tu pawh ka lama ṭang lo chuan mi do a ni. Tu pawh min lâk khâwmpui lo chuan a tidarh a ni.
24 “Mi pakhat kawchhûng aṭanga lo chhuak ramhuai chu awmna tûr hmun dang zawngin thlalêrah a vâk kual a; nimahsela, pakhat mah a hmu lo va. Tichuan, ‘Ka chhuahsan tâka hnênah khân ka lêt leh mai teh ang,’ a ti a.
25 A va lêt leh chuan, in phiah fai leh cheimawi ang mai hian chu pa chu a va hmu a.
26 Tin, a kal chhuak a, amah aia sual zâwk ramhuai dang pasarih a rawn hruai a, chu pa kawchhûngah chuan an lût ta a; tichuan, chu pa dinhmun chu a hma aiin a chhe lehzual a ni,” a ti a.
27 Tin, chûng thute a sawi lai chuan, mipui zîng aṭangin hmeichhe pakhat a lo au chhuak a, a hnênah: “Nangmah hringtunu leh a hnutêa châwmtu che chu a va hlim dâwn êm!” a ti a.
28 Isua erawh chuan: “Ni lo, Pathian thu hriaa zâwmtute hi an hlim zâwk e!” a ti a.
29 Mipuite an rawn pun khâwm chuan, Isua chuan: “He chhuan hi chhuan sual tak an ni; chhinchhiahna an zawng a; nimahsela, Jona chhinchhiahna chauh lo chu pêk an ni lo vang.
30 Jona kha Ninevi khuaa mite tâna chhinchhiahna a ni ang khân, mihring Fapa pawh hi he chhuan tân hian chhinchhiahna a ni ang.
31 Seba lalnu pawh kha rorêlna nîah chuan he chhuan rual hian kaihthawh a ni ang a, Solomona finna ngaithla tûra hmun hla tak aṭanga a lo kal avângin, he chhuan sualzia hi a la târ lang ang. En teh u! Solomona aia ropui zâwk heta hi a awm e.
32 Ninevi khuaa mite kha rorêlna nîah chuan he chhuan rual hian kaihthawh an ni ang a, Jona thu hrilh pawma an inlamlêt avângin, he chhuan sualzia hi an la târ lang ang! En teh u! Jona aia ropui zâwk heta hi a awm e.
33 Miin khawnvâr a chhit hnuin hmun biru takah a dah ngai lo va, a khuh bo ngai hek lo; ina lo lût apiangin a êng an hmuh theihna tûrin a dahna hmunah an dah zâwk ṭhîn.
34 Taksa khâwnvâr chu mit a ni. I mit a fiah chuan i taksa pum a êng chhuak ang a, i mit a fiah loh erawh chuan i taksa pawh a thim ang.
35 Chutichuan, nangmahnia êng chu thim a nih loh nân fîmkhur rawh u.
36 Tin, i taksa pum chu thim lai awm lova a ên chuan, khâwnvâr êngin a chhun êng che ang hian i êng chhuak vek ang,” a ti a.
37 Chûng thu a sawi lai chuan Pharisai pakhatin chaw eiah a sâwm a. Tichuan, Isua chu lûtin dawhkân a kîl a.
38 Nimahsela, Pharisai chuan Isua’n zanriah a kîl hmain a kut a sil* lo tih a hmuh chuan mak a ti hle a.
39 Lalpa erawh chuan a hnênah: “Nangni Pharisaite hian no leh thlêng pâwn lam in silfai ṭhîn a, in chhûng lam erawh chu duhâmna leh suahsualnain a khat si.
40 Nangni mi âte u! A pâwn lam siamtuin a chhûng lam pawh a siam lo vem ni?
41 Chuvângin, mi retheite hnêna thilpêk in pêk hunah thinlung takin pe ang che u; tichuan, thil engkimah in lo thianghlim ang.
42 Nangni Pharisaite u, pudina te, pardi te, huan thlai tinrêngte sâwma pakhat in pe ṭhîn a; nimahsela, rorêlna dik leh Pathian hmangaihna in ngaihthah avângin in chunga thleng tûr chu a va râpthlâk dâwn êm! Sâwma pakhat chu in pe tûr a ni ngei mai; nimahsela, rorêlna dik leh Pathian hmangaihna ngaihthah phah nân in hmang tûr a ni lo.
43 Pharisaite u, inkhâwmna ina ṭhutna ṭha bera ṭhut leh bazâra chibai bûkte in duh ṭhin avângin in chunga thleng tûr chu a va râpthlâk dâwn êm!
44 Thlân* tih hriat mai theih loh,* hre lo va a chunga mite an kalna ṭhin ang chu in nih avângin, in chunga thleng tûr chu a va râpthlâk dâwn êm!” a ti a.
45 Dân hre tak pakhatin Isua chu chhângin: “Zirtîrtu, hêng thute i sawi hian keini pawh min sawichhe tel a ni,” a ti a.
46 Tin, ani chuan: “Nangni Dân hre takte u, in chunga thleng tûr chu a va râpthlâk dâwn êm! Mite chu phurrit tak takte in phurhtîr ṭhîn a; nimahsela, nangni erawh chuan chûng phurte chu in kutzungṭang pakhat pawhin in khawih duh si lo!
47 “In chunga thleng tûr chu a va râpthlâk dâwn êm! Zâwlneite thlân* in siam a, anni chu in pi leh pute thah an ni si!
48 In pi leh pute thiltih in hriatpui mai bâkah, in remtihpui a ni; anni’n zâwlneite an that a, nangni’n an thlânte in siam si a.
49 Chuvângin alâwm Pathian finna pawhin hetianga a lo sawi: ‘An hnênah zâwlneite leh tirhkohte ka tîr ang a, ṭhenkhat tihlumin ṭhenkhat an tiduhdah ang,
50 khawvêl awm ṭan tirh ata zâwlnei zawng zawngte thisen mawh chu he chhuan hian a phurh theihna tûrin,
51 Abela thisen aṭanga maichâm leh biak in inkâra an tihhlum tâk Zakaria thisen mawh thlengin,’ tiin. Ni e, ka hrilh a che u, an thisen chhuak avângin he chhuan hi hrem a la ni ang.
52 “Nangni Dân hre takte u, hriatna chabi in kal bopui avângin in chunga thleng tûr chu a va râpthlâk dâwn êm! Nangni in lût duh lo va, a lût tûrte lah in khap bawk si!” a ti a.
53 Tin, chuta ṭanga a chhuah chuan, dân hre mite leh Pharisaite chuan ani chu an mil lo ṭan ta hle a; tichuan, zawhna tam tak an zâwt ta sek a,
54 a thusawia amah an hêk theihna tûr zawngin an châng reng a.
Footnote-te
^ A nih loh leh, “zah ni rawh se; chawimawi ni rawh se.”
^ A nih loh leh, “kan chunga thil tisualtute.”
^ Setana sawina a ni.
^ Pharisaite leh Juda mi ṭhenkhat chuan an thurochhiah milin an kut an sil ṭhîn.
^ A nih loh leh, “hriatrengna thlân.”
^ A nih loh leh, “chhinchhiahna nei lo thlânte.”
^ A nih loh leh, “hriatrengna thlân.”
