Luka Ziak 3:1-38
3 Tiberia Kaisara kum sâwm panga a lal kum, Pontia Pilata Judai ram awptu a nih lai, Heroda* Galili ram rorêltu a nih lai, a unaupa Philipa Ituria leh Trakonitis rama rorêltu a nih lai, Lusania Abilene rama rorêltu a nih lai,
2 puithiam lalte zînga pakhat Anna leh puithiam lalber Kaiapha hun laiin thlalêra awm Zakaria fapa Johana hnênah Pathian thu a lo thleng a.
3 Tichuan, Johana chu Jordan Lui kam ram vêl zawng zawngah chuan a kal a, an simzia târ lan nâna baptisma chang tûrin mite hnênah thu a hril a.
4 Zâwlnei Isaia lehkhabua: “Thlalêra au râwl chuan: ‘Jehova kawng sial ula! A kawngte tingîl rawh u.
5 Ruam tin chhûn khah a ni ang a, tlâng tin leh mual tinte râwt hniam a ni ang; kawng kawite tihngîl a ni ang a, kawng bumbohte tihmâm a ni ang;
6 tin, tisa* zawng zawngin Pathian chhandamna an la hmu ang,’” tih ziak ang khân.
7 Tichuan, a hnêna baptisma chang tûra lo kal mipuite hnênah chuan: “Rûl tûr nei thlahte u, Pathian thinurna tlânsan tûrin tuin nge hrilh che u?
8 In sim tak zet tih in thiltihin lantîr rawh u. ‘Abrahama thlahte kan ni,’ tiin sawi suh u. Ka hrilh a che u, Pathianin hêng lungte aṭang hian Abrahama thlahte a din thei a ni.
9 Thing bul tinah hreipui dah a ni tawh. Tichuan, thing tin rah ṭha chhuah lo apiang chu kih a, meia paih tûr a ni ang,” tiin a sawi a.
10 Tin, mipuite chuan a hnênah: “A nih chuan, eng nge kan tih tâk ang?” tiin an zâwt a.
11 Ani chuan an hnênah: “Kawr pahnih nei chuan, a nei lo hnênah pakhat pe sela, ei tûr nei pawhin a nei lo hnênah sem ve rawh se,” a ti a.
12 Chhiahkhawntute hial pawh baptisma chang tûrin an lo kal a, anni chuan a hnênah: “Zirtîrtu, kan tih tûr chu eng nge ni?” an ti a.
13 Ani chuan an hnênah: “Chhiah bituk zât aia tam phût* suh u,” a ti a.
14 Tin, sipaite pawh a hnênah an lo kal a: “Kan tih tûr chu eng nge ni?” tiin an zâwt a. Ani chuan: “Tu mah hnehchhiah* suh ula, dik lo takin hêk hek suh u; tin, in hlawhah lungawi rawh u,” a ti a.
15 Tin, mite chuan Krista an beisei avângin an vaiin Johana chu: “Krista a ni thei mai ang em?” tiin an ngaihtuah a.
16 Johana chuan chhângin an vaia hnênah: “Kei chuan tuiin ka baptis che u a; nimahsela, kei aia ropui zâwk a lo kal ang. A pheikhawk hrui phelh tlâk pawh ka ni lo. Ani chuan thlarau thianghlim leh meiin a baptis ang che u.
17 Buh sî zah faina* kengin a hruih* chu a zâp fai hliau ang a, buhte chu a buh zêmah khungin, a sîte erawh chu mei mit thei lovah a hâl ral ang,” a ti a.
18 Tichuan, thu dang tam tak sawiin, mite hnênah chanchin ṭha a hril zawm zêl a.
19 Nimahsela, Johana chuan Galili rama rorêltu Heroda chu a unaupa nupui Herodi nupuia a neih avâng leh a thil sual tih zawng zawng avângin a zilh a.
20 Chuvângin, Heroda chuan thil sual dang a ti leh a, Johana chu tân inah a khung ta a ni.
21 Mite chuan baptisma an chang a, Isua pawhin a chang ve a. A ṭawngṭai laiin vân a lo inhawng a,
22 thlarau thianghlim chu ṭhuro pian hmang ang pu-a rawn chhukin a chungah a fu a; tin, vân aṭangin: “Hei hi ka Fapa duh tak, min tilâwm êm êmtu a ni,” tiin aw a lo chhuak a.
23 Isua’n a rawngbâwlna a ṭan lai chuan kum 30 mi vêl a ni a, mi ngaihah chuan, ani chuJosefa fapa a ni,Josefa chu Helia fapa a ni a,
24 Helia chu Matthata fapa a ni a,Matthata chu Levia fapa a ni a,Levia chu Melkia fapa a ni a,Melkia chu Janna fapa a ni a,Janna chu Josefa fapa a ni a,
25 Josefa chu Mattathia fapa a ni a,Mattathia chu Amosa fapa a ni a,Amosa chu Nahuma fapa a ni a,Nahuma chu Eslia fapa a ni a,Eslia chu Naggaia fapa a ni a,
26 Naggaia chu Maatha fapa a ni a,Maatha chu Mattathia fapa a ni a,Mattathia chu Semeia fapa a ni a,Semeia chu Joseka fapa a ni a,Joseka chu Joda fapa a ni a,
27 Joda chu Joana fapa a ni a,Joana chu Resa fapa a ni a,Resa chu Zerubabela fapa a ni a,Zerubabela chu Sealtiela fapa a ni a,Sealtiela chu Neria fapa a ni a,
28 Neria chu Melkia fapa a ni a,Melkia chu Addia fapa a ni a,Addia chu Kosama fapa a ni a,Kosama chu Elmadama fapa a ni a,Elmadama chu Era fapa a ni a,
29 Era chu Isua fapa a ni a,Isua chu Eliezara fapa a ni a,Eliezara chu Jorima fapa a ni a,Jorima chu Matthata fapa a ni a,Matthata chu Levia fapa a ni a,
30 Levia chu Sumeona fapa a ni a,Sumeona chu Juda fapa a ni a,Juda chu Josefa fapa a ni a,Josefa chu Jonama fapa a ni a,Jonama chu Eliakima fapa a ni a,
31 Eliakima chu Melea fapa a ni a,Melea chu Menna fapa a ni a,Menna chu Mattatha fapa a ni a,Mattatha chu Nathana fapa a ni a,Nathana chu Davida fapa a ni a,
32 Davida chu Jesaia fapa a ni a,Jesaia chu Obeda fapa a ni a,Obeda chu Boaza fapa a ni a,Boaza chu Salmona fapa a ni a,Salmona chu Nasona fapa a ni a,
33 Nasona chu Aminadaba fapa a ni a,Aminadaba chu Arnia fapa a ni a,Arnia chu Hezrona fapa a ni a,Hezrona chu Pereza fapa a ni a,Pereza chu Juda fapa a ni a,
34 Juda chu Jakoba fapa a ni a,Jakoba chu Isaaka fapa a ni a,Isaaka chu Abrahama fapa a ni a,Abrahama chu Tera fapa a ni a,Tera chu Nahora fapa a ni a,
35 Nahora chu Seruga fapa a ni a,Seruga chu Reuva fapa a ni a,Reuva chu Pelega fapa a ni a,Pelega chu Ebera fapa a ni a,Ebera chu Sela fapa a ni a,
36 Sela chu Kainana fapa a ni a,Kainana chu Arpaksada fapa a ni a,Arpaksada chu Sema fapa a ni a,Sema chu Nova fapa a ni a,Nova chu Lameka fapa a ni a,
37 Lameka chu Methusela fapa a ni a,Methusela chu Enoka fapa a ni a,Enoka chu Jareda fapa a ni a,Jareda chu Mahalalela fapa a ni a,Mahalalela chu Kainana fapa a ni a,
38 Kainana chu Enosa fapa a ni a,Enosa chu Setha fapa a ni a,Setha chu Adama fapa a ni a,Adama chu Pathian fapa a ni.
Footnote-te
^ Chu chu, Herod Antipa a ni. Thu Har Hrilhfiahna en rawh.
^ A nih loh leh, “mihring zawng zawng.”
^ A nih loh leh, “khawn.”
^ A nih loh leh, “tihluihnaa mi thil neih lâksak.”
^ A nih loh leh, “sisêp.”
^ Buh chîl tûr, a nih loh leh vuak tûr dah khâwmna.
