Luka Ziak 4:1-44
4 Tichuan, Isua chu thlarau thianghlimin a khat a, Jordan Lui aṭangin a lêt leh a, thlalêrah thlarauva hruaiin a awm a.
2 Chutah chuan ni 40 chhûng a awm a. Chûng hun chhûng chuan eng mah a ei loh avângin, a tâwpah a ril a lo ṭâm ta a; tin, Diabola’n ani chu a thlêm a.
3 A hnênah: “Pathian fapa i nih chuan, he lung hi chawa chang tûrin hrilh rawh,” a ti a.
4 Nimahsela, Isua’n: “‘Mihring hi chaw chauhvin a nung lo vang,’ tih ziak a ni,” tiin a chhâng a.
5 Tin, a hruai chho va, rei lo te chhûngin khawvêl ram zawng zawng a entîr a.
6 Diabola chuan a hnênah: “Hêng zawng zawng chunga thuneihna leh ropuina hi ka pe ang che, ka hnênah pêk a ni tawh si a, ka duh apiang hnênah ka pe bawk ṭhîn.
7 Chuvângin, vawi khat chauh pawh bawkkhupa chibai min bûk chuan, hêng zawng zawng hi i ta a ni vek ang,” a ti a.
8 Isua’n a hnênah: “‘I Pathian Jehova chauh chibai i bûk tûr a ni a, ama rawng chauh i bâwl tûr a ni,’ tih ziak a ni,” tiin a chhâng a.
9 Tin, Jerusalemah a hruai a, biak ina hmun sâng lai berah a dintîr a. A hnênah: “Pathian fapa i nih chuan heta ṭang hian zuang thla rawh.
10 ‘Nangmah vênghim tûrin a vântirhkohte thu a pe ang a,
11 lung i chhuih loh nân an kutin an dâwm ang che,’ tih ziak a ni si a,” a ti a.
12 Isua erawh chuan: “‘I Pathian Jehova i fiah tûr a ni lo,’ tih a ni ve bawk e,” tiin a chhâng a.
13 Tin, Diabola’n kawng tinrênga a thlêm zawh chuan, hun remchâng dang nghâkin a kalsan ta rih a.
14 Tin, Isua chu thlarau thiltihtheihnain Galili ramah a lêt leh a. Chumi ram vêl zawng zawngah chuan a chungchânga thu ṭha tak tak an sawite chu a thang chhuak ta a.
15 Chu bâkah, an inkhâwmna inahte a zirtîr a, ani chu mi zawng zawngin an fak a.
16 Tichuan, a seilenna khua Nazaret-ah a kal a. Sabbath nîa a tih ṭhin dânin inkhâwmna inah a lût a, Pathian Lehkha Thu chhiar tûrin a ding a.
17 Tin, tu emawin zâwlnei Isaia lehkha zial chu a hnênah a pe a. Lehkha zial chu a phelh a, he thuziak hi a hmu a:
18 “Retheite hnêna chanchin ṭha hril tûra hriak mi thih avângin Jehova thlarau chu ka chungah a awm a, ani chuan salte hnêna chhuah zalen an nih tûr thu hrilh tûr te, mitdel hnêna mit vâr lehna thu sawi tûr te, hnehchhiaha awmte chhuahtîr tûr te leh,
19 tûn hi Jehova’n mite chunga duhsakna a lantîr hun a nih thu puang tûrtein min tîr a ni,” tih hi.
20 Tichuan, lehkha zial chu a zial ṭha a, amah rawn petu chu pe lêt lehin a ṭhu a; tin, inkhâwmna ina awm zawng zawng chuan amah chu an en ta ṭhup a.
21 Tichuan, an hnênah: “Vawiinah hian Pathian thu ka chhiar tâk kha a thleng famkim ta,” a ti a.
22 Tin, an vaiin ani chu an fak a. Khawngaihna thu a sawite chu mak an ti hle a. Tichuan: “He mi hi Josefa fapa a ni lâwm ni?” an ti a.
23 Chu veleh an hnênah: “He tehkhin thu, ‘Doctor, nangmah intidam rawh. Kapernaum khuaa thil tam tak i tihte kha kan lo hria a, i seilenna khuaah pawh hian ti ve rawh,’ tih hi ka chungchâng sawi nân in la hmang ngei ang,” a ti a.
24 Tin, ani chuan: “Tih tak meuhvin ka hrilh a che u, zâwlnei tu mah an seilenna khuaa lawm hlawh an awm ngai lo.
25 Thu dik ka hrilh a che u: Elija hun laia kum thum leh thla ruk ruah a sûr loh va, ram puma ṭâm nasa tak a tlâk lai khân, Israel ramah hmeithai tam tak an awm a.
26 Nimahsela, Elija kha chûng hmeichhiate zînga tu hnênah mah tirh a ni lo va. Sidon rama Zarephath khuaa hmeithai hnênah chauh tirh a ni.
27 Chu bâkah, zâwlnei Elisa hun lai khân Israel ramah phâr tam tak an awm a. Nimahsela, Suria mi Naamana chauh lo chu tu mah tihthianghlim* an ni lo,” a ti a.
28 Tichuan, a thusawi hretu inkhâwmna ina awm zawng zawngte chu an thinrim ta hle a.
29 Tin, an tho va, hmanhmawh takin Isua chu khawpui pâwnah an hruai chhuak a, khâma nam thlâk tumin an khaw innghahna khâm kovah chuan an hruai a.
30 Nimahsela, mipui chu a tâwn tlang a, a kal ta zêl a.
31 Tin, Galili rama Kapernaum khuaah a chhuk thla a, Sabbath Nîah mite chu a zirtîr a.
32 Thunei taka thu a sawi avângin a zirtîr dân chu mak an ti hle a.
33 Tin, inkhâwmna inah chuan ramhuaiin a man mi pakhat a awm a, ani chuan ring taka auvin:
34 “Nazaret Isu, nang nên hian eng inzawmna nge kan neih? Min tiboral tûrin i lo kal em ni? Pathian Mi Thianghlima i ni tih chiang takin ka hria e,” a ti a.
35 Nimahsela, Isua’n a hau va: “Ngawi la, a kawchhûng aṭang khân lo chhuak rawh,” a ti a. Tichuan, mite hmuh laia a tihtlûk hnuah, amah tina lovin ramhuai chu a kawchhûng aṭang chuan a lo chhuak ta a.
36 Tin, an vaiin mak an ti hle a: “A thusawite chuan thil a va tithei êm! Thuneihna leh thiltihtheihna nên ramhuaite thu a pe a, an lo chhuah hi!” an ti hlawm a.
37 Tichuan, a chanchin chu a chhehvêl ram tinah a thang chhuak ta a.
38 Inkhâwmna in aṭanga a chhuah chuan Simona inah a lût a. Tin, Simona pizawn* chu nasa takin a khua a lo sik a, amah ṭanpui tûrin an ngên a.
39 Tichuan, a bulah a ding a, a khawsik chu a tidam a, Simona pizawn chu a tho ta nghâl a, anni chu ei tûr a buatsaihsak a.
40 Ni tlâk dâwnah chuan, natna chi hrang hrang neite chu a hnênah an rawn hruai a. An chungah a kut a nghat ṭheuh va, a tidam ta vek a.
41 Ramhuaite pawh: “Pathian Fapa i ni,” tia auvin, mi tam tak kawchhûng aṭangin an lo chhuak a. Nimahsela, anni chu a hau va, Krista a ni tih an hriat avângin an ṭawng a phal lo va.
42 Tichuan, khua a vâr veleh hmun fianrialah a kal a. Tin, mipuite chuan amah an zawng a, a awmnaah chuan an lo kal a. An hnêna awm reng tûrin an ngên a.
43 Nimahsela, ani chuan an hnênah: “Khaw dangahte pawh Pathian Ram chanchin ṭha ka hril tûr a ni, chumi avâng chuan tirh ka ni si a,” a ti a.
44 Tichuan, Judai rama inkhâwmna inahte thu a hril zêl a.
