Luka Ziak 9:1-62
-
Thu hril tûra Sâwm Pahnihte hnêna kaihhruaina pêk thu (1-6)
-
Isua avângin Heroda rilru a buai (7-9)
-
Isua’n mipui 5,000 a hrai (10-17)
-
Petera’n Krista nihna a sawi (18-20)
-
Isua’n a thih tûr thu a sawi lâwk (21, 22)
-
Zirtîr dik tak nihna (23-27)
-
Isua lan dân a danglam (28-36)
-
Ramhuai pai mipa naupang tihdam thu (37-43a)
-
Isua’n a thih tûr thu a sawi lâwk leh (43b-45)
-
Ropui zâwk nih duhin zirtîrte an inhnial (46-48)
-
Min dodâl lo chu kan lamah an ṭang (49, 50)
-
Samari khuain Isua a hnâwl (51-56)
-
Isua hnung zui dân (57-62)
9 Tichuan, Sâwm Pahnihte chu a ko khâwm a, ramhuai zawng zawngte chunga thiltihtheihna leh thuneihna a pe a, natnate tihdam theihna a pe bawk a.
2 Tin, anni chu Pathian Ram chanchin hril tûr leh dam lote tidam tûrin a tîr chhuak a.
3 An hnênah: “In zin chhuahnaah tiang te, iptê te, chhang te, pawisate* keng suh u, kawr pahnih* keng hek suh u.
4 Nimahsela, khawi inah pawh in luhna apiangah, chu khua in chhuahsan hma loh zawng chutah chuan awm reng ang che u.
5 Tin, khawi hmunah pawh mite’n an dawnsawn duh loh che u chuan, chu khua chu chhuahsan ula, vaukhân an ni tawh tih hriattîr nân in kephaha vaivut chu thing thla ang che u,” a ti a.
6 Tichuan, an kal chhuak a, chanchin ṭha hrilin khaw tin an fang a, hmun tinah dam lote an tidam bawk a.
7 Tin, Lal Heroda’n* thilthleng zawng zawng chu a lo hria a; mi ṭhenkhatin, “Johana kha thihna ata a lo tho leh a ni,” tia an sawi avângin a rilru a buai hle a.
8 Mi dangte erawh chuan, “Elija a rawn inlâr a ni,” an ti a, mi dang lehte chuan, “Hmân laia zâwlneite zînga pakhat a rawn tho leh a ni,” an ti bawk a.
9 Heroda chuan: “Johana chu a lu ka tan tawh kha. A nih chuan, hetianga a chungchâng ka hriata hi tu nge ni?” a ti a. Tichuan, amah chu hmuh a tum ta a.
10 Tin, tirhkohte an rawn lêt leh chuan Isua hnênah an thiltih zawng zawng an hrilh a. Chu veleh, anni chu hruaiin Bethsaida khua an tihah chuan a kal hranpui ta a.
11 Nimahsela, mipuiin chu chu an hriatin ani chu an zui a. Tin, Isua’n mipuite chu ṭha takin a lo lâwm a, Pathian Ram chanchin hrilhin tihdam ngai apiangte chu a tidam zêl a.
12 Tin, tlai lam a lo nih chuan Sâwm Pahnihte chu lo kalin a hnênah: “Hmun fianrial taka awm kan ni si a; chuvângin, mipuite hi riahna tûr leh ei tûr an hmuh theih nân kan chhehvêl khuaahte kaltîr rawh,” an ti a.
13 Nimahsela, Isua’n an hnênah: “Nangmahniin ei tûr pe rawh u,” a ti a. Anni erawh chuan: “Keimahni ngei kal a, ei tûr kan lei a nih loh chuan, hêng mi zawng zawngte tân hian chhangpêr panga leh sangha pahnih chauh lo chu, thil dang eng mah kan nei lo,” an ti a.
14 Patling ringawt pawh 5,000 vêl lai an awm si a. Nimahsela, Isua’n a zirtîrte hnênah: “A pâwl pâwlin 50 vêl zêlin ṭhuttîr rawh u,” a ti a.
15 Chutiang chuan an ti a, an ṭhuttîr ta vek a.
16 Tichuan, chhangpêr panga leh sangha pahnih chu a la a, vân lam enin a ṭawngṭai a.* A phel a, mipuite hnêna sem tûrin zirtîrte chu a pe ta a.
17 Tichuan, an vaiin an ei a, an puar ta hlawm a, a bâng nawi an la khâwm a, bâwmrâng 12 lai a ni.
18 A hnuah, amah chauhva a ṭawngṭai laiin zirtîrte chu a hnênah an lo kal a, Isua’n anni chu: “Mipuite’n tu nge a ni min tih?” tiin a zâwt a.
19 Anni chuan: “‘Baptistu Johana a ni,’ an ti che a, mi dangte chuan, ‘Elija a ni,’ an ti che a, mi dang lehte chuan, ‘Hmân laia zâwlneite zînga pakhat a lo tho leh a ni,’ an ti che,” tiin an chhâng a.
20 Tichuan, an hnênah: “A nih, nangnin tu nge a ni min tih?” a ti a. Tin, Petera’n: “Pathian mi tirh, Krista chu i ni,” tiin a chhâng a.
21 Tin, chu thu chu tu mah hrilh lo tûrin anniho chu uluk takin a chah a.
22 Ani chuan: “Mihring Fapa chuan hrehawm tam tak a tuar ang a, upa te, puithiam lal te leh, dân hre mite’n ani chu hnâwlin an tihlum ang a, ni thum nîah kaihthawhin a awm ang,” a ti a.
23 Tichuan, mi zawng zawng hnênah heti hian a sawi a: “Tu pawhin mi zui a duh chuan mahni tâna nung tawh lovin, nî tin a nghaisakna ban* puin mi zui reng rawh se.
24 Tu pawh a nun chhanhim tum apiangin a chân ang a, tu pawh keimah avânga a nun chân apiangin a chhanhim ang.
25 A nih leh, miin khawvêl hi a pumin nei se, mahni intichhia emaw, a nun chân emaw si sela, a tân eng hlâwkna nge awm ang?
26 Tu pawh keimah leh ka thute zahpui apiang chu mihring Fapain ama ropuina te, a Pa ropuina te leh, vântirhkoh thianghlimte ropuina nêna a lo kal hunah chu mi chu a zahpui ve ang.
27 Nimahsela, tih tak meuhvin ka hrilh a che u, heta ding ṭhenkhat hi Pathian Ram an hmuh thlenga thi hauh lo tûr an awm,” a ti a.
28 Tin, chûng thute a sawi aṭanga a ni riatna vêlah Petera, Johana leh, Jakoba te hruaiin ṭawngṭai tûrin tlângah a lâwn a.
29 A ṭawngṭai lai chuan a hmêl lan dân a lo danglam a, a lo vâr ta sur mai a.
30 Tin, ngai teh! Ani chu mi pahnihin an bia a; chu mite chu Mosia leh Elija an ni.
31 Anni chu ropuinaa inthuamin an inlâr a, Jerusalema thleng famkim tûr Isua kal chhuah dân tûr chungchâng an sawi a.
32 Tin, Petera, Jakoba leh, Johana te chu an muhîl a; nimahsela, an han harh chuan Isua ropuizia leh a bula mi pahnih ding chu an hmu a.
33 Chûng mite’n Isua an kalsan dâwn lai chuan Petera’n Isua hnênah: “Zirtîrtu, heta awm hi kan tân a ṭha e. Chuvângin, bûktê pathum i sa ang u, i tân pakhat, Mosia tân pakhat, Elija tân pakhat,” a ti a. Petera chuan eng nge a sawi pawh a hre lo.
34 Nimahsela, chûng thute a sawi lai chuan chhûm a lo zîng a, anni chu a rawn hliah a; tichuan, an hlau ta hle a.
35 Tin, chhûm aṭang chuan: “Hei hi ka Fapa, ka thlana chu a ni. A thusawi ngaithla rawh u,” tiin aw a lo chhuak a.
36 Aw a reh hnu chuan, Isua chauh chu an hmu ta a. Anni chu an ngawi reng a, an thil hmuhte chu hun eng emawti chhûng tu hnênah mah an hrilh lo.
37 Tin, a tûka tlâng aṭanga an chhuk chuan mipui tam takin ani chu an lo hmuak a.
38 Ngai teh! Mipui zîng aṭang chuan pa pakhat hi rawn au chhuakin: “Zirtîrtu, ka fapa hi ṭanpui* tûrin ka ngên a che, ka fa neih chhun a ni si a.
39 Ngai teh! Ramhuaiin a man ṭhîn a, a au chhuak thut ṭhîn, a kâ aṭanga chil phuan tla zawih zawih khawpin a tikhûr ṭhîn a, nasa taka a sawisak hnuah chauh a chhuahsan ṭâwk ṭhîn.
40 I zirtîrte hnênah hnawt chhuak tûrin ka ngên a; mahse, an thei si lo,” a ti a.
41 Isua chuan: “Chhuan rinna nei lo leh suaksual takte u, engtia rei nge in zîngah ka awm ang a, ka dawh ang che u? I fapa chu hetah hian rawn hruai rawh,” a ti a.
42 Tin, a rawn pan lai mêk pawhin ramhuai chuan leiah titluin nasa takin a tikhûr a. Nimahsela, Isua’n ramhuai chu hauvin naupang chu a tidam a, a pa hnênah a pe kîr leh a.
43 Tichuan, an vaiin Pathian thiltihtheihna ropui tak chu mak an ti hle a.
An vaia a thiltihte mak an tih êm êm lai chuan Isua’n a zirtîrte hnênah:
44 “Ngun takin ngaithla ula, hêng thute hi hre reng ang che u, mihring Fapa hi phatsan a ni ang a, a hmêlmate kutah pêk a ni dâwn si a,” a ti a.
45 Nimahsela, anni chuan a thusawi awmzia chu an hre thiam lo va. An hriatthiam theih lohna tûrin an lakah thup a ni, zawh lah an zâwt fiah ngam bawk si lo va.
46 Tin, an zînga ropui ber chungchângah an inkârah inhnialna a lo chhuak a.
47 Isua’n an ngaihtuahnate chu a hria a, naupang tê kaiin a bulah a dintîr a.
48 An hnênah: “Tu pawh ka hming avânga he naupang tê lâwm apiang chu kei mi lâwm a ni; tin, tu pawh kei mi lâwm chu mi Tîrtu lâwm a ni. In zînga tê ber anga awm hi a ni ropui ni,” a ti a.
49 Johana’n: “Zirtîrtu, tu emaw i hminga ramhuaite hnawt chhuak kan hmu a, kan zînga mi a nih loh avângin chutianga ti lo tûr chuan kan khap asin,” a ti a.
50 Isua erawh chuan a hnênah: “Khap duh tawh suh u, tu pawh nangmahni dodâl lotu che u chu in lama ṭang a ni si a,” a ti a.
51 Tin, Isua vâna lâk chhoh a hun dâwn hnaihah chuan, Jerusalema kal a tum tlat a.
52 Tichuan, a hmaah chanchin kengtute a tîr a. Tin, anni chu an kal a, a tâna thil lo buatsaih lâwk tûrin Samari mite khuaah an lût a.
53 Nimahsela, Jerusalem khuaa kal a tum tlat* avângin anni chuan an lo lâwm lo va.
54 Zirtîr Jakoba leh Johana’n chu chu an hmuhin: “Lalpa, hêngho kâng ral vek tûr hian vân aṭangin mei ko thla ila i duh em?” an ti a.
55 Nimahsela, lehhawiin anni chu a hau va.
56 Tichuan, khaw dangah an kal ta a.
57 Tin, kawnga an kal lai chuan mi pakhatin a hnênah: “I kalna apiangah ka zui ang che,” a ti a.
58 Isua erawh chuan a hnênah: “Sihalte’n kua an nei a, chunglêng savate pawhin bu an nei a; nimahsela, mihring Fapa erawh chuan lu nghahna tûr a nei lo,” a ti a.
59 Tichuan, mi dang hnênah: “Mi zui rawh,” a ti a. Ani chuan: “Lalpa, ka pa a thih thlenga a bula awm tûrin mi kaltîr hmasa phawt rawh;* tichuan, ka vui liam zawhah ka zui ang che,” a ti a.
60 Nimahsela, a hnênah: “Mitthite’n* an mitthite chu vui rawh se, nang erawh chu kal la, Pathian Ram chanchin hi va puang darh rawh,” a ti a.
61 Tin, mi dang leh chuan: “Lalpa, ka zui ang che; nimahsela, ka chhûngte min thlahtîr hmasa phawt rawh,” a ti a.
62 Isua’n a hnênah: “Tu pawh lei lehnaa a kut nghat a, hnung lama thil awmte entu chu Pathian Ram mi ni tlâk a ni lo,” a ti a.
Footnote-te
^ A ngial a ngan chuan, “tangkarua.”
^ A nih loh leh, “thawmhnaw hâk thlâk tûr.”
^ Chu chu, Herod Antipa a ni. Thu Har Hrilhfiahna en rawh.
^ A ngial a ngan chuan, “mal a sâwm.”
^ Thu Har Hrilhfiahna en rawh.
^ A ngial a ngan chuan, “en.”
^ A ngial a ngan chuan, “a hawi tlat.”
^ A ngial a ngan chuan, “Lalpa, ka pa mi phûmtîr hmasa phawt rawh.”
^ Thlarau lama thite sawina a ni.
