Marka Ziak 2:1-28
2 Nimahsela, ni eng emaw zât hnuah Isua chu Kapernaum khuaah a lût leh a, ina a awm thu chu a lo darh ta a.
2 Tichuan, kawngka bulah pawh awmna tûr awm lo khawp hialin mi an lo pung khâwm a, Isua chuan an hnênah Pathian thu a hrilh ṭan ta a.
3 Tin, mi paliin a hnênah zeng pakhat an rawn zâwn a.
4 Nimahsela, mi an tam êm avângin Isua bul an thlenpui thei lo va; tichuan, Isua awmna zâwn in chung chu ṭhiatin, chuta ṭang chuan zeng chu a mutna chawpin muang chângin an thlâk thla a.
5 Isua’n an rinna chu a hmuhin zeng hnênah chuan: “Ka fapa, i sualte ngaihdam a ni tawh e,” a ti a.
6 Chuta ṭhu ve dân hre mi ṭhenkhat chuan:
7 “Engvângin nge he pa hian hetianga thu a sawi? Pathian a sawichhia a ni. Pathian chauh lo chu sualte ngaidam thei tu nge awm?” tiin an ngaihtuah a.
8 Nimahsela, Isua’n chutiang chuan an ngaihtuah tih a lo hre ta nghâl a; tichuan, an hnênah: “Engvângin nge khatianga in ngaihtuah?
9 Zeng hnênah, ‘I sualte ngaihdam a ni tawh e,’ tia sawi nge, ‘Tho la, i mutna kha la la, kal rawh,’ tia sawi hi awlsam zâwk?
10 Eng pawh ni se, mihring Fapa hian leia sual ngaihdam theihna a nei tih in hriat ka duh a ni,” a ti a. Zeng hnênah chuan:
11 “Tho la, i mutna kha la la, haw rawh,” tiin a hrilh a.
12 Tichuan, a tho va, a mutna chu a la ta nghâl a, an zaa hmaah chuan a kal chhuak ta a. Mite chuan mak an ti hle a: “Hetiang hi kan la hmu ngai lo rêng rêng,” tia sawiin Pathian an chawimawi ta a.
13 Tin, dîl kamah chuan a kal leh a, mipui zawng zawng chu a hnênah an lo kal a, ani chuan a lo zirtîr a.
14 Tichuan, a kal zêl a, chhiah pêkna hmuna lo ṭhu Alphaia fapa Levia* chu a hmu a, a hnênah: “Min zui rawh,” a ti a. Tin, a tho va, a zui ta nghâl a.
15 A hnuah, Levia ina chaw a ei laiin, amah zuitu tam takte zînga chhiahkhawntute leh mi sualte pawhin Isua leh a zirtîrte bulah chaw an ei ve a.
16 Nimahsela, Pharisaite zînga dân hre mite’n mi sualte leh chhiahkhawntute bula a ei an hmuh chuan a zirtîrte hnênah: “Engvângin nge chhiahkhawntute leh mi sualte bulah chaw a ei?” an ti a.
17 Isua’n an thusawi a hriat chuan an hnênah: “Dam lote’n doctor an mamawh a, mi hrisêlte erawh chuan an mamawh lo. Mi felte tâna lo kal ka ni lo va, mi sualte simtîr tûr zâwka lo kal ka ni,” a ti a.
18 Johana zirtîrte leh Pharisaite chuan chaw an nghei ṭhîn a. Tin, anni chu a hnênah lo kalin: “Engvângin nge Johana zirtîrte leh Pharisaite zirtîrte’n chaw an nghei ṭhin laia i zirtîrte’n an nghei ve loh?” an ti a.
19 Isua’n an hnênah: “Mopa* ṭhiante chuan an bula mopa a awm laiin chaw an nghei a ngai dâwn em ni? An bula mopa a awm chhûng chuan an nghei thei lo vang.
20 Nimahsela, an hnên ata mopa hruai bo nîte a la thleng ang a, chumi nîah chuan chaw an la nghei ang.
21 Tu mahin puan hlui ṭet chu puan tharin an bel ngai lo; chuti lo chuan, a belna puan thar chuan puan hlui chu a pawt mar ang a, a tiṭet nasa lehzual ang.
22 Chu bâkah, tu man savun peng* hluiah uain thar an thun ngai lo; chuti lo chuan, savun peng chu puakin, uainte chu a bua ang a, savun peng chu a chhe mai ang. Nimahsela, uain thar chu savun peng tharah an thun zâwk ṭhîn,” a ti a.
23 Tin, Sabbath nîa buh hmunte a pal tlang laiin, a zirtîrte chuan kal pahin buh vuite chu an thliak a.
24 Pharisaite chuan a hnênah: “Engvângin nge i zirtîrte’n Sabbath nîa tih thiang lo an tih?” an ti a.
25 Ani chuan an hnênah: “Davida’n ei tûr a neih loh lai leh, a mite nêna an ril a ṭâm laia a thiltih kha in chhiar lo vem ni?
26 Puithiam lal Abiathara chanchinah, Pathian ina Davida a luh thu leh puithiamte chauhvin an ei thian chhangdah a ei a, a hnêna awmte a pêk ve thu pawh kha in chhiar lo vem ni?” a ti a.
27 Tichuan, an hnênah: “Pathianin Sabbath hi mihringte tân a siam a; nimahsela, mihringte hi Sabbath tân a siam lo.
28 Chuvângin, mihring Fapa hi Sabbath chungah pawh Lal a ni,” a ti a.
Footnote-te
^ Hei hi Matthaia hming dang a ni.
^ A nih loh leh, “mo neitu.”
^ A nih loh leh, “savuna siam tuithâwl.” Thu Har Hrilhfiahna en rawh.
