Matthaia Ziak 1:1-25
1 Abrahama thlah, Davida thlah, Isua Krista* chanchin* ziahna lehkhabu:
2 Abrahama chu Isaaka pa a ni a;Isaaka chu Jakoba pa a ni a;Jakoba chu Juda leh a unaute pa a ni a;
3 Juda chu Tamari’n Pereza leh Zera a hrinsak a;Pereza chu Hezrona pa a ni a;Hezrona chu Rama pa a ni a;
4 Rama chu Aminadaba pa a ni a;Aminadaba chu Nasona pa a ni a;Nasona chu Salmona pa a ni a;
5 Salmona chu Rahabi’n Boaza a hrinsak a;Boaza chu Ruthi’n Obeda a hrinsak a;Obeda chu Jesaia pa a ni a;
6 Jesaia chu lal Davida pa a ni.
Davida chu Uria nupuiin Solomona a hrinsak a;
7 Solomona chu Rehoboama pa a ni a;Rehoboama chu Abija pa a ni a;Abija chu Asa pa a ni a;
8 Asa chu Jehosaphata pa a ni a;Jehosaphata chu Jehorama pa a ni a;Jehorama chu Uzia pa a ni a;
9 Uzia chu Jothama pa a ni a;Jothama chu Ahaza pa a ni a;Ahaza chu Hezekia pa a ni a;
10 Hezekia chu Manasea pa a ni a;Manasea chu Amona pa a ni a;Amona chu Josia pa a ni a;
11 Josia chuan Judate Babulon sala hruai an nih laiin, Jekonia leh a unaute a nei a.
12 Babulon sala an hruai hnuah, Jekonia chuan Sealtiela a nei a;Sealtiela chu Zerubabela pa a ni a;
13 Zerubabela chu Abiuda pa a ni a;Abiuda chu Eliakima pa a ni a;Eliakima chu Azora pa a ni a;
14 Azora chu Zadoka pa a ni a;Zadoka chu Akima pa a ni a;Akima chu Eliuda pa a ni a;
15 Eliuda chu Eleazara pa a ni a;Eleazara chu Matthana pa a ni a;Matthana chu Jakoba pa a ni a;
16 Jakoba chu Josefa pa a ni a; Josefa chu Krista tia koh, Isua hringtu Mari pasal a ni.
17 Tichuan, chhuan zawng zawngte chu Abrahama aṭanga Davida thlengin chhuan 14 an awm a; Davida aṭanga Babulon sala hruai an nih thlengin chhuan 14 an awm a; Babulon sala hruai an nih aṭanga Krista thlengin chhuan 14 an awm a ni.
18 Hei hi Isua Krista pian dân chu a ni. Mari chu Josefa nên an inhual lai, an inneih hma siin thlarau thianghlim hmanga raitîr a ni a, a rai tih chu hriat a lo ni ta a.
19 Mahse, a pasal hual Josefa chu mi fel tak a ni a, Mari chu tihmualpho a duh loh avângin a rûk têa ṭhen a tum a ni.
20 Chûng thilte a ngaihtuah lai chuan Jehova* vântirhkoh pakhat a mumangah a rawn inlâr a, a hnênah: “Josefa, Davida fapa, Mari hi nupuia neih hlau suh, a naupai hi Pathianin a thlarau thianghlim hmanga a paitîr a ni e.
21 Fapa a hring ang a, a hmingah Isua* i sa tûr a ni, ani chuan a mite chu an sualna ata a chhandam ang,” tiin a hrilh a.
22 Chûng thil zawng zawng chu a lo thlen famkim tûr thu Jehova’n a zâwlnei hmangin heti hian a sawi a ni:
23 “Ngai teh u! Nula thianghlim a rai ang a, fapa a hring ang a, a hmingah Immanuela an sa ang,” tiin. Chu chu, “Pathian Kan Hnênah A Awm,” tihna a ni.
24 Tichuan, Josefa chu a tho va, Jehova vântirhkohvin a hrilh angin Mari chu nupuiah a nei a.
25 Nimahsela, fapa a hrin hma loh chuan a pâwl lo va, fapa a hrin chuan a hmingah Isua a sa ta a ni.
Footnote-te
^ A nih loh leh, “Messia; Hriak Thiha.”
^ A nih loh leh, “thlahtute.”
^ Kristian Grik Pathian Lehkha Thu-ah hian Pathian hming, Jehova tih hi vawi 237 a chuang a, hei hi a lanna hmasa ber a ni.
^ Hebrai hming Jeshua, a nih loh leh Joshua tih nên a inang a, a awmzia chu “Jehova Chu Chhandamna A Ni,” tihna a ni.
