Matthaia Ziak 11:1-30
11 Isua’n a zirtîr 12-te hnêna kaihhruainate a pêk hnu chuan, an khawpuiahte zirtîr tûr leh thu hril tûrin a kal chhuak a.
2 Nimahsela, Johana’n Krista thiltihte chu tân in aṭanga a lo hriat chuan a zirtîrte a tîr a.
3 “Lo Kal Tûra chu i ni em? Nge ni a, mi dang kan la beisei dâwn?” tiin a zawhtîr a.
4 Isua’n anni chu: “Kal ula, Johana chu in thil hriat leh hmuhte hi va hrilh rawh u:
5 Mitdelte mit a lo vâr ta, kebaite kein an kal ta, phârte tihthianghlim an ni ta, bengngawngte beng a lo vâr ta, mitthite kaihthawh an nih bâkah, mi retheite hnênah pawh chanchin ṭha hrilh a ni.
6 Ka chungchânga rinhlelhna nei lo* chu a hlim e,” tiin a chhâng a.
7 Tin, Johana zirtîrte an lêt leh hnu chuan Isua’n mipuite hnênah Johana chungchâng chu a sawi ṭan ta a: “Eng en tûrin nge thlalêrah in kal chhuah? Phairuang* thli chhêm nghîn en tûrin em ni?
8 A nih leh, eng en tûrin nge in kal chhuah? Thawmhnaw man to inbel en tûrin em ni? Chûng thawmhnaw man to inbelte chu lal inahte asin an awm ṭhin.
9 A nih chuan, eng en tûr chiahin nge in kal chhuah? Zâwlnei en tûrin em ni? Ni e, ka hrilh a che u, Johana chu zâwlnei a ni a; nimahsela, zâwlnei dang zawng zawng ai pawhin a ropui zâwk a ni.
10 Ani chu: ‘Ngai teh u, ka chanchin kengtu chu i hmaah ka tîr ang a, ani chuan i kawng a sial ang!’ tia a chungchâng an ziaha kha a ni.
11 Tih tak meuhvin ka hrilh a che u, hmeichhe hrin tawh zîngah Baptistu Johana aia ropui zâwk tu mah an la awm lo; nimahsela, vân Rama mi tê ber pawh ani aiin a ropui zâwk a ni.
12 Baptistu Johana’n rawng a bâwl ṭan aṭanga tûn thlengin, vân Rama luh tumin mi tam tak chuan theih tâwp an chhuah ṭhîn a, chutianga theih tâwp chhuahtute chu vân Ramah an lût ang.
13 Zâwlneite leh Dân thu zawng zawngte chuan Johana’n a rawngbâwlna a ṭan thlengin an hrilh lâwk ṭhîn.
14 In pawm emaw, pawm lo emaw ani chu ‘Elija lo kal tûra chu a ni.’
15 Beng nei chuan hre rawh se.
16 “He chhuan hi tute nên nge ka tehkhin ang? Naupang bazâra ṭhua an ṭhiante au ang chu an ni.
17 ‘Phênglâwng kan tumsak che u a, in lâm si lo va, lungngaiin kan ṭap a, in âwm chûmin in ṭap ve si lo,’ tia sawitute ang chu an ni.
18 Chutiang bawkin, Johana a lo kal a, a eiin a in lo va; nimahsela, mite chuan, ‘Ramhuai a zâwl a ni,’ an ti a.
19 Mihring Fapa a lo kal a, a eiin a in a; nimahsela, mite chuan, ‘En teh u! Chaw leh uain heh tak, chhiahkhawntute leh mi sualte ṭhian saw,’ an ti leh bawk si. Mahse, finna chu a thiltih aṭangin a dikzia a lang chhuak ṭhîn,” a ti a.
20 Tichuan, thil mak a tih tamna ber khuate chu an sim loh avângin a hau ta a.
21 “Korazin leh Bethsaida khuate u, in chunga thil thleng tûr chu a va râpthlâk dâwn êm! Nangmahnia thil mak tihte kha Tura leh Sidon khaw chunga tih ni sela chuan, saiip puan sina vuta ṭhuin an sim daih tawh ang.
22 Nimahsela, ka hrilh a che u, Rorêlna Nîah chuan Tura leh Sidon khaw tawrh aiin in tawrh tûr chu a nasa zâwk daih ang.
23 Nang pawh Kapernaum, vân thlengin chawimawi i ni dâwn em ni? Thlân thlengin i chhuk zâwk ang; nangmaha thil mak tihte kha Sodom khuaa tih ni se chuan, tûn thlengin a la awm tûr.
24 Nimahsela, ka hrilh a che, Rorêlna Nîah chuan Sodom khaw tawrh aiin i tawrh tûr chu a nasa zâwk ang,” tiin.
25 Chutih lai chuan Isua’n: “Ka Pa, lei leh vân Lalpa, hêngte hi mi fing leh mi thiamte laka thup a, naupang tê anga inngaitlâwmte hnêna i puan chhuah avângin mi zawng zawng hmaah ka fak a che.
26 Aw ka Pa, chu chu i duh dân a ni rêng si a.
27 Ka Pain engkim mi kawltîr tawh. Pa tlukin tu man Fapa an hre chiang lo va, Fapa tlukin tu man Pa an hre chiang hek lo, Fapain Pa nihna dik tak a hrilhate chauh lo chuan.
28 Nangni chau leh phurrit phur zawng zawngte u, ka hnênah lo kal ula, ka chawlh hahdamtîr ang che u.
29 Thuhnuairawlh tak leh rilrua inngaitlâwm tak ka nih avângin ka nghâwngkawl bât ula, ka hnên aṭangin inzir rawh u; tichuan, hahdamna in hmu ang.
30 Ka nghâwngkawl chu bah a nuam a, ka phur pawh a zâng a ni,” tiin a sawi a.
Footnote-te
^ A ngial a ngan chuan, “keimaha tlûk nachhan tûr hmu lo.”
^ Thlîin awlsam taka a chhêm nghîn theih hnim chi khat, sîn leh sâng tak.
