Matthaia Ziak 15:1-39
15 Tin, Jerusalem khua aṭangin Pharisaite leh dân hre mite Isua hnênah an lo kal a, anni chuan:
2 “Engvângin nge i zirtîrte’n upate thurochhiah* an bawhchhiat? Chaw an ei hmain an kut an sil* si lo,” an ti a.
3 Isua chuan an hnênah: “Engvângin nge nangni pawhin in thurochhiah avânga Pathian thupêk in bawhchhiat?
4 Pathianin, ‘I nu leh i pa chawimawi rawh,’ tih leh, ‘A nu leh a pa sawichhetu chu tihhlum tûr a ni,’ tih a sawi a.
5 Nimahsela, nangni erawh chuan, ‘Tu pawh a nu leh pa hnêna: “Ka ṭanpuina tûr zawng zawng che u chu Pathian hnênah hlan a ni tawh,” titu chuan
6 a nu leh a pa a chawimawi a ngai lo,’ in ti a. Chutiang chuan in thurochhiah avângin Pathian thu chu eng mah lovah in chantîr a ni.
7 Nangni mi vervêkte u, Isaia hian in chungchâng a lo hrilh lâwk dik tak zet mai:
8 ‘Hêng mite hian an kâin min chawimawi a, an thinlung erawh chuan min hlat hle si.
9 Mihring thupêkte chauh an zirtîr avângin an mi biak ṭhin hi a thlâwn mai a ni,’ tia a sawi hi,” tiin a chhâng a.
10 Tin, mipuite chu a ko va, an hnênah: “Ngaithla ula, hre thiam rawh u:
11 Mihring tibawlhhlawhtu chu a kâa lût ni lovin, a kâ aṭanga chhuak zâwk hi a ni,” a ti a.
12 A zirtîrte lo kalin, a hnênah: “Pharisaite’n i thusawi an hriat khân an lungni lo hle tih i hria em?” an ti a.
13 Ani erawh chuan: “Ka Pa vâna mi phun loh thing zawng zawng chu a zung chawpa phawi a ni ang.
14 Anni chu ngaihsak suh u. Hruaitu mitdel mai an ni, mitdelin mitdel a hruai chuan an pahnihin khuarkhurumah an tla dûn ang,” tiin a chhâng a.
15 Petera chuan: “Tehkhin thu awmzia kha min hrilhfiah rawh,” a ti a.
16 Ani chuan: “Nangni pawhin in la hre thiam lo cheu a ni maw?
17 Kâa lût apiang chu pumpuiah a lût thla a, inthiarnaah paih chhuahin a awm ṭhîn tih in hre lo vem ni?
18 Amaherawhchu, kâa chhuak apiang chu thinlung aṭanga lo chhuak a ni a, chûngte chuan mi a tibawlhhlawh ṭhîn.
19 Thinlung aṭang hian ngaihtuahna sual te, tualthahna te, uirêna te, nungchang bawlhhlawhna te,* rûkrûkna te, hêkna thu te, sawichhiatnate a lo chhuak ṭhîn.
20 Chûng thilte chu mihring tibawlhhlawhtu a ni; nimahsela, kut sil lova* chaw ei chuan mihring a tibawlhhlawh lo ve,” tiin a hrilhfiah a.
21 Chu hmun chu chhuahsanin, Isua chu Tura leh Sidon ram lamah a kal ta a.
22 Tin, ngai teh! Chu rama Phoiniki hmeichhe* pakhat a hnênah lo kalin: “Lalpa, Davida fapa min khawngaih* rawh. Ka fanu ramhuaiin a man a, nasa takin a tibuai a ni,” tiin a ngên chiam a.
23 Mahse, ani chuan ṭawngkam khat mahin a chhâng lo. Tichuan, a zirtîrte chu lo kalin: “Ngên chungin min zui zêl si a, min zui tawh lo tûrin hrilh rawh,” an ti a.
24 Ani erawh chuan: “Israel hnam berâm bote tân chauhva tirh ka ni,” tiin a chhâng a.
25 Nimahsela, hmeichhia chu a lo kal a, bawkkhupa chibai rawn bûkin: “Lalpa, min ṭanpui rawh!” a ti a.
26 Ani chuan: “Fate chhang lâksak a, ui tête hnêna pêk chu thil dik a ni lo,” tiin a chhâng a.
27 Hmeichhia chuan a hnênah: “A dik alâwm, Lalpa; nimahsela, ui tête pawhin an pute dawhkân aṭanga chhang them tla chu an ei ṭhîn asin,” a ti a.
28 Tin, Isua’n a hnênah: “Aw, hmeichhia, i rinna chu a va nasa êm! I duh ang tak chuan i chungah thleng rawh se,” a ti a. Tichuan, chumi dârkârah chuan a fanu chu a dam ta nghâl a ni.
29 Chuta ṭanga a chhuah hnuin Isua chu Galili dîl kiangah a kal a, tlângah lâwnin chutah chuan a han ṭhu a.
30 Tichuan, mipui tam tak a hnênah an lo kal a, kebai te, ramtuileilo te, mitdel te, ṭawng thei lo te leh, dam lo dang tam tak an rawn hruai a, a ke bulah an rawn dah a, ani chuan a lo tidam hlawm a.
31 Mipuite chuan ṭawng thei lo ṭawng thei ta te, ramtuileilo dam ta te, kebai kea kal ta te leh, mitdel mit vâr tate an hmuh chuan mak an ti hle a, Israelte Pathian chu an chawimawi ta a.
32 Tin, Isua’n a zirtîrte a ko va, an hnênah: “Mipuite hi ka khawngaih hle mai, ka hnênah ni thum lai an awm tawh a, ei tûr eng mah an nei si lo. Rilṭâma* hawtîr ka duh lo, kawngah an chau mai ang,” a ti a.
33 Nimahsela, zirtîrte chuan a hnênah: “Hetiang hmun fianrialah hian mipui heti zât kham khawp chhang ei tûr khawi aṭangin nge kan hmuh theih tehlul ang?” an ti a.
34 Isua’n an hnênah: “Chhangpêr eng zât nge in neih?” a ti a. Anni chuan: “Pêr sarih leh nghatê tlêm,” tiin an chhâng a.
35 Tin, mipuite chu leia ṭhu tûra a hrilh hnuin,
36 chhangpêr pasarih leh sangha chu a la a, lâwmthu a sawi zawhin a phel a, zirtîrte hnênah a pe a, anni chuan mipuite chu an sem ta a.
37 Tichuan, an vaiin an ei a, an puar ta hlawm a; tin, an ei bâng nawi chu an la khâwm a, bâwmrâng lian tak pasarih khat a ni.
38 A eitute chu hmeichhia leh naupang tiam lovin, patling ringawt pawh 4,000 an ni a.
39 Tichuan, mipuite a hawtîr hnuin Isua chu lawngah a chuang a, Magadan ramah a kal ta a.
Footnote-te
^ Chu chu, Juda sakhaw zirtîrtute hnên aṭanga an inhlan chhâwn Bible thu nêna inmil lo thil chînte leh dânte a ni.
^ Pharisaite leh Juda mi ṭhenkhat chuan an thurochhiah milin an kut an sil ṭhîn.
^ Grik ṭawng chuan por·neiʹa tih a ni a, pakhat aia tam sawina a ni. Thu Har Hrilhfiahna en rawh.
^ Pharisaite leh Juda mi ṭhenkhat chuan an thurochhiah milin an kut an sil ṭhîn.
^ A nih loh leh, “Kanaan hmeichhia.”
^ A ngial a ngan chuan, “zahngai.”
^ A nih loh leh, “chaw ngheia.”
