Matthaia Ziak 18:1-35
18 Chutih lai chuan zirtîrte chu Isua bulah an lo kal a, a hnênah: “Vân Ramah tu nge ropui ber ang?” tiin an zâwt a.
2 Ani chuan naupang tê a ko va, an zîngah a dintîr a.
3 An hnênah: “Tih tak meuhvin ka hrilh a che u, in insiamṭhata naupang tê ang hi in nih loh chuan, vân Ramah in lût tawp lo vang.
4 Chuvângin, tu pawh he naupang tê anga inngaitlâwm apiang chu vân Ramah a ropui ber ang.
5 Tu pawh ka hming avânga he naupang tê ang hi lâwm apiang chu kei mi lâwm a ni.
6 Nimahsela, ka chunga rinna lantîrtu hêng naupang tê ang mite zînga pakhat lek pawh titlu apiang chu, buh râwt sawmna lung* awrhtîr a, tuifinriat thûk taka thlâk a tân a ṭha zâwk ang.
7 “Khawvêl hian tlûknate a thlentîr avângin a chunga thil thleng tûr chu a va râpthlâk dâwn êm! Tlûknate chu lo thleng tûr rêng a ni; nimahsela, tlûkna thlentîrtu chunga thil thleng tûr chu a va râpthlâk dâwn êm!
8 Chuvângin, i kutin emaw, i kêin emaw a tihtlûk che chuan tan la, paih daih rawh. Kut pahnih emaw, ke pahnih emaw neia chatuan meia paiha awm ai chuan, ramtuileilo emaw, kebai emaw chunga nunnaa luh i tân a ṭha zâwk e.
9 Tin, i mitin a tihtlûk che chuan kher chhuak la, paih daih rawh. Mit pahnih neia Gehenna* meia paiha awm ai chuan, mit pakhat chauh neia nunnaa luh i tân a ṭha zâwk e.
10 Hêng naupang tê ang mite hi hmusit lo tûrin fîmkhur rawh u, vâna an vântirhkohte chu ka Pa vâna mi hmaah an awm reng si a.
11 ——
12 “Engtin nge in ngaih? Mi pakhatin berâm 100 neiin, an zînga pakhat bo sela, 99-te chu tlângah hnutchhiahin a bo pakhat chu a zawng dâwn lâwm ni?
13 Tih tak meuhvin ka hrilh a che u, a hmuh leh chuan a bo ve lo 99-te chungah aiin, a bo pakhat chungah chuan a lâwm zâwk ang.
14 Chutiang bawkin, hêng naupang tê ang mite zînga pakhat lek boral pawh hi ka* Pa vâna mi duh zâwng a ni lo ve.
15 “Tin, i unauvin thil sual a tih chuan, kal la, mi dang hriat lohvin a thil sual tih chu hrilh rawh.* I thusawi a ngaihthlâk chuan i unau chu thil dik ti tûrin i ṭanpui tihna a ni ang.
16 Nimahsela, a ngaihthlâk loh che chuan thuhretu pakhat emaw, pahnih emaw hruai ang che; chutiang chuan, thuhretu pahnih emaw, pathum emaw hriatah thil sual a ti ngei tih finfiah a ni thei ang.
17 Anni pawh a ngaithla lo a nih chuan kohhran hriattîr ang che. Kohhran hial pawh a ngaithla lo a nih chuan, ani chu i tân hnam dang mi leh chhiahkhawntu ang ni rawh se.
18 “Tih tak meuhvin ka hrilh a che u, leia in phuar apiang chu vâna phuar sa a ni ang a, leia in phelh apiang chu vâna phelh sa a ni bawk ang.
19 Tih tak meuhvin ka hrilh leh a che u, leiah hian in zînga mi pahnih thil pawimawh dîl kawnga an inlungrual chuan ka Pa vâna miin a tihsak ang.
20 Mi pahnih emaw, pathum emaw ka hminga an awm khâwmna apiangah an zîngah ka awm ṭhîn,” a ti a.
21 Tin, Petera chu lo kalin, a hnênah: “Lalpa, ka unauvin ka chungah thil sual ti sela, vawi eng zât nge ka ngaihdam ang? Vawi sarih thlengin em ni?” a ti a.
22 Isua’n a hnênah: “Ni lo ve, vawi sarih thleng ni lovin, vawi 77 thleng zâwkin le!
23 “Chuvângin, vân Ram chu a laka an leiba rûl tûra a bâwihte duhtu lal nên tehkhin theih a ni.
24 An leibate a han ṭhîn ṭan chuan, talent 10,000* batu bâwih pakhat an rawn hruai a.
25 Nimahsela, rulhna tûr a neih loh avângin, a pu chuan bâwih dangte hnênah, chu bâwih leh a nupui fanaute bâkah, a thil neih zawng zawngte chu hralh a, a ba rulh nâna rawn la tûrin thu a pe a.
26 Chutichuan, bâwih chuan bawkkhupa chibai bûkin, ‘Min nghâk hrâm rawh, a vaiin ka rûl leh vek ang che,’ tiin a ngên a.
27 A pu chuan a khawngaih ta êm êm a, a thupêk chu sûtin a ba chu a ngaidam ta a.
28 Nimahsela, chu bâwih chu a kal chhuak a, a laka denarii* 100 batu a bâwihpui a va hmuh chuan a man a, ‘I ba kha mi rûl rawh,’ tiin a rêk ta a.
29 A bâwihpui chuan bawkkhupin, ‘Min nghâk hrâm rawh, ka rûl leh ang che,’ tiin a ngên a.
30 Nimahsela, a thusawi chu a ngaithla duh lo va, a leiba a tlâk hma loh tâng tûrin tân inah a khungtîr ta a.
31 A bâwihpui dangte’n thilthleng chu an hmuhin an lungngai hle a; tichuan, an pu hnênah kalin thilthleng zawng zawng chu an va hrilh a.
32 Tin, a pu chuan a kohtîr a, a hnênah: ‘Bâwih sual, mi ngen avângin i ba zawng zawng ka ngaidam che a.
33 I chunga khawngaihna ka lantîr ang khân, i bâwihpui chungah pawh khawngaihna i lantîr ve tûr a ni lo vem ni?’ a ti a.
34 Tin, a pu chu a thinrim ta hle a, a leiba a tlâk hma loh tâng tûrin tân inah a khungtîr ta a.
35 Chutiang bawkin, nangni pawhin thinlung taka in unaute in ngaihdam loh chuan, ka Pa vâna miin chutiang chuan in chungah a ti ve ang,” a ti a.
Footnote-te
^ A nih loh leh, “sabengtungin a her kual ṭhin buh râwt sawmna lung.”
^ Thu Har Hrilhfiahna en rawh.
^ Ni thei dang leh chu, “in.”
^ A ngial a ngan chuan, “zilh rawh.”
^ Tangkaraw talent 10,000 chu denarii 60,000,000 nên a intluk.
^ Denarii khat hi hnathawktu ni khat hlawh nên a intluk.
