Matthaia Ziak 19:1-30
19 Isua’n chûng thute a sawi zawh chuan, Galili ram chhuahsanin Jordan Lui râla Judai ramri a lo thleng ta a.
2 Tin, mipui tam takin ani chu an zui a, chu hmunah chuan an zînga dam lote chu a lo tidam hlawm a.
3 Pharisaite a hnênah an lo kal a, amah fiah nân: “Eng vâng pawhin miin a nupui a ṭhen a thiang em?” tiin an zâwt a.
4 Ani chuan: “A tîr aṭangin anmahni Siamtuin mipa leh hmeichhiaa a siam hnuah:
5 ‘Chumi avâng chuan mipain a nu leh a pa a kalsan ang a, a nupui a vuan tlat ang; tichuan, tisa pumkhat an lo ni tawh ang,’ a ti tih in chhiar ngai lo vem ni?
6 Tin, pahnih ni tawh lovin, tisa pumkhat an ni tawh zâwk ang. Chuvângin, Pathianin a zawm tawh chu mihringin ṭhen suh se,” tiin a chhâng a.
7 Anni chuan a hnênah: “Chuti a nih si chuan, engvângin nge Mosia’n inmâkna lehkha pea inṭhen a phal?” tiin an zâwt a.
8 Ani chuan an hnênah: “Mosia’n in nupuite ṭhen a phal chhan chu in luhlul êm vâng a ni; nimahsela, chu chu a tîr aṭanga thil nih dân a ni si lo.
9 Ka hrilh a che u, nungchang bawlhhlawhnaa* a inhman vâng ni lova a nupui ṭhena mi dang nei apiang chu a uirê a ni,” tiin a chhâng a.
10 Tin, zirtîrte chuan a hnênah: “Chu chu inneih dân tûr a nih si chuan, inneih loh tawp a ṭha zâwk a nih chu,” an ti a.
11 Ani erawh chuan: “Chûng thute chu mipa zawng zawngin an zâwm vek thei lo, zâwm thei tûra Pathianin a ṭanpuite* chauh lo chuan.
12 Pian tirh ata mi tilreh an awm a, mihring kuta reh chawpte an awm bawk a, vân Ram avânga tilreha insiam an awm bawk. Chu chu a zâwm thei apiangin zâwm rawh se,” tiin a hrilh a.
13 Tin, an lu chunga kut a nghaha a ṭawngṭaisak theih nân a hnênah naupangte an rawn hruai a; nimahsela, zirtîrte chuan an lo hau va.
14 Isua erawh chuan: “Naupangte kha ka hnênah rawn kaltîr ula, lo dang suh u, vân Ram chu hetiang mite ta hi a ni si a,” a ti a.
15 Tichuan, an chunga a kut a nghah zawhin, chuta ṭang chuan a kal ta a.
16 Tin, ngai teh u! Tu emaw a hnênah a rawn kal a: “Zirtîrtu, chatuan nunna ka neih theih nân thil ṭha eng nge ka tih ang?” tiin a rawn zâwt a.
17 Isua chuan a hnênah: “Engvângin nge thil ṭha chungchâng mi zawh? Ṭha chu mi pakhat chauh a awm. Nunna neih i duh chuan thupêkte chu zâwm reng ang che,” a ti a.
18 Ani chuan: “A eng ber maw?” a ti a. Isua chuan: “Tual i that tûr a ni lo, i uirê tûr a ni lo, rûk i ru tûr a ni lo, thuhretu derah i ṭang tûr a ni lo,
19 i nu leh i pa chawimawi rawh tih leh, nangmah i inhmangaih angin i vêngte pawh i hmangaih tûr a ni, tihte hi,” a ti a.
20 Tlangvâl chuan a hnênah: “Chûng zawng zawng chu ka zâwm reng alâwm; eng thil dang nge ka la tih ngai?” a ti a.
21 Isua’n a hnênah: “Ṭhat famkim i duh chuan* kal la, i thil neihte va hralh la, i hralhna sum chu mi retheite hnênah pe ang che; tichuan, vânah ro i nei ang; tin, lo kal la, mi zui ang che,” a ti a.
22 Tlangvâlin chu thu a han hriat chuan, mi hausa tak a nih avângin lungngai takin a kal ta a.
23 Tichuan, Isua’n a zirtîrte hnênah: “Tih tak meuhvin ka hrilh a che u, mi hausa tân vân Rama luh chu a harsa hle ang.
24 Ka hrilh nawn leh a che u, mi hausa Pathian Rama luh aiin, sanghâwngsei hriau benga luh tlang a awl zâwk ang,” a ti a.
25 Zirtîrte’n chûng thute an hriat chuan mak an ti hle a: “Tu nge chhandam ni thei ta ang?” an ti a.
26 Isua’n anni chu ngun taka enin: “Chu chu mihring tih theih rual a ni lo; nimahsela, Pathian nên erawh chuan thil engkim tih theih a ni,” tiin a hrilh a.
27 Tin, Petera chuan: “Engkim kalsanin kan zui che a; a nih chuan, eng nge kan dawn ang?” a ti a.
28 Isua’n an hnênah: “Tih tak meuhvin ka hrilh a che u, thil engkim siamthar* a nih hunah chuan, mihring Fapa hi a ropuina lalṭhutthlêngah a ṭhu ang a. Chumi hunah chuan, nangni mi zuitute hi lalṭhutthlêng 12-ah in ṭhu ang a, Israel hnam 12-te chu ro in rêlsak ang.
29 Tu pawh ka hming avânga a inte emaw, a unaupate emaw, a farnute emaw, a pa emaw, a nu emaw, a fate emaw, a ramte emaw kalsan apiang chuan a leh zain a hmu leh ang a, chatuan nunna a chang bawk ang.
30 “Nimahsela, mi tam tak a hmasa bera awm mêkte hi a hnuhnûng berah an la awm ang a, a hnuhnûng bera awm mêkte pawh hi a hmasa berah an la awm ang.
Footnote-te
^ Grik ṭawnga por·neiʹa. Thu Har Hrilhfiahna en rawh.
^ A nih loh leh, “thilpêk dawngtute.”
^ A nih loh leh, “a vaia ṭha taka zawm kim vek i duh tak zet chuan.”
^ A nih loh leh, “siamtharnaah.”
