Matthaia Ziak 22:1-46
22 Isua chuan tehkhin thute hmangin a zirtîr leh a:
2 “Vân Ram chu lal pakhat a fapa tâna inneih ruai buatsaihtu nên tehkhin theih a ni.
3 Ani chuan, inneih ruai ṭheh tûra a sâwmte ko tûrin a chhiahhlawhte a tîr a; nimahsela, an lo kal duh lo va.
4 A chhiahhlawh dangte a tîr leh a, an hnênah, ‘Ka mi sâwmte hnênah khân, “En teh u! Ruai chu ka peih ta, ka bâwngpate leh ran châwm thaute ka talh a, engkim peih a ni tawh e. Ruai ṭheh tûrin lo kal rawh u,” ti rawh u,’ a ti a.
5 Mahse, anni chuan an lo ngaihsak lo va, pakhat a lovah a feh a, pakhat a sumdâwnnaah a kal a,
6 mi dangte chuan a chhiahhlawhte chu an man a, zahthlâk taka siamin an tihlum a.
7 “Lal chu a thinrim hle a, chûng tualthattute tihlum tûr leh an khua hâl tûrin a sipaite a tîr ta a.
8 Tichuan, a chhiahhlawhte hnênah, ‘Ruai chu peih a ni ta; nimahsela, ka mi sâwm tâkte kha chu tel tlâk an ni lo.
9 Chutichuan, kawngpuiahte kal ula, in hmuh apiang chu ruai ṭhehnaa lo tel tûrin sâwm rawh u,’ a ti a.
10 A sawi ang chuan chhiahhlawhte chu an kal chhuak a, an hmuh apiang, mi sual leh mi ṭhate chu an sâwm ta vek a; tin, ruai ṭhehna hmun chu ruai kîltutein a lo khat ta a.
11 “Tichuan, lal chu a mi sâwmte en tûrin a lo kal a, inneihna silhfên inbel lo mi pakhat a va hmu a.
12 A hnênah, ‘Ṭhianpa, engvângin nge inneihna silhfên inbel lova hetah hian i lo luh?’ a ti a. Ani chuan chhân ngaihna rêng a hre lo va.
13 Tin, lal chuan a chhiahhlawhte hnênah, ‘A kut leh a kê phuar ula, pâwn khaw thimah paih chhuak rawh u. Chutah chuan ṭap leh ha ṭhialin a awm ang,’ tiin a hrilh a.
14 “Sâwmte chu tam tak ni mah se, thlante erawh chu tlêm tê chauh an ni,” a ti a.
15 Tin, Pharisaite chu an kal a, thu an sawi sualtîr theih nân Isua chu an phiarru ta a.
16 Tichuan, an zirtîrte chu Heroda pâwla mite nên Isua hnênah an tîr a: “Zirtîrtu, mi dik tak i ni tih kan hria a, Pathian chungchâng thutak i zirtîr tih pawh kan hre bawk. Mi duhsak bîk i nei lo va, mi dangte duhsak hlawh i tum hek lo.
17 Engtin nge i ngaih min han hrilh teh, Kaisara hnêna chhiah chawi hi a thiang* nge thiang lo?” an ti a.
18 Nimahsela, Isua’n an suahsualzia a hriatin: “Mi vervêkte u, engvângin nge min fiah?
19 Chhiah tangka min han hmuh teh u,” a ti a. Tichuan, denarii* khat an rawn lâk a.
20 Ani chuan an hnênah: “Hei hi tu lem leh tu hming nge?” tiin a zâwt a.
21 Anni chuan: “Kaisara,” tiin an chhâng a. Tichuan, an hnênah: “A nih ahnu, Kaisara thilte chu Kaisara hnênah pe ula, Pathian thilte chu Pathian hnênah pe ta che u,” a ti a.
22 A thusawi an han hriat chuan mak an ti hle a, ani chu an kalsan ta a.
23 Chumi nî chuan thawhlehna a awm lo titu Saddukaite a hnênah an lo kal a:
24 “Zirtîrtu, Mosia’n: ‘Mipa tu pawh fa nei lova a thih chuan a unaupain a nupui chu a nei ang a, a unaupa tân fate a neihsak tûr a ni,’ tiin a sawi a.
25 Aw le, kan zîngah unau mipa pasarih an awm a. A upa ber chuan nupui a nei a, fa nei lovin a thi a, a nupui chu a unaupain a nei ta a.
26 A pahnihna pawh chu fa nei lovin a thi ve leh a, a pathumna aṭanga a pasarihna thlengin chutiang chuan an chungah a thleng a ni.
27 A tâwpah hmeichhia pawh chu a thi ta a.
28 A nih chuan, an thawhleh hunah an pasarih zînga tu nupui ber nge ni ta ang? An vaiin nupuiah an nei ṭheuh si a,” tiin an zâwt a.
29 Isua’n an hnênah: “Pathian Lehkha Thu leh Pathian thiltihtheihna in hriatthiam loh avângin in hre sual a ni.
30 Thawhlehnaah chuan nupui pasal an innei tawh lo vang a, vâna vântirhkohte ang an ni tawh zâwk ang.
31 Mitthi thawhlehna chungchânga in tâna Pathian thusawi hi in chhiar lo vem ni?
32 ‘Kei hi Abrahama Pathian, Isaaka Pathian leh, Jakoba Pathian ka ni,’ tih hi. Ani chu mitthi Pathian a ni lo va, mi nung Pathian a ni zâwk,” a ti a.
33 Chu thu an hriat chuan mipuite chuan a zirtîrna chu mak an ti hle a.
34 Saddukaite’n Isua an chhâng thei lo tih an hriat hnuah, Pharisaite chu an lo kal khâwm a.
35 An zînga pakhat Dân hre takin amah fiah nân:
36 “Zirtîrtu, Dân thu-ah eng thupêk hi nge ropui ber?” tiin a zâwt a.
37 Isua’n a hnênah: “‘I Pathian Jehova chu i thinlung zawng zawngin, i thlarau* zawng zawngin, i rilru zawng zawngin i hmangaih tûr a ni,’ tih hi.
38 Chu chu thupêk ropui ber leh hmasa ber a ni.
39 A dawttu, a anpui chu hei hi a ni: ‘Nangmah i inhmangaih angin i vêngte pawh i hmangaih tûr a ni,’ tih hi.
40 Hêng thupêk pahnihah hian Dân leh zâwlneite thu zawng zawng a inkhai khâwm vek a ni,” a ti a.
41 Tin, Pharisaite an kal khâwm laiin Isua’n an hnênah:
42 “Krista chungchâng hi engtin nge in ngaih? Tu fapa nge ni?” a ti a. Anni chuan: “Davida fapa,” an ti a.
43 Ani chuan: “A nih leh, engvângin nge Davida’n thlarau thianghlim thâwk khuma ani chu Lalpa tia kovin,
44 ‘Jehova’n ka Lalpa hnênah: “I hmêlmate i ke hnuaia ka dah hma loh zawng ka ding lamah ṭhu rawh,” tia a sawi?’
45 Davida’n Lalpa tia a kohva chu engtin nge a fapa a nih theih ang?” tiin a zâwt a.
46 Anni chuan ṭawngkam khat mahin an chhâng thei lo va, chumi nî aṭang chuan tu man eng mah an zâwt ngam tawh lo.
Footnote-te
^ A nih loh leh, “dik.”
^ Denarii khat hi hnathawktu ni khat hlawh nên a intluk.
^ Thu Har Hrilhfiahna en rawh.
