Matthaia Ziak 25:1-46
25 “Tin, vân Ram chu nula thianghlim sâwm, an khâwnvârte kenga mopa* hmuak tûra kal chhuakte nên tehkhin theih a ni a.
2 Pangate chu an â a, panga dangte erawh chu an fing thung.
3 A âte chuan an khâwnvârte keng mah se, a tui erawh an keng tel lo va.
4 A fingte erawh chuan an khâwnvârte bâkah, ûmin khâwnvârtui an keng tel thung a ni.
5 Mopa chu a lo thlen har avângin, an vaiin an mut a chhuak a, an lo muhîl a.
6 Tin, zan laiah chuan: ‘Mopa a lo thleng ta! A hmuak tûrin lo chhuak r’u,’ tia au thâwm a lo awm a.
7 Tichuan, nula thianghlim sâwmte chu an tho va, an khâwnvârte an buatsaih a.
8 A âte chuan a fingate hnênah, ‘In khâwnvârtui kha min sem ve rawh u, kan khâwnvârte a thi dâwn e,’ an ti a.
9 A fingate chuan: ‘Kan tân leh in tân a daih lo palh ang e. A zuartu hnênah kal ula, va lei ve zâwk rawh u,’ tiin an chhâng a.
10 Lei tûra an kal hlânin mopa chu a lo thleng a. Nula thianghlim inpeihsate chu mopa rualin inneih ruai kîl tûrin an lût a; tichuan, kawngkâ chu khâr a ni ta a.
11 A hnuah nula thianghlim dangte pawh chu an lo thleng a, ‘Ka pu, ka pu, kawngkâ min hawn rawh!’ an ti a.
12 Ani erawh chuan, ‘Ka hre ngai hauh lo va che u,’ tiin a chhâng a.
13 “Chutichuan, inring rengin awm rawh u, a ni leh a dârkâr chu in hre si lo.
14 “Tin, vân Ram chu mi pakhat hla taka zin tûrin a bâwihte ko khâwm a, an hnêna a thil neihte a kawltîr ang chu a ni leh a.
15 An tihtheih tâwk tûr ang zêlin bâwih pakhat hnênah talent* nga, a dang hnênah talent hnih, a dang leh hnênah talent khat a pe a; tichuan, a zin chhuak ta a.
16 Talent nga dawngtu chu a talent dawn hmang chuan a va sumdâwng ta nghâl a, talent nga dang a va thawk chhuak a.
17 Chutiang bawkin, talent hnih dawngtu chuan talent hnih dang a va thawk chhuak ve bawk a.
18 Nimahsela, talent khat lek dawngtu bâwih chu a kal chhuak a, a pu sum chu a phûm ta a.
19 “Hun rei tak hnuah chuan chûng bâwihte pu chu a lo haw a, anni chu a sum chungchâng a tihfelpui a.
20 Tichuan, talent nga dawngtu chu lo kalin, talent nga dang a rawn ken belh a, ani chuan, ‘Ka pu, en teh! Talent nga mi kawltîr khân talent nga dang ka thawk chhuak asin,’ a ti a.
21 A pu chuan a hnênah: ‘Bâwih ṭha leh rinawm, i ti ṭha e! Tlêm tê chungah i rinawm a. Tam tak chunga hotuah ka ruat ang che. I pu lâwmnaah lût rawh,’ a ti a.
22 A dawtah, talent hnih dawngtu chu a lo kal a, ani chuan, ‘Ka pu, en teh! Talent hnih mi kawltîr khân talent hnih dang ka thawk chhuak asin,’ a ti a.
23 A pu chuan a hnênah: ‘Bâwih ṭha leh rinawm, i ti ṭha e! Tlêm tê chungah i rinawm a. Tam tak chunga hotuah ka ruat ang che. I pu lâwmnaah lût rawh,’ a ti a.
24 “A tâwpah, talent khat dawngtu bâwih pawh chu a lo kal a, ani chuan: ‘Ka pu, mi khirh tak i ni tih ka hria, i tuh lohna hmunah pawh i seng a, i zah fai lohna hmuna mi pawh i la khâwm ṭhîn.
25 Tichuan, ka hlau che a, i talent kha leiah ka phûm a. Hei, i ta ngai chiah kha a ni e,’ a ti a.
26 A pu chuan a hnênah: ‘Bâwih sual leh thatchhe pa, ka tuh lohna hmunah ka seng a, ka zah fai lohna hmuna mi pawh ka la khâwm ṭhîn tih i hria maw?
27 Chuti a nih ahnu, ka sum chu a pung awma pûktîrtute* hnêna lo dah tawh tûr i ni; tichuan, ka lo haw hian a pung nên ka hmu leh tûr.
28 “‘Chuvângin, a talent khat kha lâksak ula, talent sâwm neitu hnênah khân pe rawh u.
29 Tu pawh, a nei apiang chu pêk belh a ni ang a; tichuan, tam tak a lo nei ang. Nimahsela, tu pawh, a nei lo apiang chu a neih chhun pawh lâksak a ni ang.
30 Chuvângin, bâwih thatchhia kha pâwn khaw thimah paih chhuak rawh u. Chutah chuan ṭap leh ha ṭhialin a awm ang.’
31 “Mihring Fapa hi a ropuina leh vântirhkoh zawng zawngte nêna a lo kal hun chuan, a ropuina lalṭhutthlêngah a ṭhu ang a.
32 Hnam zawng zawngte chu a hmaah an kal khâwm ang a, berâm vêngtuin kêl zîng ata berâmte a thliar hrang angin mite chu a thliar hrang ang.
33 Tichuan, berâmte chu a ding lamah a dah ang a, kêlte erawh chu a vei lamah a dah ang.
34 “Tin, Lalber chuan a ding lama mite chu: ‘Ka Pa malsâwmna dawngtute u, lo kal ula, mihringte* awm ṭan tirh ata in tâna buatsaih tawh Lalram chu luah rawh u.
35 Ka ril a ṭâmin ei tûr min pe a; ka tui a hâlin in tûr min pe a. Mikhual ka nihin min thleng a;
36 saruaka* ka awmin thawmhnaw min pe a. Ka dam lohvin min enkawl a. Tân ina ka awmin min tlawh a,’ tiin a la hrilh ang.
37 Tin, mi felte chuan: ‘Lalpa, engtikah nge rilṭâma kan hmuh chea ei tûr kan pêk che, tuihâla kan hmuh chea in tûr kan pêk che?
38 Engtikah nge mikhuala kan hmuh chea kan thlen che, saruaka kan hmuh chea thawmhnaw kan pêk che?
39 Engtikah nge dam lo leh tân ina kan hmuh chea kan kan che?’ tiin an la zâwt ang.
40 Lalber chuan an hnênah, ‘Tih tak meuhvin ka hrilh a che u, hêng ka unau tê berte zînga pakhat in ṭanpui chu kei mi ṭanpui in ni,’ tiin a la chhâng ang.
41 “Tin, a vei lama mite hnênah chuan: ‘Anchhe dawngte u, Diabola leh a vântirhkohte tâna buatsaih chatuan meiah chuan min kal bosan rawh u.
42 Ka ril a ṭâmin ei tûr min pe lo va; ka tui a hâlin in tûr min pe lo va.
43 Mikhual ka nihin min thleng lo va; saruaka ka awmin thawmhnaw min pe lo va; dam lo leh tân ina ka awmin min ṭanpui hek lo,’ a la ti ang.
44 Tin, anni chuan: ‘Lalpa, engtikah nge rilṭâmin emaw, tuihâlin emaw, mikhualin emaw, saruakin emaw, dam lovin emaw, tân ina i tâng lai emaw kan hmuh chea kan ṭanpui loh che?’ tiin an la zâwt ang a.
45 Ani erawh chuan: ‘Tih tak meuhvin ka hrilh a che u, hêng ka unau tê berte zînga pakhat in ṭanpui loh chu kei mi ṭanpui lo in ni,’ tiin a la chhâng ang.
46 Chûng mite chu chatuana tihboral an ni ang a, mi felte erawh chu chatuanin an nung ang,” tiin.
Footnote-te
^ A nih loh leh, “mo neitu.”
^ Talent hi pawisa a ni a, talent khat hi kg 20.4-a rit a ni.
^ A nih loh leh, “bank-a dah.”
^ Chu chu, Evi leh Adama thlahte tihna a ni.
^ A nih loh leh, “thawmhnaw hâk tûr mumal nei lo.”
