Matthaia Ziak 27:1-66
27 Tin, zîng a lo nih chuan, puithiam lalte leh vântlâng upa zawng zawngte chu Isua tihhlum a nih theih nân an inrâwn khâwm a.
2 A kut an phuar hnuin ram awptu Pilata hnênah an hruai a.
3 Tin, amah phatsantu Juda chuan Isua chu thi tûra a chungthu rêl a ni tih a hriatin a inchhîr ta hle a. Tangkaraw pawisa 30 chu puithiam lalte leh upate hnênah a rawn keng lêt leh a.
4 An hnênah: “Pawisawi lo ka phatsan kha ka tisual a ni,” a ti a. Anni erawh chuan: “Chu chu i buaina a ni. Kan buaina a ni lo ve!” an ti a.
5 Tichuan, tangkaraw pawisate chu biak inah chuan a paih lût a. Tin, a kal chhuak a, a va inâwkhlum ta a.
6 Puithiam lalte chuan tangkaraw pawisate chu an la a: “Biak ina sum dah khâwmna hmunah kan dah thei lo vang, thisen man a ni si a,” an ti a.
7 An inrâwn khâwm hnuin sum chu mikhualte thlânmuala hman tûrin bêlvawtu hmun lei nân an hmang ta a.
8 Chuvângin, chu hmun chu tûn thlengin “Thisen Hmun,” tia koh a ni ta a ni.
9 Tichuan, zâwlnei Jeremia hmanga lo sawi tawh kha a thleng famkim a ni: “Israel thlaha mi ṭhenkhatte’n a man atâna an lo chhiar tawh tangkaraw pawisa 30 chu an la a.
10 Jehova’n ka hnêna a sawi ang ngeiin, chu chuan bêlvawtu lo an lei ta a,” tih chu.
11 Isua chu Pilata hmaah a ding a, Pilata chuan: “Judate Lal i ni em?” tiin a zâwt a. Isua chuan: “I sawi ang ngei chu a ni e,” tiin a chhâng a.
12 Nimahsela, puithiam lalte leh upate’n an hêk lai erawh chuan engtin mah a chhâng lo.
13 Tin, Pilata chuan a hnênah: “An hêkna che zozai hi i hre lo vem ni?” a ti a.
14 Mahse, ani chuan ṭawngkam khat maha a chhân loh avângin, Pilata chuan mak a ti hle a.
15 Tin, Pilata chuan kalhlên kût apiangin mipuite chu mi tâng pakhat an duh apiang a chhuahsak ṭhîn a.
16 Chutih lai chu mi sual hmingthang tak Barabba tân ina an khung lai a ni.
17 Tichuan, mipui pung khâwmte hnênah Pilata’n: “Tu zâwk hi nge chhuahsak che u ila in duh, Barabba nge ni a, Krista an tih Isua hi?” a ti a.
18 An îtsîk avângin a hnênah an rawn hruai tih a hre si a.
19 Chu bâkah, rorêlna ṭhutthlênga a ṭhut laiin a nupui chuan: “Kha mi fel chungah khân eng mah ti suh, amah avângin vawiinah ka mumangah hrehawm tam tak ka tuar a ni,” tiin thu a rawn thawn a.
20 Nimahsela, puithiam lalte leh upate chuan Barabba chhuahsak tûr leh Isua erawh chu tihlum tûra ngên tûrin mipuite chu an hmin a.
21 Pilata chuan an hnênah: “An pahnihah hian tu nge chhuahsak che u ila in duh?” tiin a zâwt leh a. Anni chuan: “Barabba,” an ti a.
22 Pilata’n an hnênah: “A nih chuan, Krista an tih Isua hi engtin nge ka tih ang?” a ti a. An vaiin: “Banah khêngbet rawh,” an ti a.
23 Ani chuan: “Engvângin maw? Eng thil ṭha lo nge a tih?” a ti a. Nimahsela, anni chu: “Banah khêngbet rawh!” tiin nasa lehzualin an au zawm zêl a.
24 Pilata chuan tih theih eng mah a nei lo tih leh mipui au thâwm chu a nasa telh telh tih a hriat chuan tui a la a, an hmaah chuan a kut a sil a: “He pa thihnaah* hian mawhphurhna ka nei lo ve, nangmahni ngeiin a mawh in phur tûr a ni,” a ti a.
25 Tin, mipuite chuan: “Keini leh kan fate hian a thihna mawh chu kan phur ang e,”* tiin an chhâng a.
26 Tichuan, Barabba chu a chhuahsak a; nimahsela, Isua erawh chu vuaktîrin, bana tihhlum tûrin thu a pe a.
27 Tin, Pilata sipaite chuan Isua chu Pilata inah an hruai a, sipai zawng zawngte chuan ani chu an din hual a.
28 A thawmhnawte phelhsakin puan sen lâr an sintîr a.
29 Hlîng lukhum an phiar a, chu chu khumtîrin a kut ding lamah tiang an kentîr a. A hmaah ṭhingṭhiin: “Chibai, Judate Lal!” tiin nuihza siam nân an hmang a.
30 Tin, chil an chhâk a, a tiang ken chu lâksakin a lu-ah an vua a.
31 Tichuan, nuihza siam nâna an hman hnuah, a puan sin chu an hlihsak a, a thawmhnawte chu hâktîr lehin, bana khenbeh tûrin an hruai ta a.
32 An kal chhuah laiin Kurini mi Simona an hmu a, ani chu Isua nghaisakna ban* an put luihtîr a.
33 Tichuan, Gol′go·tha an tih hmun chu an lo thleng a, chu chu Luruh Hmun tihna a ni.
34 Thil khâ* nêna pawlh uain chu a in atân an pe a; nimahsela, a tem hnuah a in duh ta lo va.
35 Bana an khenbeh hnuah ṭhum vâwrin a thawmhnawte an insem a.
36 Tin, amah vêngin chutah chuan an ṭhu a.
37 Amah an puhna: “Hei hi Isua, Judate Lal a ni,” tih inziak chu a lu chungah an târ bawk a.
38 Tichuan, a bulah suamhmang pahnih, pakhat a ding lamah, pakhat a vei lamah an khêngbet tel ve a.
39 Chu hmun kal pêltute chuan ani chu sawichhiain an lu an thin khum a:
40 “Nang, biak in ṭhiat a, ni thum chhûnga sa ṭha leh theia insawitu inchhandam ta che! Pathian fapa i nih chuan nghaisakna ban aṭang khân rawn chhuk rawh!” an ti a.
41 Chutiang bawkin, puithiam lal te, dân hre mi te leh, upate chuan ani chu nuihsawhin:
42 “Mi dangte a chhandam a, mahni a inchhandam thei si lo! Israel Lal a ni alâwm; tûnah hian nghaisakna ban* aṭang khian rawn chhuk sela; tichuan, amah hi kan ring ang.
43 Pathian a ring alâwm, tûnah hian a duh chuan amah hi rawn chhan chhuak rawh se; ‘Pathian Fapa ka ni,’ a ti si a,” an ti a.
44 Chutiang bawkin, a bula an khenbeh suamhmangte pawh chuan an deusawh ve a.
45 Tichuan, chhûn dâr sâwm pahnih* vêl aṭanga tlai lam dâr thum* vêl thlengin lei pum pui chu a lo thim ta vek a.
46 Tlai lam dâr thum vêlah Isua chu aw ring takin: “E′li, E′li, la′ma sa·bach·tha′ni?” tiin a au chhuak a. Chu chu, “Ka Pathian, ka Pathian, engati nge mi kalsan?” tihna a ni.
47 Tin, chumi an han hriat chuan chuta ding ṭhenkhat chuan: “He mi hian Elija a ko a ni,” an ti a.
48 An zînga pakhat chu rang takin a tlân a, sponge* a la a, uain thûrah a chiah a, tiangah târin a in atân a pe a.
49 Mi dang zawngte erawh chuan: “Tikhian awmtîr mai mai rawh u. Amah chhandam tûrin Elija a lo kal nge kal lo kan en ang chu!” an ti a.
50 Isua chu ring takin a au leh a; tichuan, a thi* ta a.
51 Tin, ngai teh u! Biak ina puanzâr chu a chung lam aṭanga a hnuai lam thlengin a lo thlêr chhuak a, lîrte a nghîng a, lungpuite a keh bawk a.
52 Tichuan, thlânte* a lo inhawng a, mi thianghlim thi tawh tam takte ruang chu hmuh theihin a lo awm ta a,
53 chu chu mi tam takin an hmu a. (Isua a thawhleh hnuah hriatrengna thlâna va kalte chu khaw thianghlimah* an lût a.)
54 Tin, sipai za hotu leh Isua vêngtute chuan lîrnghîng leh thilthlengte chu an hmuhin an hlau ta hle a: “He mi hi Pathian Fapa a ni chiang mai,” an ti a.
55 Chu bâkah, hla tak aṭangin hmeichhe tam takin an thlîr bawk a, anni chu Isua’n Galili a chhuahsan laia a rawngbâwlsak tûra zuitute an ni a.
56 An zîngah chuan Mari Magdalini te, Jakoba leh Josea nu Mari te leh, Zebedaia fapate nute an tel a ni.
57 Tin, tlai lamah chuan Arimathai khuaa mi hausa tak Josefa, Isua zirtîr ni bawk chu a lo kal a.
58 Ani chuan Pilata hnênah Isua ruang chu a dîl a. Tin, Pilata chuan sipaite chu Josefa hnêna ruang pe tûrin thu a pe a.
59 Josefa chuan ruang chu a la a, puan zai sîn fai takin a tuam a.
60 A thlân* thar, lung a kerkuakah chuan a zalh a, lung lian taka thlân kawngkâ a khâr hnuah a kal ta a.
61 Nimahsela, Mari Magdalini leh Mari* chu chutah chuan an la awm reng a, thlân hmaah chuan an ṭhu a.
62 A tûk, Sabbath Nîah* chuan puithiam lalte leh Pharisaite chu Pilata hmaah an kal khâwm a.
63 A hnênah: “Ka pu, kha dâwt sawi hmang khân a dam laiin, ‘Ni thum hnuah ka tho leh ang,’ tia a sawi kan hria a.
64 Chuvângin, a zirtîrte’n a ruang an rûk loh nân, thlân chu ni thum nî thlenga vêng tûrin thu pe rawh. Chuti lo chuan, mite hnênah, ‘Thihna aṭangin a tho leh ta!’ tiin an sawi ang a; tichuan, dâwt hnuhnûng zâwk chu a hmasa ai khân a ṭha lo zâwk ang,” an ti a.
65 Pilata chuan an hnênah: “Vêngtu sipaite in nei alâwm. Kal ula, a him thei ang bera in hriat dân chuan va vêntîr ta che u,” a ti a.
66 Tichuan, an kal a, lungah chuan chhinchhiahna siamin thlân chu ṭha takin an vêntîr ta a.
Footnote-te
^ A ngial a ngan chuan, “thisen.”
^ A ngial a ngan chuan, “a thisen mawh chu keimahni leh kan fate chungah tla rawh se.”
^ Thu Har Hrilhfiahna en rawh.
^ Thil tui kha tak.
^ Thu Har Hrilhfiahna en rawh.
^ A ngial a ngan chuan, “a dârkâr rukna vêl.” Chu chu ni chhuah aṭanga chhiar ṭan a ni.
^ A ngial a ngan chuan, “a dârkâr kuana vêl.” Chu chu ni chhuah aṭanga chhiar ṭan a ni.
^ Awmpâwng anga thil tuirîl hîp thei.
^ A ngial a ngan chuan, “a thlarau a thlah.”
^ A nih loh leh, “hriatrengna thlânte.”
^ Chu chu, Jerusalem a ni.
^ A nih loh leh, “hriatrengna thlân.”
^ Jakoba leh Josea nu.
^ A ngial a ngan chuan, “Inbuatsaihna zawh hnu.”
