Matthaia Ziak 28:1-20
28 Sabbath zawh chawlhkâra a ni hmasa ber khawvâr dâwnah chuan, Mari Magdalini leh Mari* chu thlân en tûrin an kal a.
2 Tin, ngai teh u! Lîr nasa takin a lo nghîng a, Jehova vântirhkoh vân aṭangin a rawn chhuk a; tichuan, lung chu lum sawnin, a chungah chuan a ṭhu a.
3 A hmêl chu kâwlphê ang mai a ni a, a thawmhnaw chu vûr angin a vâr a.
4 Vêngtute chuan ani chu an hlauh êm avângin an khûr a, an thidang ta a.
5 Nimahsela, vântirhkoh chuan hmeichhiate hnênah chuan: “Hlau suh u, bana an tihhlum tâk Isua kha in zawng tih ka hria e.
6 Ani chu hetah a awm lo, a sawi ang ngei khân a tho leh tawh. Lo kal ula, amah an zalhna hmun hi rawn en teh u.
7 Tin, hmanhmawh takin kal ula, a zirtîrte hnênah thihna ata a thawhleh tawh thu va hrilh ang che u. Ngai teh u! Galili lam panin in hmaah a kal mêk e. Chutah chuan ani chu in hmu ang. He thu hrilh tûr che u hian tirh ka ni,” a ti a.
8 Tichuan, hriatrengna thlân aṭang chuan an kal nghâl a, hlau leh lâwm êm êm chungin a zirtîrte hrilh tûrin an tlân ta a.
9 Tin, ngai teh u! Isua’n anni chu a hmuhin an hnênah: “Chibai u!” a ti a. Anni chuan an va pan a, a ke vuanin bawkkhupin chibai an bûk a.
10 Tin, Isua’n an hnênah: “Hlau suh u! Kal ula, Galili rama kal tûrin ka unaute chu va hrilh ula, chutah chuan min hmu ang,” a ti a.
11 Kawnga an la kal lai mêk chuan, vêngtute zînga ṭhenkhat chu khawpuiah an lût a, thilthleng zawng zawng chu puithiam lalte hnênah an va hrilh a.
12 Tin, puithiam lalte chu upate nêna inhmu khâwma an inrâwn khâwm zawhin, sipaite hnênah chuan tangkaraw pawisa tam tham tak an pe a.
13 Anni chuan: “‘Zânah a zirtîrte an lo kal a, kan muthilh hlânin a ruang chu an ru ta a ni,’ ti ang che u.
14 Pilata’n a lo hria a nih pawhin, thil awmzia chu kan hrilhfiah mai ang, lungngai duh suh u,” an ti a.
15 Tichuan, tangkaraw pawisa chu lain, hrilh an nih ang chuan an ti a. Tin, chu thu chu vawiin nî thleng hian Judate zîngah an la sawi huai huai a ni.
16 Tichuan, zirtîr 11-te chu Galili rama Isua’n amah an hmuhna tûra a sawi tlângah chuan an kal a.
17 Amah an hmuh chuan bawkkhupin chibai an bûk a; nimahsela, an zînga ṭhenkhat chuan an ringhlel a.
18 Isua’n anni chu rawn panin, an hnênah: “Lei leh vâna thuneihna zawng zawng ka hnênah pêk a ni tawh.
19 Chuvângin, kal ula, hnam zawng zawnga mite chu zirtîrahte siam ula, Pa leh Fapa leh thlarau thianghlim hmingin baptis ula,
20 thu ka pêk zawng zawng che u hi pawma zâwm tûrin zirtîr ang che u. Ngai teh u! Englai pawhin, khawvêl* tâwp thlengin in hnênah ka awm zêl ang,” a ti a.
