Matthaia Ziak 5:1-48
5 Tichuan, mipui tam tak a hmuhin tlângah a kal chho va; a ṭhu a, a zirtîrte a hnênah an lo kal a.
2 Tin, thu sawiin anni chu heti hian a zirtîr ṭan ta a:
3 “Pathian kaihhruaina mamawh nia inhriate chu an hlim e, vân Ram an ta a ni si a.
4 “Lungngaite chu an hlim e, thlamuan an la ni dâwn si a.
5 “Thuhnuairawlhte chu an hlim e, lei hi an la rochung dâwn si a.
6 “Felnaa rilṭâma tuihâlte chu an hlim e, an la tlai dâwn si a.
7 “Zahngai thei takte chu an hlim e, an chungah zahngaihna lantîr a la ni dâwn si a.
8 “Thinlunga thianghlimte chu an hlim e, Pathian an la hmu dâwn si a.
9 “Remna siamtute* chu an hlim e, Pathian fate* tia koh an la ni dâwn si a.
10 “Felna avânga tihduhdah tuar tawhte chu an hlim e, vân Ram an ta a ni si a.
11 “Mite’n keimah avânga an sawichhiat che u a, an tihduhdah che u a, dâwt tinrênga an puh hunah che u hlim rawh u.
12 Vânah lâwmman ropui tak in neih avângin lâwm ula, nasa takin hlim rawh u; chutiang bawkin, in hmaa zâwlneite pawh an tihduhdah ṭhin kha.
13 “Lei chi in ni e; nimahsela, chi hi a dâk tawh chuan engtin nge an tihal leh theih ang? Mite rah atâna paih chhuah mai loh chu ṭangkaina rêng a nei tawh lo.
14 “Khawvêl êng in ni e. Tlâng chunga khaw awm chu thuhrûk theih a ni lo.
15 Mite’n khâwnvâr chhîin an khuh bo ngai lo, in chhûng zawng zawng a ên theih nân a dahna hmunah an dah zâwk ṭhîn.
16 Chutiang bawkin, in êng chu mi hmuhin êng rawh se; chutichuan, in thil ṭha tihte an hmu ang a, in Pa vâna mi an chawimawi thei ang.
17 “Dân thu emaw, Zâwlneite zirtîrna emaw tibâng tûra lo kalah min ngai suh u. Tibâng tûr ni lovin, tifamkim tûr zâwka lo kal ka ni.
18 Tih tak meuhvin ka hrilh a che u, Dân thua inziak zawng zawng a thlen famkim vek dâwn avângin, a chhûnga thu mal pakhat emaw, chhut han pakhat lek emaw pawh a boral ai chuan lei leh vân a boral zâwk ang.
19 Chuvângin, hêng thupêkte zînga pakhat tê pawh bawhchhia a, mi dangte pawh bawhchhe ve tûra zirtîr apiang chu vân Rama lût tlâk a ni lo vang a.* Nimahsela, hêng thupêkte zâwm a, mi dangte pawh zâwm tûra zirtîr apiang chu vân Ramah a lût ang.*
20 Ka hrilh a che u, dân hre mite leh Pharisaite aia in fel zâwk loh chuan vân Ramah in lût tawp lo vang.
21 “Hmân laia mite chu: ‘Tual i that tûr a ni lo, tualthat apiang chu rorêlna inah a chung thu rêlsak a ni ang,’ tia hrilh an ni ṭhîn tih in hre tawh e.
22 Nimahsela, kei erawh chuan ka hrilh a che u, tu pawh a unau chunga thinurna pai reng apiang chu rorêlna inah a chung thu rêlsak a ni ang a; tu pawh a unau mi tlâk tlai lo anga chhuah apiang chu Rorêlna Sâng Berah* a chung thu rêlsak a ni ang; tu pawh a unau, ‘Nang mi â!’ tia ko apiang chu Gehenna* meiah paih a ni bawk ang.
23 “Tin, maichâma thilpêk hlân tûra i kal laiin, i unauvin i chungah lungnih lohna a nei tih i hriat chhuah chuan,
24 maichâm hmaah i thilpêk chu hnutchhiahin kal la. I unau chu rem hmasa phawt la; tichuan, i thilpêk chu rawn hlân ang che.
25 “I laka thubuai theh lûttu nêna rorêlna in in pan laiin, ani chu rem tum vat rawh. Chuti lo chuan, ani chuan engtin emaw takin rorêltu kutah a pe che ang a, rorêltu chuan tân in hotu kutah pe chein, tân in hotu chuan tân inah a khung mai ang che.
26 Tih tak meuhvin ka hrilh a che, pawisa thîr pakhat* lek pawh i pêk kim loh chuan, chuta ṭang chuan i chhuak tawp lo vang.
27 “‘I uirê tûr a ni lo,’ an tih in hre tawh e.
28 Nimahsela, kei erawh chuan ka hrilh a che u, mutpui châkna neia hmeichhia en reng apiang chu a thinlungah a uirê tawh reng a ni.
29 I mit ding lamin a tihtlûk che chuan kher chhuak la, paih daih rawh. I taksa pum Gehenna-a* paiha a awm ai chuan, i taksa pêng pakhat chân chu i tân a ṭha zâwk e.
30 Tin, i kut ding lamin a tihtlûk che chuan tan la, paih daih rawh. I taksa pum Gehenna-a* paiha a awm ai chuan, i taksa pêng pakhat chân chu i tân a ṭha zâwk e.
31 “Chu bâkah: ‘Tu pawh a nupui ṭhen chuan a hnênah ṭhenna lehkha pe rawh se,’ tiin an sawi bawk ṭhîn.
32 Amaherawhchu, kei chuan ka hrilh a che u, nungchang bawlhhlawhnaa* a inhman vâng ni lova nupui ṭhen apiang chuan a nupui chu uirêah a chhuah a ni; tin, chutianga a ṭhen tâk hmeichhia nei apiang chu a uirê a ni.
33 “Hmân laia mite chu: ‘I chhechham i bawh pelh tûr a ni lo va, Jehova hnêna i thutiamte chu i hlen ngei tûr a ni,’ tia hrilh an ni ṭhîn tih in hre tawh e.
34 Nimahsela, kei chuan ka hrilh a che u: Chhia rêng rêng chham suh u, vân chhâlin chham suh u, chu chu Pathian lalṭhutphah a ni si a;
35 lei chhâl pawhin chham suh u, chu chu a ke nghahchhan a ni si a; Jerusalem chhâlin chham hek suh u, chu chu Lal ropui tak awmna khawpui a ni si a.
36 In nunna* chhâlin chhia chham suh u, in samzai khat pawh in tivârin, in tidum thei si lo.
37 In thusawi chu ‘A Ni’ chu ni, ‘Ni Lo’ chu ni lo ni ngawt rawh se, chumi piah lam chu Diabola aṭanga chhuak a ni.
38 “‘Mit aiah mit, hâ aiah hâ,’ tia an sawi in hre tawh e.
39 Nimahsela, ka hrilh a che u: Mi sual chu bei lêt suh ula, in biang ding lam bêngtu hnênah chuan a lehlam pawh dawh rawh u.
40 Tin, miin i kawr a duh avânga rorêlna ina hruai che a tum a nih chuan, i kawrchung pawh pe rawh.
41 Tin, thuneitu tu emawin a ruala mêl khat kal tûra a tihluih che chuan mêl hnih kalpui ang che.
42 Miin thil a dîl che chuan pe la, i hnêna thil pûk* a dîl che chuan hawisan suh.
43 “‘I vêngte i hmangaih tûr a ni a, i hmêlma i haw tûr a ni,’ tia an sawi in hre tawh e.
44 Kei erawh chuan ka hrilh a che u: In hmêlmate chu hmangaih zawm zêl ula, a tiduhdahtu che u chu ṭawngṭaisak zawm zêl ang che u.
45 Tichuan, in Pa vâna mi fate* in ni tih in lantîr thei ang; ani chuan mi sualte leh mi ṭhate chungah nî a chhuahtîrin, mi felte leh fel lote chungah pawh ruah a sûrtîr si a.
46 Nangmahni hmangaihtute chauh in hmangaih lêt hian eng malsâwmna nge in dawn chuan bîk? Chhiahkhawntute pawhin chutiang chuan an ti ṭhîn lo vem ni?
47 In unaute chauh chibai in bûk hian eng nge in tih ṭhat chuan bîk? Hnam dangte pawhin chutiang chuan an ti ṭhîn lo vem ni?
48 In Pâ vâna mi a ṭha famkim ang bawkin, nangni pawh in ṭha famkim* tûr a ni.
Footnote-te
^ A nih loh leh, “remna duh mi.”
^ A ngial a ngan chuan, “fapate.”
^ A ngial a ngan chuan, “vân Ramah ‘mi tê ber,’ tia koh a ni ang.”
^ A ngial a ngan chuan, “vân Ramah ‘mi ropui tak,’ tia koh a ni ang.”
^ Chu chu, Judate Sanhedrin a ni.
^ Jerusalem khaw pâwna bawlhhlawh hâl ralna hmun a ni. Thu Har Hrilhfiahna en rawh.
^ A ngial a ngan chuan, “quadrans pakhat.”
^ Thu Har Hrilhfiahna en rawh.
^ Thu Har Hrilhfiahna en rawh.
^ Grik ṭawnga por·neiʹa. Thu Har Hrilhfiahna en rawh.
^ A ngial a ngan chuan, “lu.”
^ Chu chu, a pung awm lova pûk tihna a ni.
^ A ngial a ngan chuan, “fapate.”
^ Chuvângin, in Pa vâna mi lantîr hmangaihna ṭha famkim ang chu lantîr ve rawh u.
