Matthaia Ziak 7:1-29
7 “Sawisêl tawh suh u, sawisêla in awm loh nân.
2 In sawisêl ang bawkin sawisêl in ni ang a, mi dangte in tehsak ang bawkin tehsak in ni ang.
3 Engvângin nge mahni mita thing tlâwn* awm chu hmu si lovin, i unau mita hmawlh tê awm chu i va hmuh ni?
4 A nih leh, engtin nge i unau hnênah, ‘I mita hmawlh tê awm kha mi lâk chhuahtîr rawh,’ tia i sawih theih ang? I mitah ngei pawh thing tlâwn a awm reng si a.
5 Mi vervêk! I mita thing tlâwn awm kha la chhuak hmasa phawt rawh; tichuan, i unau mita hmawlh tê awm chu la chhuak tûrin fiah takin i hmu thei ang.
6 “Uite hnênah thil thianghlim pe suh ula, vawk hnênah pawh in tuikeplungte theh hek suh u; chuti lo chuan, an rap chhia ang a, rawn pan che uin na takin an hliam mai ang che u.
7 “Dîl zawm zêl rawh u; tichuan, pêk in ni ang; zawng zawm zêl rawh u; tichuan, in hmu ang; kik zawm zêl rawh u; tichuan, hawnsak in ni ang.
8 A dîl apiangte chuan an dawng ang a, a zawng apiangte chuan an hmu ang a, a kik apiangte chu hawnsak an ni ang.
9 A nih leh, in fate’n chhang dîl che u sela, lung in pe dâwn em ni?
10 A nih loh leh, sangha dîl che u sela, rûl in pe dâwn em ni?
11 Nangni mi sualte mahin in fate thil ṭha pêk nachâng in hriat chuan, in Pa vâna mi chuan a dîltute chu thil ṭha a va pe nasa dâwn êm!
12 “Chuvângin, miin in chunga an tih atâna in duh apiang chu mi chungah pawh in ti tûr a ni. Chu chu Dân leh Zâwlneite zirtîrna a ni rêng si a.
13 “Kawngka zîmah chuan lût rawh u, kawngka zau leh kawng zawh nuam chuan mite chu boralnaah a hruai a, chutah chuan mi tam tak an kal a ni.
14 Kawngka zîm leh kawng chêp tak erawh chuan mite chu nunnaah a hruai a, a hmutute pawh tlêm tê chauh an ni.
15 “In hnêna berâm vun sina lo kal zâwlnei derte lakah chuan fîmkhur rawh u, an chhûng lamah chuan chinghne koham takte an ni si a.
16 Anni chu an rah aṭangin in hria ang. Thinghlîngnei kûngah grêp an lo ngai em ni? Hnimhlîngneiah pawh theipui an lo ngai em ni?
17 Chutiang bawkin, thing ṭha apiangin rah ṭha a chhuah ṭhîn a, thing chhia erawh chu a rah chhe ṭhîn.
18 Thing ṭhain rah chhia a chhuah thei lo va, thing chhia lahin rah ṭha a chhuah thei hek lo.
19 Thing tin rah ṭha chhuah lo apiang chu an kit a, meiah an paih ṭhîn.
20 Chuvângin, anni chu an rahah in hre mai ang.
21 “‘Lalpa, Lalpa,’ tia min kotu zawng zawngte chu vân Ramah an lût vek lo vang a, ka Pa vâna mi duh zâwng titute chauh an lût ang.
22 Chumi nîah chuan mi tam takin: ‘Lalpa, Lalpa, i hmingin hrilh lâwkna thute kan sawiin, i hmingin ramhuaite kan hnawt chhuakin, i hmingin thil mak tam takte kan ti ṭhîn lo vem ni?’ tiin an la sawi ang.
23 Kei erawh chuan: ‘Nangni thil sual titute u, ka hre ngai lo a che u! Ka hnên ata kal bo rawh u!’ tiin anni chu ka la hrilh ang.
24 “Chutichuan, tu pawh hêng ka thusawite hria a, zâwm apiang chu mi fing, lungpui chunga in satu ang a ni ang.
25 Ruah nasa tak a lo sûr a, tui a lo lian a, thli na takin in chu a nuai a; nimahsela, lungpui chunga sak a nih avângin a chim lo.
26 Amaherawhchu, tu pawh hêng ka thusawite hria a, zâwm lo apiang chu mi â, ṭiauvut chunga in satu ang a ni ang.
27 Ruah nasa tak a lo sûr a, tui a lo lian a, chu in chu thli na takin a han nuai chuan a chim ta a, a chhe hneh hle a ni.”
28 Isua’n chûng zawng zawng chu a sawi zawhin mipuite chuan a zirtîr dân chu mak an ti hle a;
29 ani chuan dân hre mite ang ni lova thunei taka a zirtîr avângin.
Footnote-te
^ A nih loh leh, “khanchhuk.”
