Rom Khuaa Mite Hnêna Lehkhathawn 1:1-32
1 Paula, Isua Krista bâwih, tirhkoh ni tûra koh, Pathian chanchin ṭha hril tûra tihhrana chuan in tân he lehkhathawn hi a ziak a ni.
2 Chu chanchin ṭha chu hmân lai khân Pathianin a Thu Thianghlimahte a zâwlneite hmangin a lo tiam tawh a.
3 Chu chu a Fapa chungchânga chanchin ṭha a ni a, ani chu tisa dânah chuan Davida thlah* aṭanga lo piang tûr a ni.
4 Thihna ata kai tho tûra Pathianin a thlarau thianghlim thiltihtheihna a hman avângin, ani chu Pathian Fapa a ni tih a chiang hle—Isua Krista kan Lalpa chu.
5 Amah kal tlangin Pathianin a khawngaihna nasa tak kan chungah a lantîr a, Isua chuan rinna leh thuawihna lantîr tûr leh a hming chawimawi tûra hnam zawng zawnga mite ṭanpui tûrin tirhkohah min thlang a ni.
6 Chûng hnamte zîngah chuan nangni pawh Isua Krista ta ni tûra koh in ni.
7 Pathianin a hmangaih tak, mi thianghlim ni tûra koh, Rom khuaa awm zawng zawngte hnênah hei hi ka ziak a ni:
Pathian kan Pa leh Lalpa Isua Krista hnên aṭanga khawngaihna nasa tak leh thlamuanna* in hnênah awm rawh se.
8 A hmasain, khawvêl pum puiah in rinna chungchâng hi sawi a nih avângin, Isua Krista zârah nangmahni avângin ka Pathian hnênah lâwmthu ka sawi a ni.
9 A Fapa chungchâng chanchin ṭha puangin thinlung zawng zawngin Pathian rawng ka bâwl a, ka ṭawngṭainaahte in tân ka dîl reng ṭhîn tih aman min hriatpui a ni.
10 Pathian remtih zâwng a nih chuan, kawng eng emawti tala in hnêna ka lo kal theihna tûrin ka dîl ṭhîn.
11 Rinnaa in ngheh theih nâna thlarau lam thilpêk eng emaw ka pêk theihna tûr che uin hmuh che u ka châk hle a ni.
12 Chutiang chuan, in rinna leh ka rinnain kan intichak tawn thei ang.
13 Unaute u, in hnênah vawi tam tak lo kal ka tum ṭhîn tih in hriat ka duh a. Nimahsela, tûn thleng hian chu chu a theih si lo va, hnam dangte zînga ka hmuh angin in hnênah pawh kan thu hrilhna aṭanga rah chhuah ṭhate hmuh ka duh a ni.
14 Grik mite leh ram dang mite* bâkah, mi fingte leh mi fing lote hnênah pawh bat ka nei.
15 Chuvângin, nangni Rom khuaa mite hnênah pawh chanchin ṭha hrilh hi ka châk hle a ni.
16 Chanchin ṭha hi ka zahpui si lo. A nihna takah chuan, a ring apiangte tâna chhandamna a nih theihna tûrin Pathian thiltihtheihna a ni si a, a hmasain Judate tân a ni a, a hnuah Grik mite tân a ni leh a.
17 Pathian felna chu chanchin ṭha avânga rinna lantîrtute hnênah târ lan a ni a, chu chuan an rinna a tichak a ni. Pathian Lehkha Thua: “Mi fel chu a rinna avângin a nung ang,” tia a inziak ang khân.
18 Vâna awm Pathian chuan a thinurna chu thuawih lote leh mi fel lote chungah a tilang a, anni chuan mite’n thutak an hriat theih lohna tûrin thil fel lote an ti a ni.
19 An hnênah thil tam tak a hmuhtîr tawh avângin anni chuan Pathian an hre tûr a ni.
20 Mita hmuh theih loh a nihna,* a chatuan thiltihtheihna leh a Pathianzia chu khawvêl siam tirh ata a thil siamahte chuan chiang taka hmuh theih a ni si a; chuvângin, chhuanlam tûr an nei lo.
21 Pathian hre mah se, ani chu Pathian angin an chawimawi lo va, lâwmthu an hrilh hek lo. Eng mah ngaihtuah an nei lo va, an thinlung â tak chu a lo thim ta a.
22 Mi fingah inngai mah se, mi âah an lo chang ta zâwk a.
23 Chatuana nung reng* Pathian chawimawi aiin thi thei mihring te, sava te, ke pali nei nungcha te leh, leia bawkvâka kal chi rannungte lim chu an chawimawi ta zâwk a ni.
24 Chuvângin, Pathianin an thinlung châk zâwng thil bawlhhlawhte chu an tih a phalsak a; chutichuan, an taksate chu zahthlâk takin an siam ta a.
25 Pathian thutak aiin dâwt an ring a, Siamtu biak aiin thil siam biain a rawng an bâwl ta zâwk a. Nimahsela, Siamtu chu chatuana fak tlâk awm chhun a ni. Amen.
26 Chuvângin, Pathianin thunun loh an hur châkna ang anga an awm chu a phalsak a, an hmeichhiate pawh an pianpui nihna ang lovin an intidanglam si a.
27 Chu bâkah, an mipate pawhin dân pângngai anga hmeichhiate ngaizâwng lovin, an mipatpui an ît a, bawlhhlawh takin an khawsa a, an thil sual tih avânga hremna chu an phû ang ngeiin a kimin an hmu ang.
28 Pathian hriatna chu thil pawimawh lo anga an ngaih avângin, Pathian chuan an ngaihtuahna khaw lo takte chu ngaihtuah zawm zêl a phalsak a; chuvângin, an tih loh tûrte an ti a ni.
29 Anni chu fel lohna zawng zawng te, suahsualna zawng zawng te, duhâmna zawng zawng te leh, sualna zawng zawngtein an khat a; îtsîkna te, tualthahna te, inhauhna te, bumna te leh, mi dangte hrehawm tawrhtîr duhnatein an khat bawk a; mi rêl hmang te,*
30 sawichhiat hmang te, Pathian hawtu te, mi chaltlai te, mi chapo te, mi uangthuang te, thil ṭha lo ruahmantu te,* nu leh pa thuawih lo te,
31 hriatthiamna nei lo te, thutiam bawhchhetu te, hmangaihna pianpui nei lo te leh, zahna nei lote an ni.
32 Chûng mite chuan, chutiang titute chu thi tlâk an ni tih Pathian thupêk fel chu hre chiang hle mah se, an ti zawm zêl chauh pawh ni lovin, chutianga ti ve mi dangte pawh an pawmpui a ni.
Footnote-te
^ A ngial a ngan chuan, “chî.”
^ A nih loh leh, “remna.”
^ A nih loh leh, “Grik mi ni lote.” A ngial a ngan chuan, “hnam mâwlte.”
^ A nih loh leh, “a mizia.”
^ A nih loh leh, “thi ngai lo.”
^ A nih loh leh, “sê sêa thusawi hmangte.”
^ A nih loh leh, “thil hlauhawm hmu chhuaktute.”
