Rom Khuaa Mite Hnêna Lehkhathawn 10:1-21
10 Unaute u, ka thinlung duh zâwng leh Pathian hnêna ka dîl ber chu Israelte chhandama an awm theihna tûr hi a ni.
2 Pathian tân ṭhahnem an ngai tih ka hriatpui si a; nimahsela, hriatna dik nêna inmila ṭhahnemngai erawh an ni lo.
3 Pathian felna an hriat loh avângin mahni felna tihngheh an tum a, Pathian felnaah an intulût si lo.
4 Rinna lantîrtu zawng zawngte mi fel anga ngaih an nih theihna tûrin, Dân chu Krista hmanga tihtâwp a ni.
5 Mosia chuan Dân zawmna hmanga felna chungchângah: “Tu pawh Dân zâwmtu chu, Dân avâng chuan a nung ang,” tiin a ziak si a.
6 Rinna aṭanga lo awm felna erawh chuan heti hian a sawi a ni: “In rilruin, ‘Tu nge vânah lâwn ang?’ ti suh u. Chumi awmzia chu, ‘Krista hruai thla tûrin tu nge vânah lâwn ang?’ tihna a ni.
7 A nih loh leh, ‘Tu nge leilâwtah chhuk ang?’ ti hek suh u. Chumi awmzia chu, ‘Thihna aṭanga Krista hruai chho tûrin tu nge chhuk ang?’ tihna a ni.”
8 Nimahsela, Pathian Lehkha Thuin eng nge a sawi? “Thu chuan a hnaih che a ni; i kâah leh i thinlungah ngei a awm,” tiin a sawi. Chu chu, rinna “thu” an hrilh mêk hi a ni.
9 I kâin Isua chu Lalpa a ni tih vântlâng hmaa i puan chhuah a, Pathianin thihna ata a kai tho tih i thinlunga i rinzia i lantîr chuan chhandam i ni ang.
10 Miin mi fela ngaih a nih theih nân thinlunga a rinzia a lantîr ṭhîn a, chhandam a nih theih nân a kâin vântlâng hmaah a puang chhuak ṭhîn.
11 Pathian Lehkha Thuin: “Tu pawh amah ring apiang chu a beidawng lo vang,” tiin a sawi si a.
12 Juda mite leh Grik mite chu an danglam chuang si lo. Amah kotu zawng zawngte hnêna malsâwmna nasa tak pe ṭhîntu Lalpa chu an vaia Lalpa a ni si a.
13 “Tu pawh Jehova hming lam apiangte chu chhandam an ni ang,” tih a ni si a.
14 Nimahsela, amah an rin loh chuan, engtin nge a hming an lam ang? An hriat lohva chu engtin nge an rin ang? Thuhriltu awm lovin engtin nge an hriat ang?
15 Tirh an nih loh chuan engtin nge an hril ang? “Thil ṭha chanchin ṭha puangtute kê chu a va mawi êm!” tih ziak ang khân.
16 Nimahsela, chanchin ṭha chu an vaiin an awih vek lo. Isaia’n: “Jehova, kan thusawi tuin nge ring?” tiin a sawi si a.
17 Chutichuan, miin thu a hriat hnuah chauh rinna a nei ṭhîn a. Tu emawin Krista chungchâng a hril hian thu chu hriat a ni ṭhîn.
18 Amaherawhchu, heti hian ka zâwt a ni. Israelte’n chûng thute chu an hre lo vem ni? Hria e. A nihna takah chuan, “an thâwm chu lei pum puiah a thang chhuak a, an thuchah pawh kâwlkil thlengin a thang chhuak a ni.”
19 Heti hian ka han zâwt leh teh ang. Israelte chuan an hre thiam lo vem ni? A hmasain Mosia’n heti hian a sawi a ni: “Hnama sawi tham lohte ka thîktîr ang che u a, hnam â taka ngaihte avângin ka la tithinrim ang che u,” tiin.
20 Nimahsela, Isaia chuan huaisen taka Pathian thu puang chhuakin: “Min zawng lotute hmuhin ka awm a, min lam lotute hnênah kan inhriattîr ṭhîn,” tiin a sawi a ni.
21 Amaherawhchu, Israel mite chungchângah heti hian a sawi a ni: “Thuawih lo leh luhlulte lamah ni lêngin ka bân ka phar ṭhîn,” tiin.
