Rom Khuaa Mite Hnêna Lehkhathawn 14:1-23
14 Rinnaa chak lo chu lo lâwm ula, a thlîr dân chu sawisêl suh u.
2 Rinna chak neitu chuan engkim a ei a; mahse, rinna chak lo erawh chuan thlai chauh a ei ṭhîn.
3 Engkim eitu chuan ei lotu chu ngainêp suh se, a ei lotu pawhin eitu chu sawisêl hek suh se, Pathianin ani chu a lâwm tawh si a.
4 Mi dang chhiahhlawh sawisêltu chu tu nge maw i nih le? A din leh a tlûk chu a pu thu thu a ni. Chuvângin, ani chu dintîr a la ni ang, Jehova’n a dintîr thei si a.
5 Mi pakhat chuan ni khat hi ni dang aiin a ngai pawimawh bîk a, mi dang erawh chuan nî zawng zawng hi inang ṭheuhvin a ngai thung; mi tin mahni rilruah inhre chiang rawh se.
6 Ni serhtu chuan Jehova chawimawi nân a serh ṭhîn a. Engkim eitu pawhin Jehova chawimawi nân a ei ṭhîn, a* hnênah lâwmthu a sawi si a; ei lotu chuan Jehova chawimawi nân a ei lo ṭhîn a; nimahsela, a* hnênah lâwmthu a sawi ṭhîn.
7 Kan zînga tu mah hi mahni tâna nung kan ni lo va, tu mah mahni tâna thi kan ni hek lo.
8 Kan nun chuan Jehova tân kan nung a, kan thih pawhin Jehova tân kan thi a ni. Chuvângin, kan nun pawhin kan thih pawhin Jehova ta kan ni.
9 Chumi avâng chuan, mitthite leh mi nungte Lalpa a nih theihna tûrin Krista chu a thi a, a lo nung leh ta a ni.
10 Nimahsela, engvângin nge i unau i sawisêl? A nih loh leh, engvângin nge i unau i ngaihnêp? Pathian rorêlna ṭhutphah hmaah kan vaiin kan la ding vek dâwn si a.
11 “Jehova chuan, ‘Khûp tinrêng ka hmaah an ṭhingṭhi ang a, lei tinrêngin Pathian ka ni tih vântlâng hmaah an puang ang,’ a ti,” tih ziak a ni si a.
12 Kan vai hian Pathian hmaah mahni chanchin kan la sawi ṭheuh dâwn a ni.
13 Chuvângin, i insawisêl tawn tawh lo vang u; chu aiin, unau hmaah tlûkna emaw, dâlna emaw dah loh i tum tlat zâwk ang u.
14 Eng thil mah hi amah ngawt chuan a bawlhhlawh lo tih Lalpa Isuaah ka hriain ka ring tlat a ni; miin thil eng emaw thianghlim lova a ngaih chauhvin, chu chu ama tân a thianghlim lo ṭhîn.
15 I thil ei avânga i unau i tilungni lo a nih chuan, hmangaihna kawng i zawh tawh lo a ni. A thih ai Krista’n a thihsaka chu i thil eiin tiboral suh.
16 Chuvângin, thil ṭha nia i rin chu miin i chungchâng a ṭha lo zâwnga an sawina tûr a nih ai chuan ti suh.
17 Pathian Ram chu ei leh in chungchâng a ni si lo va, felna te, remna* te leh, thlarau thianghlima lâwmnate a ni zâwk e.
18 Chutiang kawnga Krista bâwih ni apiang chuan Pathian pawm a hlawhin, mite zah a hlawh ṭhîn.
19 Chuvâng chuan, remna thlentu thilte leh intihsâwt tawnna tûr thilte chu i ûm tlat ang u.
20 Ei tûr vâng maiin Pathian kut chhuak tichhe tawh suh u. Thil zawng zawng a thianghlim ngei mai; mahse, mi chu a thil eiin tlûkna a thlen dâwn a nih chuan chu chu a ṭha lo* a ni.
21 I unau tlûkna tûr a nih dâwn ai chuan sa ei loh te, uain in loh te leh, thil eng mah tih lohte a ṭha ber a ni.
22 I rinna neih chu Pathian mit hmuhah nunpui mai rawh. A thu tlûkna siam avânga a hnua rorêlsaka awm tûra insiam lo chu a hlim e.
23 Amaherawhchu, miin ringhlel chunga a ei chuan thiam loh a chang tawh a ni, rinna ṭanchhana a tih loh avângin. Eng pawh rinna ṭanchhan lova kan tih chu sual a ni.
Footnote-te
^ A ngial a ngan chuan, “Pathian.”
^ A ngial a ngan chuan, “Pathian.”
^ A nih loh leh, “thlamuanna.”
^ A nih loh leh, “a dik lo.”
