Rom Khuaa Mite Hnêna Lehkhathawn 15:1-33
15 Chutichuan, keini mi chakte hian mahni lâwmna zawng lovin, mi chak lote chu an chak lohnaah kan ṭanpui tûr a ni.
2 Mi tinin mahni vêngte tihlâwm nân leh tihchak nân thil ṭha tih i tum ṭheuh vang u.
3 Krista pawh khân mahni lâwmna a zawng si lo. “Mite’n an sawi chhiatna che kha kei min sawi chhiat nân pawh an hmang ta,” tih ziak ang khân.
4 Hmân laia ziak zawng zawngte chu min zirtîr nâna ziah a ni a, chûng Pathian Lehkha Thu chuan chhel tûr leh thlamuanna nei tûra min ṭanpui avângin beiseina min pe a ni.
5 Chhelna leh thlamuanna petu Pathian chuan Krista Isua neih ang rilru put hmang neihtîr ve che u rawh se,
6 Pathian, kan Lalpa Isua Krista Pa chu thu khat vuaa in chawimawi theih nân.
7 Chuvângin, Pathian ropui nâna Krista’n a lâwm* che u ang bawk khân, nangni pawh inlâwm tawn rawh u.
8 Ka hrilh a che u, Pathian thutak avângin Krista chu serhtante rawngbâwltuah a lo ṭang a ni. An pi leh pute hnêna Pathian thutiam tinghet tûr leh,
9 hnam dangte pawhin Pathian chu a zahngaihna avânga an chawimawi theihna tûrin. Pathian Lehkha Thuin: “Chuvângin, hnam dangte zîngah ka chawimawi ang che a, i hming fakin ka zai ang,” tia a sawi ang khân.
10 Tin: “Nangni hnam dangte u, a mite nên lâwm rawh u,” tia sawi a ni leh a.
11 Tichuan: “Nangni hnam dang zawng zawngte u Jehova chu fak rawh u, mi zawng zawngin ani chu fak rawh se,” tih a ni bawk a.
12 Isaia pawhin: “Hnam dangte chunga rorêltu tûr Jesaia zung a lo awm ang a, amahah chuan hnam dangte’n an beiseina an nghat ang,” tiin a sawi bawk.
13 Thlarau thianghlim thiltihtheihna avânga in beiseina a lo ngheh lehzual theihna tûrin, beiseina petu Pathian chuan amah in rin avângin lâwmna leh remna* zawng zawngin tikhat che u rawh se.
14 Tin, ka unaute u, nangmahni ngei pawh ṭhatnaa khat a, hriatna zawng zawnga khatin in insiam ṭha* tawn thei tih ka ring tlat a ni.
15 Nimahsela, hriat nawntîrna atân thu ṭhenkhat chu fiah takin in tân ka ziak a, chûngte chu Pathianin ka chunga khawngaihna nasa tak a lantîr avânga hriat nawntîr che u ka ni.
16 Ani chuan hnam dangte hnêna Pathian chanchin ṭha ka hrilh theih nân Krista Isua chhiahhlawhah min thlang bawk a. Anni chu thlarau thianghlima tihthianghlim inthawina leh Pathian tilâwmtu inthawina an nih theihna tûrin he hna thianghlim hi ka thawk a ni.
17 Chuvângin, Pathianin hna min pêkah hian Krista Isuaah nasa taka lâwm chhan tûr ka nei a ni.
18 Ka thil tihte chungchâng eng mah ka sawi tawh lo vang; nimahsela, hnam dangte’n Krista an rin theihna tûra keimah kal tlanga Krista’n thil a tihte chungchâng chauh ka sawi tawh ang, chûngte chu ka thusawi leh thiltihte hmangin a ti si a.
19 Pathian thlarau hmanga thil makte leh thil ropui takte tih a nih avângin an lo awih ta a; chutiang chuan, Krista chanchin ṭha chu Jerusalem aṭanga Illurikon thlengin kim chang takin ka hril ta a ni.
20 Chuvângin, mi dang lungphûm chunga in ka sak lohna tûrin, Krista hming hriattîr a nih tawhna hmunah chuan chanchin ṭha hril loh ka tum tlat a ni:
21 “A chanchin la hrilh ngai lohte chuan an hria ang a, la hre ngai lote chuan an hre thiam ang,” tih ziak ang khân.
22 Chu chu in hnêna lo kal vawi tam tak ka ṭhulh chhan a ni bawk.
23 Tûnah erawh chuan, hêng ramahte hian thu hrilh lohna hmun ka nei tawh lo va, kum tam tak chhûng* in hnêna lo kal ka châk tawh bawk a.
24 Chuvângin, Spain lam pana ka zin chhuah hunah hmuh che u ka beisei a, eng emaw chen hun nuam tak kan hmanho phawt hnua ka kalna tûra min thlah ka beisei bawk a ni.
25 Tûnah erawh chuan, mi thianghlimte rawngbâwl tûrin Jerusalemah ka kal rih dâwn a ni.
26 Makedonia leh Akaia rama awmte chuan, Jerusalema mi thianghlimte zînga mi retheite tân phal takin thawhlâwm an thawh tawh si a.
27 Chûng unaute chuan an laka bat an neih avângin chutiang chuan phal takin an pe a ni; Jerusalema awm unaute chuan thlarau lam thilte an hnênah an pe ṭhîn si a. Chuvângin, an thil neihte hmanga Jerusalema awm unaute ṭanpui chu an ba rêng a ni.
28 Chu chu ka zawh fel a, an hnêna him taka thawhlâwm ka hlan hnuah, Spain ram ka pan pahin ka rawn tlawh ang che u.
29 Chu bâkah, in hnêna ka lo kal hunah chuan, Krista hnên aṭanga malsâwmna nasa tak nên ka lo kal ang tih ka hria.
30 Unaute u, kan Lalpa Isua Krista leh thlarau thianghlim hnên aṭanga lo kal hmangaihna avângin, Pathian hnêna ṭhahnemngai taka min ṭawngṭaipui tûrin ka ngên a che u,
31 Judai rama ring lotute laka ka him theihna tûr leh Jerusalema awm mi thianghlimte tâna ka rawngbâwlna hi pawm tlâk a nih theihna tûrin.
32 Chutichuan, Pathian duh zâwng anga lâwm taka in hnêna lo kalin kan infuih tawn thei ang.
33 Thlamuanna* petu Pathian chu in vaia hnênah awm rawh se. Amen.
Footnote-te
^ A nih loh leh, “pawm.”
^ A nih loh leh, “thlamuanna.”
^ A nih loh leh, “inzirtîr.”
^ Ni thei dang leh chu, “eng emawti chhûng.”
^ A nih loh leh, “remna.”
