Rom Khuaa Mite Hnêna Lehkhathawn 16:1-27
16 Kan unaunu Phoibi, Kenkriai khuaa kohhrana rawngbâwltu hi ka hmêlhriattîr a che u.
2 Khawngaihin mi thianghlimte angin Lalpaah chuan lo lâwm ula, a mamawh apiang lo pe ang che u, ani hi keimah leh mi dang tam tak humtu a ni si a.
3 Priskilli leh Akuila, Krista Isuaa ka hnathawhpuite kha chibai min bûksak ang che u.
4 Anni kha ka tâna nghâwng dawhtute an ni a, kei chauh ni lovin, hnam dang kohhran zawng zawngte pawh an chungah an lâwm a ni.
5 Chu bâkah, an ina inkhâwm kohhran pawh kha chibai min bûksak ang che u. Ka duh tak Epaineta, Asia rama Krista tâna rah hmasa ber kha chibai min bûksak ang che u.
6 In tâna thawkrim êm êm Mari kha chibai min bûksak ang che u.
7 Andronika leh Junia, ka chhûngkhat leh ka tânpui, tirhkohte zînga hming ṭha tak leh kei aia Krista hnung lo zui rei tawhte kha chibai min bûksak ang che u.
8 Lalpaa ka duh tak Amplia kha chibai min bûksak ang che u.
9 Kristaa ka hnathawhpui Urbana leh ka duh tak Stakua kha chibai min bûksak ang che u.
10 Krista duhsakna dawngtu Apellia kha chibai min bûksak ang che u. Aristobula leh a ina chêngte kha chibai min bûksak ang che u.
11 Ka chhûngkhat Herodiona kha chibai min bûksak ang che u. Lalpaa awm Narkissa leh a ina chêngte kha chibai min bûksak ang che u.
12 Truphaini leh Truphosi, Lalpaa thawkrim êm êmte kha chibai min bûksak ang che u. Kan duh tak Persi kha chibai min bûksak ang che u, Lalpaah a thawkrim si a.
13 Lalpa mi thlan Rufa leh a nu, ka nu ni ve bawk kha chibai min bûksak ang che u.
14 Asunkrita te, Phlegona te, Hermesa te, Patroba te, Herma te leh, an hnêna unau awmte kha chibai min bûksak ang che u.
15 Philologoa leh Juli te, Nerea leh a farnu te, Olumpa leh an hnêna mi thianghlim awm zawng zawngte kha chibai min bûksak ang che u.
16 Fawh thianghlimin chibai inbûk tawn rawh u. Krista kohhran zawng zawngte’n chibai an bûk a che u.
17 Unaute u, zirtîrna in dawn kalha inṭhen hranna leh tlûkna thlentute laka fîmkhur tûr leh, anni chu hawisan tûrin ka ngên a che u.
18 Chutiang mite chu kan Lalpa Krista bâwih an ni lo va, anmahni pum bâwih an ni zâwk. An ṭawngkam thiam leh fak derna thuin mi fing lote rilru an hruai kawi ṭhîn.
19 In thuawihzia chu mi zawng zawng hriat a nih tâk avângin in chungah ka lâwm a ni. Amaherawhchu, thil ṭha lama in fin a, thil ṭha lo laka in inthiar fihlîm ka duh a ni.
20 Tin, thlamuanna petu Pathian chuan Setana chu a rah perhtîr thuai ang che u. Kan Lalpa Isua khawngaihna nasa tak chu in hnênah awm rawh se.
21 Ka hnathawhpui Timothea leh ka chhûngkhat Lukia te, Jasona te leh, Sosipatera te’n chibai an bûk a che u.
22 Kei Tertia, he lehkhathawn ziahsaktu hian Lalpaah chibai ka bûk a che u.
23 Ka thlen in pa Gaia, a ina kohhran zawng zawng inkhâwm ṭhinna hian chibai a bûk a che u. Khawpui sum enkawltu Erasta leh a unaupa Kuarta te hian chibai an bûk a che u.
24 ——
25 Ka chanchin ṭha puan chhuah leh Isua Krista chungchâng thuchah hian Pathianin a tinghet thei che u tih a târ lang a. Chu chanchin ṭha chu Pathianin a puan chhuah tawh thurûk thianghlim hriatthiamna nên a inmil a ni. Chu thurûk chu hun rei tak chhûng thup a lo ni tawh a.
26 Nimahsela, tûnah chuan tihlan a lo ni ta a. Pathian Lehkha Thua hrilh lâwkna thute avângin chu thurûk thianghlim chungchâng chu hnam zawng zawngin an zir tawh a ni. Chu chu chatuana nung reng Pathian thupêk nên a inmil a. A duh zâwng chu hnam zawng zawngin amah an rin a, a thu an awih hi a ni.
27 Pathian fing awm chhun hnênah chuan Isua Krista avângin chatuana ropuina awm rawh se. Amen.
