Rom Khuaa Mite Hnêna Lehkhathawn 2:1-29
2 Chuvângin, aw mihring, tu pawh ni la, thiam chang thei i ni bîk hlei nêm; mi i sawisêlna ngei chu nangmah ngei pawhin i ti ve tho si a, mahni leh mahni thiam loh inchantîr mai i ni.
2 Chutiang thil titute chunga Pathian rorêlna chu thutak nên a inmil tih kan hria.
3 Nimahsela, aw mihring, chutiang thil titute sawisêl si a, nang pawhin i tih ve si chuan Pathian rorêlna chu i pumpelh bîk dâwn em ni?
4 A ngilneihna nasa tak leh tawrh theihna* leh dawhtheihna i chungah a lantîr hi i ngainêp em ni? Pathianin i sim theihna tûrin ngilnei takin ṭanpui che a tum tih i hre lo vem ni?
5 Nimahsela, i luhlulna leh i sim duh lohna avângin Pathian thinurna i chungah i khâwl khâwm a ni. Pathianin chu thinurna chu fel taka ro a rêl nîah a lan chhuahtîr ang.
6 Ani chuan mi tin an thiltih ang zêlin a rûl ang.
7 Thil ṭha ti fan fan a, ropuina te, chawimawina te leh, boral theih lohna zawngtute hnênah chuan chatuana nunna a pe ang.
8 Amaherawhchu, inhnialna chawk chhuaktute leh thutak zâwm lo va, fel lohna zâwmtute chungah chuan Pathian thinurna leh thinrimna a lo thleng ang.
9 Thil ṭha lo titu apiangte chungah chuan hrehawmna leh lungngaihna a awm ang a, Juda mite chungah a awm hmasa ang a, Grik mite chungah pawh a awm ang.
10 Nimahsela, thil ṭha titute chungah chuan ropuina te, chawimawina te, thlamuannate a awm ang, Juda mite chungah a awm hmasa ang a, Grik mite chungah pawh a awm bawk ang.
11 Pathianin mi duhsak bîk a nei si lo va.
12 Dân hre lova thil tisual zawng zawngte chu dân hre lovin an boral ang a, dân hre reng chung sia thil tisual zawng zawngte erawh chu dân anga rorêlsakin an awm ang.
13 Dân thu hretu maite chu Pathian hmaah mi fel an ni si lo, dân zâwmtute erawh chu Pathianin mi felah a puang ang.
14 Hnam dangte chuan Pathian dân nei lo mah se, dânin a sawite chu an ti a, dân an nei lo chung pawhin chûng dânte chu an thinlungah a awm a ni.
15 An thiltih hmangin an thinlungah dân a inziak tih an lantîr a; chu bâkah, an chhia leh ṭha hriatnain thil ṭha nge an tiha thil ṭha lo, tih a hriattîr bawk. Chutiang chuan, an rilruah thiam inchantîr châng leh thiam loh inchantîr chângte an nei ṭhîn.
16 Chutiang chu chanchin ṭha puan chhuahnaa ka sawi, Pathianin Krista Isua hmanga mihring thurûkte a rêl nîah chuan a lo thleng ang.
17 Tin, Juda mi i inti a, dân i rinchhan a, Pathian nêna in inlaichînna i chhuang a,
18 a duh zâwng i hria a, Dân zirtîr i nih tawh avângin thil ṭha bîkte chu i pawm a,
19 mitdelte hruaitu, thima awmte êntu,
20 mi âte tifingtu, naupangte zirtîrtu leh, Pathian hriatna bulpui leh Dâna chuang a chungchâng thutak hre thiamah i inngai a.
21 Nimahsela, nang, mi dangte zirtîrtu nangmah i inzirtîr lo maw? Nang, “Ru suh,” tia mi dangte hrilhtu i ru ṭhîn maw?
22 Nang, “Uirê suh,” tia sawitu i uirê ṭhîn maw? Nang, milemte hawtu, biak inte i rawk ṭhîn maw?
23 Nang, Dân chhuangtu dân bawhchhiain Pathian i tihmingchhe ṭhîn maw?
24 “Nangmahni avângin hnam dangte zîngah Pathian hming tihchhiatin a awm ta,” tih ziak ang khân.
25 Dân i zawm chuan serhtan chu a hlâwk ngei mai, dân i bawhchhiat erawh chuan i serhtan chu tan loh ang mai a ni ang.
26 Nimahsela, serhtan lohvin Dânin a phût thil felte a zawm reng chuan a serhtan loh chu serhtan anga ngaih a ni dâwn lâwm ni?
27 Serhtan chungchâng leh Dân thua inziakte zirtîr i ni tawh a; nimahsela, i zâwm si lo. Chuvângin, serhtan lohvin Dân a zawm hian ani chuan thiam loh a chantîr che a ni.
28 A lang maia Juda mi ni chu Juda mi tak tak a ni lo va, a lang maia tisaa serhtan chu serhtan tak tak a ni bawk hek lo.
29 Amaherawhchu, chhûngrila Juda mi ni chu Juda mi tak tak a ni a, serhtan tak tak pawh chu thinlunga serhtan a ni. Chu chu Mosia dân zawmna aṭang ni lovin, thlarau thianghlim hmanga tih a ni. Chutiang mi chu mihringte ni lovin, Pathianin a chawimawi ang.
Footnote-te
^ A nih loh leh, “zâwldawhna.”
