Rom Khuaa Mite Hnêna Lehkhathawn 3:1-31
3 A nih leh, Juda mi nih chu eng nge a hlâwkna? Serhtan pawh chu eng nge a hlâwkna?
2 Kawng tinrêngin hlâwkna nasa tak a awm. A hmasain, anni chu Pathian Thu Thianghlim kawltîr an ni.
3 A nih leh, Juda mi ṭhenkhatin rinna lantîr lo ta se engtin nge ni ang? Chu chu mite’n Pathian an ring thei tawh lo tihna a ni em?
4 Ni lul lo ve! Mi tinte chu dawthei an nih pawhin, Pathian chu mi dik tak a ni ang: “Thu i sawi huna i dikzia i lantîr theih nân leh rorêlsak i nih huna hnehna i chan theih nân,” tih ziak ang khân.
5 Nimahsela, kan fel lohnain Pathian felna a lantîr si chuan eng nge kan sawi tâk ang? Pathianin a thinurna a lantîr hian a dik lo tihna em ni? (Mihring sawi dânin ka sawi a ni.)
6 Ni lul lo ve! Chutiang chu ni sela, Pathianin engtin nge khawvêl ro a rêlsak theih ang?
7 Nimahsela, dâwt ka sawi pawha Pathian thutak chu ama ropuina tûra a lan chian lehzual si chuan, engvângin nge kei pawh mi sual anga rorêlsak ka nih?
8 “Thil ṭha a chhuah theih nân thil ṭha lo i ti ang u,” tiin engati nge kan sawi zâwk loh? Mi ṭhenkhatin chutianga sawiah chuan min puh a. Chûng mite chu rorêlsak tûr an ni.
9 A nih leh, kan dinhmun a ṭha zâwk em ni? Ṭha zâwk lo ve! Kan sawi tâk ang khân, Juda mite leh Grik mite chu sual bâwiha awm vek an ni:
10 “Mi fel an awm lo, pakhat tê mah an awm lo;
11 tu mah finna nei an awm lo va, Pathian zawng rêng an awm hek lo.
12 Mi zawng zawng kawng dangah an pêng ta vek a, an vaiin tlâktlai lo an ni ta hlawm a; tu mah thil ṭha ti an awm lo, pakhat tê mah an awm lo.”
13 “An hrawk chu thlân inhawng a ni a, an leiin an bum a.” “An hmuiahte chuan rûl tûr a awm a.”
14 “An kâ chu ânchhia leh khâknain a khat a.”
15 “An kête chu thisen chhuah tûrin a pên chak a.”
16 “An kawngahte chuan chhiatna leh hrehawmna a awm a,
17 thlamuanna* kawng pawh an hre lo.”
18 “Pathian ṭihna rêng an nei lo,” tih ziak ang khân.
19 Dânin a sawi zawng zawng chu Dân hnuaia awmte tân a ni tih kan hria, kâ zawng zawng a chîp theih nân leh khawvêl zawng zawng Pathian hmaa thiam loh chantîr a nih theih nân.
20 Chuvângin, dân zawmna hmanga a hmaa mi fela ruat theih tu mah an awm lo vang. Dân chu mi sual kan nihzia min hriattîrtu mai a ni si a.
21 Nimahsela, tûnah chuan dân zâwm lovin Pathian mit hmuhah mi fel a nih theih tih târ lan a ni ta, chu chu Dân thu leh Zâwlneite pawhin an lo sawi kha a ni.
22 An ṭobul chu eng pawh ni se, Isua Krista ringtu apiangte chu Pathian mit hmuhah mi fel an ni thei a ni.
23 Mi zawng zawngin thil an tisual tawh vek a, Pathian ropuina an chang zo ta lo.
24 Pathianin anni chu Isua Krista’n anmahni chhandam nâna man a pêk avângin mi felah a ruat a, chu chu a khawngaihna nasa tak avânga Pathian thilthlâwnpêk a ni.
25 Pathianin Krista thisen rinna avânga amah nêna an inrem leh theih nân Krista chu mite tân a hlân a. Chu chu ama felna târ lan nâna ti a ni. Pathian chuan dawhtheihna lantîrin tûn hmaa thil sual tihte kha a ngaihdamsak si a.
26 Tûn laiah pawh Isua ringtu chu mi felah ruatin Pathianin a felna chu a lantîr bawk a ni.
27 A nih chuan, inchhuan chhan tûr a awm em? Awm lo ve. Eng dânin nge inchhuang lo tûra khap? A thiltih a pawimawh tih sawitu dân em ni? Ni lo ve, rinna neih a ngaih thu sawitu dân zâwk a ni.
28 Mi chu dân a zawm vâng ni lovin, rinna avângin mi fela ruat a ni tih kan hre si a.
29 Pathian chu Judate Pathian chauh a ni em? Hnam dangte Pathian pawh a ni lo vem ni? Ni e, hnam dangte Pathian pawh a ni asin.
30 Pathian chu pakhat a nih avângin serhtante chu rinna avângin mi felah a ruat ang a, serhtan lohte pawh an rinna avâng bawkin mi felah a ruat ang.
31 A nih chuan, kan rinna avângin dân chu eng mah lovah kan ngai tihna em ni? Ni lo ve! Chutih ahnêkin, dân chu kan tinghet zâwk a ni.
Footnote-te
^ A nih loh leh, “remna.”
