Rom Khuaa Mite Hnêna Lehkhathawn 4:1-25
4 Chuti a nih chuan, min thlahtu Abrahama chungchângah eng nge sawi theih kan neih?
2 Abrahama chu thiltih avânga mi fela puan a nih chuan chhuan tûr a nei ang, Pathian lamah erawh chuan a nei lo vang.
3 Pathian Lehkha Thuin eng nge a sawi? “Abrahama chuan Jehova a ring a, chu chu a felnaah ruat a ni,” tiin a sawi a ni.
4 Tin, hnathawktu hlawh chu khawngaihna nasa tak anga ruat a ni lo va, a laka bat anga ruat a ni zâwk.
5 Nimahsela, miin Pathian a rin a, ama thiltih a rinchhan loh hian Pathianin ani chu a rinna avângin mi felah a ruat a ni, mi sual mi fela ruat theitu chu Pathian a ni si a.
6 A thiltih vâng ni lova Pathianin mi fela a ruat avânga hlimna neitu thu Davida’n a lo sawi ang chiah kha a ni. Ani chuan:
7 “An dân bawhchhiatna ngaihdama awmte leh an sualte khuha* awmte chu an hlim e;
8 a sualna Jehova’n a hriatsak reng lohva chu a hlim e,” tiin a sawi a ni.
9 Chu hlimna chu serhtante tân chauh nge ni a, serhtan lohte tân pawh? “Abrahama rinna chu felnaah ruat a ni,” tiin kan sawi si a.
10 A nih chuan, eng dinhmun hnuaiah nge mi fela ruat a nih? Serh a tan hnuah nge ni a, serh a tan hmain? Serh a tan hnuah ni lovin, serh a tan hma zâwkin a ni.
11 Tin, Pathianin Abrahama chu serh tan tûrin a hrilh a, chu serhtan chu chhinchhiahna* a ni. Chu chu, serh a tan hma pawha a rinna avânga mi fela ruat a nihzia târ langtu a ni. Chutiang chuan, Abrahama chu serhtan lo chung pawha rinna neitu zawng zawngte tân pa a ni a, Pathian pawhin anni chu mi felah a ruat a ni.
12 Tin, Abrahama chu serhtante pa a ni bawk a. Serhtante pa chauh ni lovin, amah anga rinna neitute leh a nun dân anga nungte tân pawh pa a ni bawk. A nihna takah chuan, kan pa Abrahama khân serh a tan hma pawhin chutiang rinna chu a lantîr tawh a ni.
13 Abrahama leh a thlahte’n khawvêl ro luahtu tûr nihna thutiam an neih chu dân zawm avânga nei an ni lo va, rinna hmanga felna avânga nei an ni zâwk.
14 Dân zâwmtute chu ro luahtu an nih si chuan, rinna chu thil lo thlâwn mai a ni ang a, thutiam pawh chu eng mah lo a ni bawk ang.
15 Dân chuan thinurna a tichhuak a, dân awm lohnaah erawh chuan dân bawhchhiatna pawh a awm lo.
16 Chuvângin, khawngaihna nasa tak ang zêl a nih theihna tûrin, rinnain thutiamte chu kan dawng a. Dân zâwmtute chauh ni lovin, kan vaia pa Abrahama rinna ang neitu, a thlah* zawng zawngin thutiam chu an dawng thei ang.
17 (Chu chu, Pathian Lehkha Thuin: “Hnam tam takte paah ka ruat a che,” tia a sawi ang chiah kha a ni.) Abrahama’n chu rinna chu mitthite kai thotu leh thil la awm lote pawh awm tawh ang maia sawitu Pathian hmaah a lantîr a.
18 Beisei tûr awm tawh lo anga a lan hnuah pawh beiseinain: “I thlah* chu tam tak an la ni ang,” tia a sawi tawh ang khân, hnam tam takte pa a la ni ang tih a ring tlat a ni.
19 A taksa chu thi tawh ang maiin a ngai a (kum 100 dâwn lai a nih tawh avângin), Sari pawh a ching tih hre mah se, a rinna a chak loh phah chuang lo.
20 Nimahsela, Pathian thutiam avângin rinhlelhna nei lovin a ring a, a rinna avânga tihchaka lo awmin Pathian a chawimawi a.
21 Ani chuan Pathianin a thu lo tiam tawh chu a thlen famkimtîr thei tih a ringnghet tlat a ni.
22 Chuvângin, “chu chu a felnaah ruat a ni.”
23 Nimahsela, “chu chu a felnaah ruat a ni,” tih thu chu ama tân chauhva ziah a ni lo,
24 kan tân pawha ziah a ni, thihna ata kan Lalpa Isua kai thotu Pathian chu kan rin avângin keini pawh mi fel anga ruat kan ni ang.
25 Ani chu kan sualna avângin tihhlum tûra pêkin a awm a, mi fela puan kan nih theihna tûrin kaihthawhin a awm bawk.
Footnote-te
^ A nih loh leh, “ngaihdama.”
^ A nih loh leh, “tiamkamna.”
^ A ngial a ngan chuan, “chî.”
^ A ngial a ngan chuan, “chî.”
