Rom Khuaa Mite Hnêna Lehkhathawn 5:1-21
5 Chuvângin, tûnah hian rinna avânga mi fela puan kan ni tawh a, kan Lalpa Krista Isua avângin Pathian nên inremna kan nei a ni.
2 Isua kan rinna chuan Pathian min pantîr theiin, A khawngaihna nasa tak min dawntîr thei a. Chu bâkah, Pathian hnên aṭanga ropuina dawn beiseina kan neih avângin kan lâwm thei a ni.
3 Chu chauh ni lovin, hrehawm kan tawrh pawhin i lâwm ang u, hrehawmna chuan chhelna a siam tih kan hre si a.
4 Chhelna chuan Pathian duhsakna min dawntîr a, chu chuan beiseina min pe a ni.
5 Thlarau thianghlim kan hnêna min pêk khân kan thinlungah Pathian hmangaihna a leih avângin, beiseina chuan beidawnna a thlen lo.
6 Pathian hun ruatah Krista chu mi sualte tân a thi a, chu chu kan la chak loh lai* khân a ni.
7 Mi fel aia thih ngam an vâng hle âwm si a; mi ṭha ai erawh chuan tu emaw tal chuan thih a ngam mial mahna.
8 Mi sualte kan nih laiin Krista chu kan tân a thi a; chutiang chuan, Pathianin min hmangaihna chu a lantîr a ni.
9 Chu mai bâkah, a thisen hmanga mi fela puan kan nih tâk avângin, amah kal tlangin Pathian thinurna lak aṭanga chhandamin kan awm ngei ang.
10 Hmêlmate kan nih lai maha a Fapa thihna avânga Pathian nêna kan inrem leh si chuan, tûna kan inrem hnuah hian a nunna avângin chhandam kan va ni lehzual dâwn êm!
11 Chu mai a ni lo, kan Lalpa Isua Krista avângin Pathianah kan lâwm bawk a ni, amah avângin tûnah hian Pathian nên kan inrem ta si a.
12 Chuvângin, mi pakhat avânga sual khawvêla a lût ang khân, sual avângin thihna a lût bawk a; chutichuan, mi zawng zawngin thil sual an tih avângin, thihnain mi zawng zawng a fan chhuak ta a ni.
13 Dân awm hmain khawvêlah sual a awm tawh a; nimahsela, dân a awm hma chuan tu mah an sualna avânga rorêlsak an ni lo.
14 Thihna chuan Adama aṭanga Mosia thlengin lal angin ro a rêl a, Adama thil sual tih ang ti ve lote chungah hial pawh ro a rêl bawk. Adama chu lo la kal tûra nên an inang a ni.
15 Nimahsela, Pathian thilpêk chu sual* nên a inang lo. Mi pakhat sual avânga mi tam tak an thih si chuan, Pathian khawngaihna nasa tak leh mi pakhat, Isua Krista khawngaihna nasa tak avânga a thilthlâwnpêk chuan mi tam tak chungah malsâwmna a va thlen nasa lehzual dâwn êm!
16 Chu bâkah, thilthlâwnpêk leh mi pakhat thil sual tihin a thlen chu a inang lo. Mi pakhat thil sual tihin mi zawng zawng thiam loh a chantîr a; nimahsela, mi tam tak thil sual tih hnua thilthlâwnpêk erawh chuan mi tam tak mi fel a nihtîr a ni.
17 Mi pakhat sual avânga thihnain lal anga ro a rêl si chuan, Pathian khawngaihna nasa tak leh mi fel kan nih theihna tûra kan tâna a thilthlâwnpêk chu a va ropuiin, a va ṭha zâwk dâwn êm! Chûng thil dawngtute chu Isua Krista zârah an nung ang a, lal angin ro an rêl ang.
18 Thil sual pakhat tihin mi zawng zawng thiam loh a chantîr angin, thil fel pakhat tihin mi zawng zawng an nun theih nân mi fel a nihtîr a ni.
19 Mi pakhat thuawih lohna avânga mi tam tak mi sual an nih ang khân, mi pakhat thuawih avângin mi tam tak mi fel an lo ni ang.
20 Mite an sualzia a lan theih nân Dân a lo awm a. Mahse, sualna a nasatna hmunah Pathianin a khawngaihna nasa tak a lantîr lehzual ṭhîn.
21 Chuvângin, sual chuan thihna nên lal angin ro a rêl a; chutiang bawkin, tûnah hian Pathian khawngaihna nasa tak chuan felnain lal angin ro a rêl a ni. Chu chuan kan Lalpa Isua Krista zârah chatuana nunna a thlen ang.
