Rom Khuaa Mite Hnêna Lehkhathawn 6:1-23
6 A nih chuan, eng nge kan sawi tâk ang? Khawngaihna nasa tak chu a pun theih nân kan sual zawm zêl dâwn em ni?
2 Hnai lo ve! Kan nun kawng sual chu a thi tawh a; chuvângin, engtin nge suala kan la nun reng theih ang?
3 A nih leh, keini Krista Isuaa baptisma chang zawng zawngte hi a thihnaah baptis-in kan awm tih in hre lo vem ni?
4 A thihnaa baptisma changin a hnênah phûmin kan awm a; tin, Pa thiltihtheihna ropui takin thihna ata Krista a kaihthawh ang khân, tûnah hian nun tharin kan nung a ni.
5 A thihna anpuia amah nên pumkhat kan nih si chuan, a thawhlehna anpui pawhin amah nên pumkhat kan ni ngei bawk ang.
6 Sual bâwiha kan awm tawh lohna tûra sual nei kan taksa hi eng mah ti thei lova a awm theihna tûrin, kan mize hlui chu banah ama ruala khenbehin a awm tih kan hria.
7 Tu pawh thi tawh chu sual lak aṭangin a chhuak tawh* si a.
8 Chu bâkah, Krista hnêna kan thih tawh chuan a hnênah kan nung bawk ang tih kan ring a ni.
9 Tûnah Krista chu thihna ata kaihthawhin a awm tawh a, a thi leh tawh lo vang tih kan hre si a; thihnain a chungah thu a nei tawh lo.
10 A thihna chu chatuan atâna sualna nuai bo tûra vawi khat thihna a ni a; nimahsela, a nunna chu Pathian lama nunna a ni.
11 Chutiang bawkin, nangni pawh sual lama thi tawhah inngai ula; nimahsela, Krista Isua avângin Pathian lamah erawh chuan nungah inngai rawh u.
12 Chuvângin, in taksa châk zâwngte in zawm loh nân, in taksa thi theiah sual chu lal angin rorêltîr tawh suh u.
13 In taksa pêngte pawh fel lohna hmanrua* atân sual hnênah pe hek suh u; nimahsela, thihna ata nung lehte angin Pathian hnênah inpe zâwk rawh u, in taksa pêngte pawh felna hmanrua* atân Pathian hnênah pe bawk rawh u.
14 Dân hnuaia awm tawh lo va, Pathian khawngaihna nasa tak in dawn tawh zâwk avângin sual thuneihna hnuaiah in awm tawh lo.
15 Eng nge kan sawi tâk ang? Dân hnuaia awm lo va, khawngaihna nasa tak hnuaia kan awm avângin thil sual kan ti dâwn em ni? Hnai lo ve!
16 Tu hnênah pawh a thu awih tûra a bâwiha in inpêk chuan, thihnaa hruaitu bâwih a ni emaw, felnaa hruaitu bâwih a ni emaw pawh ni se, a thu in awiha bâwih chu in ni tih in hre lo vem ni?
17 Chuvângin, sual bâwih lo ni ṭhîn tawh mah ula, tûnah chuan Pathianin zirtîrna a pêk che u kha in thinlung zawng zawnga in awih tâk avângin, Pathian hnênah lâwmthu i sawi ang u.
18 Sual laka chhuah zalen in nih tawh avângin felna bâwih in lo ni ta.
19 In tisa chak lohna avângin mihring sawi dânin ka sawi a ni; dân bawhchhiatnaa hruai tûra bawlhhlawhna leh dân bawhchhiatna bâwiha in taksa pêngte in pêk ang khân, tûnah chuan thianghlimnaa hruai tûrin in taksa pêngte chu felna bâwihah pe rawh u.
20 Sual bâwih in nih lai khân felnaa thununin in awm si lo.
21 A nih chuan, khâng hun laia in thil tih ṭhinte khân eng rah nge a chhuah? Tûna in zahpui tâk thilte hi a ni. Chûng thilte tâwpna chu thihna a ni si a.
22 Tûnah erawh chuan sual laka chhuah zalen in ni tawh a, Pathian bâwihte in lo ni ta. Thianghlimna kawngah rah in chhuah a, chumi tâwpna chu chatuana nunna a ni.
23 Sual man chu thihna a ni si a, Pathian thilthlâwnpêk erawh chu kan Lalpa Krista Isua zârah chuan chatuana nunna a ni.
Footnote-te
^ A nih loh leh, “ngaihdam tawh.”
^ A ngial a ngan chuan, “râlthuam.”
^ A ngial a ngan chuan, “râlthuam.”
