Rom Khuaa Mite Hnêna Lehkhathawn 7:1-25
7 Unaute u, Dân chuan mi chu a dam chhûngin a thunun tih in hre lo vem ni? (Dân hretute hnênah ka sawi a nih hi.)
2 Hmeichhia pasal nei chu a pasal dam chhûng zawng dânin a pasalah a phuar a; nimahsela, a pasal a thih chuan, a pasal dân aṭang chuan chhuah zalenin a awm a ni.
3 Chuvângin, a pasal dam laia mi dang a neih chuan uirenu an ti ang. Amaherawhchu, a pasal a thih chuan mi dang nei mah sela, uirê a ni tawh lo, a pasal dân aṭangin a zalên tawh si a.
4 Chuvângin, ka unaute u, nangni pawh Krista taksa avângin Dânah chuan tihhlum in ni, mi dang ta in nih theihna tûrin, thihna aṭanga tho leha ta chu; chutiang chuan, Pathian tân rah kan chhuah thei ang.
5 Tisa châkna anga kan nun lai khân, Dân chuan tisa châkna ṭha lote’n kan taksa pêngte chu thil sual a tihtîr tih chiang takin a tilang a, chu sual chuan thihna min thlen a ni.
6 Nimahsela, Dâna kan thih tawh avângin, Dân aṭangin kan zalên ta. Chuvângin, hmân laia ziak Dân zawm avânga Pathian bâwihte ni tûr kan ni lo va, Thlarau hruai avânga Pathian bâwihte ni tûr kan ni zâwk.
7 A nih chuan, eng nge kan sawi tâk ang? Dân chu sual a ni em? Ni lul lo ve! Amaherawhchu, Dânin min hriattîr lo sela chuan sual ka hre lo vang. Dânin: “Awt suh,” ti lo sela chuan awh hi ka hre lo vang.
8 Nimahsela, chu thupêk avâng chuan sual chuan hun remchâng a hmu a, keimahah awhna tinrêng a awmtîr a ni, dân tel lovin sual chu thi mai a ni si a.
9 Hmânah khân Dân tel lovin ka nung ṭhîn a. Nimahsela, chu thupêk a rawn thlen tâkah chuan sual chu a lo nung a, kei erawh chu ka thi ta a ni.
10 Nunnaa hruaitu tûr chu thupêk chuan thihnaah a hruai tih ka hre ta.
11 Chu thupêk chuan sual min hriattîr a, sual chuan min bumin, min tihlum ta a ni.
12 Tin, Dân chu amah ngawt pawhin a thianghlim a, chu thupêk pawh chu a thianghlimin, a fel a, a ṭha bawk a ni.
13 A nih leh, thil ṭha avânga thi ka ni em? Ni lo ve! Sual avâng zâwkin ka thi a ni. Dân erawh chu a ṭha e, sual avânga thi ka ni tih a lan chiantîr si a. Chuvângin, thupêk chuan sual râpthlâkzia chu a lan chiantîr a ni.
14 Dân chu thlarau lam thil a ni tih kan hre si a, kei erawh chu tisa mi, sual bâwiha hralh tawh ka ni.
15 Ka thiltih hi ka hre thiam lo, ka thil tih duh ti lovin, ka thil huat tak ka ti zâwk si a.
16 Dân chu a ṭha tih ka pawm e; nimahsela, thil ṭha tih ka duh chu ka la ti chuang lo.
17 Chuvângin, chûng thilte chu ka tih a ni tawh lo va, keimaha awm sualin a ti zâwk a ni.
18 Keimahah hian (chu chu ka tisa tihna a ni) thil ṭha eng mah a awm lo tih ka hria; thil ṭha tih duhna ka nei a, tihtheihna erawh ka nei si lo.
19 Thil ṭha ka tih duh ka ti lo va, ka tih duh loh thil ṭha lo ka ti zâwk ṭhîn.
20 Ka tih duh loh ka tih si chuan, a titu chu keimah ni tawh lovin, keimaha awm sual a ni zâwk e.
21 Chuvângin, he dân hian min thunun ṭhîn tih ka hre ta: Thil dik tih ka duh laiin, thil ṭha lo tih duhna ka nei ṭhîn.
22 Thinlung takin Pathian dânah ka lâwm a ni.
23 Nimahsela, ka taksaah hian ka rilru dân dotu dân dang a awm tih ka hria, chu chuan ka taksaa awm sual dân hnênah salah min hruai ṭhîn.
24 Mi khawngaihthlâk ka va ni tehlul êm! He thihnaa min hruai mêktu taksa lak aṭang hian tuin nge min chhan chhuak ang?
25 Kan Lalpa Isua Krista hmanga min chhan chhuah avângin Pathian hnênah lâwmthu ka sawi e! Tin, ka rilruin Pathian dân bâwih ka ni a, ka tisaah erawh chuan sual dân bâwih ka ni si a.
