Rom Khuaa Mite Hnêna Lehkhathawn 8:1-39
8 Chuvângin, Krista Isua nêna inpumkhata awmte chuan thiam loh channa an nei lo.
2 Krista Isua nêna inpumkhata awmte hnêna nunna petu thlarau dân chuan, sualna leh thihna dân lak aṭangin a chhuah zalên tawh si che u a.
3 Tisa chak lohna in rochun avânga Dânin a hlen chhuah theih loh kha Pathianin a hlen chhuak ta, chu chu sualna nuai bo tûra sualna nei mihringte anga a Fapa rawn tîrin a hlen chhuak a. Chutiang chuan, tisa sualna chu thiam loh a chantîr a ni.
4 Tisa dân ni lo va, thlarau dâna awm keimahniah hian Dânin a phût thil felte a famkim theihna tûrin.
5 Tisa dâna nungte chuan tisa lam thilte an ngaihtuah reng ṭhîn a, thlarau dâna nungte erawh chuan thlarau lam thilte an ngaihtuah reng ṭhîn.
6 Tisa lam thilte ngaihtuah reng chu thihna a ni a, thlarau lam thilte ngaihtuah reng erawh chu nunna leh thlamuanna* a ni.
7 Tisa lam thil ngaihtuah rengtute chu Pathian hmêlma an ni a, anni chuan Pathian dân an zâwm lo va, zawm pawh an zâwm thei hêk lo.
8 Chuvângin, tisa duh zâwnga awmte chuan Pathian an tilâwm thei lo.
9 Nimahsela, nangmahnia Pathian thlarau a awm tak zet chuan, tisa duh zâwngin in awm lo va, thlarau duh zâwngin in awm zâwk a ni. Amaherawhchu, tu pawhin Krista rilru put hmang* ang a neih loh chuan ani chu Krista ta a ni lo.
10 Krista nên pumkhat in nih erawh chuan taksa chu sualna avângin a thi a; nimahsela, felna avângin thlarau chuan nunna a pe che u a ni.
11 Thihna ata Isua kai thotu thlarau kha nangmahniah a awm si chuan, thihna ata Krista Isua kai thotu chuan nangmahnia awm a thlarau hmangin in taksa thi thei hi a tinung bawk ang.
12 Chuvângin, unaute u, mawhphurhna kan nei, tisa duh dâna tisa châkna anga nung tûr erawh chuan a ni lo.
13 Tisa duh dâna in nun chuan in thi ngei dâwn si a. Nimahsela, thlarau ṭanpuinaa taksa thiltihte in tihhlum chuan in nung ang.
14 Pathian thlarau hruaia awm zawng zawngte chu Pathian fate ngei an ni si a.
15 Hlauhna nei leh tûrin bâwih nihna thlarau in dawng lo va, faa lâk nihna thlarau in dawng zâwk a ni, chu thlarau avâng chuan: “Abba,* Ka Pa!” tiin kan au ṭhîn.
16 Pathian thlarau chuan kan thinlungah* Pathian fate kan ni tih chiang takin min hriattîr a ni.
17 Tin, Pathian fate kan nih chuan, Pathian pêk tûr roluahtu tûrte kan ni. Krista roluah tûr chu kan ṭâwmpui ang a, amah kan tuarpui chuan a ruala chawimawiin kan awm bawk ang.
18 Tin, tûna kan hrehawm tawrh mêkte hi Pathianin nakina a la lantîr tûr kan lâwmman ropui tak nêna khaikhin chuan eng tham mah a ni lo vang.
19 Thil siamte chuan Pathian fate lo lan hun chu an nghâkhlel hle a ni.
20 Thil siamte chu thil eng mah lo mai mai hnuaiah an awm, anmahni duh thua awm erawh an ni lo, chutianga an awm phaltu Pathian duh zâwng vânga awm an ni zâwk. Nimahsela, ani chuan an hnênah beiseina a pe a ni:
21 Thil siamte ngei pawh chu chhiatna bâwih aṭanga chhuah zalenin an awm ang a, Pathian fate zalênna ropui tak an nei ang tih chu.
22 Thil siam zawng zawngte chu tûn thlengin rûm leh na tuarin an la awm reng tih kan hre si a.
23 Chu chauh pawh a ni lo, rah hmasa ber thlarau neitu keini ngei pawh hi fa anga lâk kan nih hun—tlanna hmanga kan taksa aṭanga chhuah zalen kan nih hun—tûr nghâkhlel taka kan thlîr lai hian kan rilruin kan rûm a ni.
24 Chu beiseinaa chhandam chu kan ni si a. Nimahsela, hmuh theih reng beiseina hi beiseina a ni lo. Engtin nge miin a thil hmuh tawh reng chu a beisei theih ang?
25 Kan hmuh loh kan beisei erawh chuan chhel takin kan nghâk fan fan ṭhîn.
26 Chutiang bawkin, thlarau pawh kan chak loh laia min ṭanpui tûrin a lo thleng ṭhîn a, kan ṭawngṭai laia chham tûr hre lova kan rûm hunah, chu thlarau ngei chuan min ngensak ṭhîn.
27 Tin, thlarau chuan Pathian duh zâwng ang zêla mi thianghlimte tâna a ngensak ṭhin avângin, thinlungte entu chuan thlarauvin a sawi tum chu a hria a ni.
28 Pathian chuan a hnathawh zawng zawng chu amah hmangaihtu, a thiltum nêna inmila a kohvate tân chuan felfai takin a thawhsak ṭhîn tih kan hria.
29 A tîr aṭangin a thlan tûrte chungchâng chu a hria a, a Fapa anpuia awm tûrin a ruat lâwk bawk a ni. A Fapa chu unau tam tak zînga piang hmasa ber a nih theihna tûrin.
30 Chu bâkah, a ruat lâwkate chu a kohvate an ni a, a kohvate chu mi fela a puante an ni. Tin, mi fela a puante chu a chawimawiate an ni bawk.
31 Chûng thilahte chuan eng nge kan sawi tâk ang? Pathian kan lama a ṭan chuan tuin nge min do thei ang?
32 A Fapa ngei pawh kan vaia tâna thi tûra petu chuan a Fapa chauh pawh ni lovin, thil dang zawng zawng pawh min pe dâwn lâwm ni?
33 Pathian mi thlante chu tuin nge hêk thei ang? Anmahni mi fela Puangtu chu Pathian a ni si a.
34 Anni chu tuin nge thiam loh chantîr thei ang? Tu man an thei lo. Krista Isua chu an tâna thi a, tho leha kha a ni a. Tûnah ani chu Pathian ding lama awmin kan tân min ngensak a ni.
35 Krista hmangaihna ata tuin nge min ṭhen thei ang? Hrehawmnain emaw, mangannain emaw, tihduhdahnain emaw, rilṭâmnain emaw, saruaknain emaw, hlauhawmnain emaw, ngûnhnâmin emaw min ṭhen thei dâwn em ni?
36 “I hming avângin ni lêngin thihna kan hmachhawn a, berâm talh tûr ang maia ngaih kan ni,” tih ziak ang khân.
37 Amaherawhchu, chûng thil zawng zawngah chuan min hmangaihtu avângin hnehna famkim changtute kan ni.
38 Thihna te, nunna te, vântirhkoh te, thuneihna te, thil awm mêk te, thil lo la awm tûr te, thiltihtheihna te,
39 sânna te, thûkna te, thil siam dang rêng rêngte pawhin kan Lalpa Krista Isuaa awm Pathian hmangaihna aṭang chuan min ṭhen thei lo vang tih chiang takin ka hre si a.
Footnote-te
^ A nih loh leh, “remna.”
^ A ngial a ngan chuan, “thlarau.” Grik ṭawnga pneu′ma.
^ Hebrai, a nih loh leh Aramic thu mal a ni a, “Aw, Ka Pa!” tihna a ni.
^ Hei hi chhûng lam nihna sawina a ni.
