Rom Khuaa Mite Hnêna Lehkhathawn 9:1-33
9 Krista zuitu ka nih angin thutak ka sawi a ni, dâwt ka sawi lo ve. He thu sawi tûr hian ka chhia leh ṭha hriatna hi thlarau thianghlimin a kaihruai a ni:
2 Lungngaihna nasa tak ka nei a, ka thinlung nâ pawh a reh thei lo.
3 Ka unaute, tisa lama ka chhûngkhatte tân chuan, ânchhe dawnga Krista hnên aṭanga tihhrana awm hial pawh ka inhuam si a.
4 Anni chu Israel mite an ni a, fa atâna lâk an ni a, ropuina te, thuthlung te, Dân te, rawngbâwlna thianghlim te leh, thutiamte chu an ta a ni.
5 Anni chu pi leh pute thlah an ni a, an hnên aṭangin Krista pawh a lo chhuak a ni. Engkim chunga awm Pathian chu chatuana fakin awm rawh se. Amen.
6 Nimahsela, Pathian thu chu a hlawhchham ta tihna a ni lo. Israela thlah zawng zawng chu “Israel” mi tak tak an ni vek lo.
7 Abrahama thlahte an nih avângin a fate an ni vek kher lo; Pathian Thua: “I thlah* chu Isaaka aṭangin an lo chhuak ang,” tia a inziak ang khân.
8 Chumi awmzia chu, tisa fate chu Pathian fate an ni tak tak lo va, thutiam fate chu thlah* anga chhiar an ni zâwk tihna a ni.
9 Pathianin he thu hi a tiam si a: “Nakum tûn ang huna ka lo kal leh hunah chuan Sari’n fapa a lo nei tawh ang,” tih hi.
10 Chu chauh a ni lo, Rebeki’n mi pakhat, kan pu Isaaka laka phîr a pai lai khân,
11 phîrte an la pian hma, thil ṭha leh ṭha lo eng mah an la tih hma pawhin Pathianin a mi thlan tûr chu a sawi lâwk a ni. Pathian chuan a Mi thlante chu an thiltih vâng ni lovin, a duh avângin a thlang a.
12 Chuvângin, Rebeki chu: “A upa zâwk chu a naupang zâwk bâwih a ni ang,” tia hrilh a ni.
13 “Jakoba ka hmangaih a, Esauva erawh chu ka hua a ni,” tia ziak ang khân.
14 A nih leh, Pathian chu a dik lo kan ti dâwn em ni? Ni lo ve!
15 Ani chuan Mosia hnênah: “Zahngaihna lantîr ka duh apiangte chungah zahngaihna ka lantîr ang a, khawngaihna lantîr ka duh apiangte chungah khawngaihna ka lantîr ang,” tiin a sawi si a.
16 Chuvângin, a duhtu-ah a innghat lo va, a thawhrimnaah a innghat hek lo, zahngaihna neitu Pathianah a innghat zâwk a ni.
17 Pathian Lehkha Thuin Pharaoa hnênah: “Hemi avâng chauh hian a ni i dam ka la phal ni, nangmaha ka thiltihtheihna a lan chhuah theihna tûr leh lei chung zawng zawnga ka hming puan chhuah a nih theihna tûrin,” a ti si a.
18 Chuvângin, Pathian chuan a duh apiangte chungah zahngaihna a lantîr ṭhîn a, a duh apiangte chu a tiluhlul ṭhîn.
19 Chuvângin, ka hnênah: “Engvângin nge Pathianin mite a la dem reng? Tuin nge a duh zâwng dodâl thei?” tiin in la sawi ang.
20 Nimahsela, Aw mihring, Pathian chhâng lêt tûrin tu nge maw i nih le? Thil siamin a siamtu hnênah: “Engvângin nge heti hian min siam?” a ti ngai em ni?
21 Hlum inang reng aṭangin bêl hlu tak siam tûr leh bêl hlu lo tak siam tûrin bêlvawtu chuan hlum chungah thu a nei lo vem ni?
22 Pathianin a thinrimna leh a thiltihtheihna lantîr a duh chung pawha thinrimna bêl, tihboral tlâkte chunga dawhtheihna nasa tak a la lantîr hrâm hrâm chuan eng nge kan sawi tâk ang?
23 Ani chuan zahngaihna bêlte hnêna a ropuina nasa tak lantîrna atân chu chu a ti a, anni chu ropuina dawng tûrin a lo buatsaih lâwk tawh a ni.
24 Keini hi Juda mite aṭang chauh ni lo, hnam dang mite aṭang pawha a kohte kan ni.
25 Hosea lehkhabuah pawh heti hian a sawi bawk: “Ka mi ni lote chu, ‘Ka mite,’ tiin ka ko vang a, ka hmangaih loh hmeichhia chu, ‘Ka duh tak,’ tiin ka ko vang.
26 An hnêna, ‘Ka mite in ni lo,’ tia ka sawina hmunah ngei chuan, ‘Pathian nung fate, tia koh an ni ang,’” tiin.
27 Chu bâkah, Isaia pawhin Israelte chungchâng puang chhuakin: “Israel mite chu tuifinriata ṭiau vaivut zâta tam ni mah sela, a la bângte chauh chhandam an ni ang.
28 Jehova chuan leia mite chungah ro a rêl ang a, chu chu rang takin a hlen chhuak ang,” tiin a sawi a.
29 Tin, Isaia vêkin heti hian a lo sawi lâwk a ni: “Sipaihote Jehova’n chi thlah min lo zuahsak lo sela chuan, Sodom leh Gomora khuaa mite ang kan ni tawh ang,” tiin.
30 A nih chuan, eng nge kan sawi tâk ang? Hnam dang mite chu mi fel nih an tum lo chung pawhin, an rinna avângin Pathian mit hmuhah mi fel an lo ni a.
31 Chutih rualin, Israel mite chuan dânin a sawi an zawmna aṭanga mi fel nih tum mah sela, dân an zâwm famkim lo.
32 Engvângin nge? Rinna ni lo va, an thiltihte hmanga mi fel nih an tum vâng a ni a. “Tlûkna lung” chu chhuihin an tlu a ni.
33 “Ngai teh u! Zionah chuan tlûkna lung leh dâlna lungpui ka dah ang; nimahsela, chumia a rinna nghattu chu a mualpho lo vang,” tih ziak ang khân.
