Tirhkohte Thiltih 11:1-30
11 Judai rama tirhkohte leh unaute chuan, hnam dangte pawhin Pathian thu an pawm ta tih an hria a.
2 Tin, Petera’n Jerusalem a thlen chhoh chuan, serhtan thlâwptute chuan ani chu sawisêlin,*
3 a hnênah: “Serhtan lohte inah kalin, an hnênah i ei a,” an ti a.
4 Chu veleh, Petera chuan thil awm dân chu chipchiar takin an hnênah a hrilhfiah a:
5 “Joppa khuaa ka ṭawngṭai laiin inlârna ka hmu a, thil eng emaw* puan hlai tak ang, a kil lia inhlîng, vân aṭanga rawn uai thla ka hmu a, ka bulah tak a lo awm a.
6 Ngun takin ka en a, a chhûngah chuan leia nungcha ke pali nei te, ramsa hlauhawm te, bawkvâka kal chî rannung te leh, chunglêng savate ka hmu a.
7 Tin, awin: ‘Peter, tho la, talh la, ei rawh!’ tia min hrilh ka hre bawk a.
8 Nimahsela, kei chuan: ‘Ni lo ve, Lalpa, thil bawlhhlawh leh thianghlim lo rêng rêng ka kâah a lût ngai lo,’ ka ti a.
9 A vawi hnihna atân vân aṭanga aw chuan min bia a: ‘Pathianin a tihthianghlim tawh chu nangin bawlhhlawh ti suh,’ tiin min chhâng a.
10 Chutianga vawi thum a thlen hnu chuan, engkim chu vânah khai chhohvin a awm leh ta a.
11 Chutih lai tak chuan, Kaisari aṭanga ka hnêna an rawn tirh mi pathumte chu ka thlenna inah chuan an lo thleng reng tawh a.
12 Tichuan, thlarauvin rinhlelhna nei hauh lova anmahni zui tûrin min hrilh a. Tin, hêng unau parukte pawh hian min zui ve bawk a; tichuan, chu pa inah chuan kan lût ta a.
13 “Ani chuan a ina vântirhkoh a hmuh dân min hrilh a, vântirhkoh chuan: ‘Joppa khuaah mi tîr la, Simona, Petera an tih chu va kohtîr rawh.
14 Ani chuan nang leh i chhûngte zawng zawng chhandam in nih theihna tûr a hrilh ang che u,’ tiin a sawi a.
15 Nimahsela, thu ka han sawi ṭan chuan, a tîra thlarau thianghlim kan chunga a thleng ang khân, an chungah pawh a lo thleng ta a.
16 Chu veleh: ‘Johana chuan tuiin a baptis ṭhîn a; nimahsela, nangni erawh chu thlarau thianghlima baptis in la ni ang,’ tia Lalpa’n a sawi kha ka hre chhuak leh ta a.
17 Chuvângin, Pathianin keini Lalpa Isua Krista ringtute hnêna min pêk, thilthlâwnpêk ang bawk kha an hnêna a pêk si chuan, kei tehlul hian Pathian ka dang thei dâwn em ni?”* a ti a.
18 Chûng thute an hriat chuan an hnial ta lo va.* “Chuti a nih chuan, Pathianin hnam dangte pawh nunna an neih theih nâna sim tûrin a duh a nih chu,” tiin Pathian an chawimawi ta a.
19 Tin, Stephana an tihduhdah avânga darh tate chu Phoiniki ram te, Kupra thliarkâr te leh, Antiokei khua thlengin an kal a; nimahsela, Juda mite hnênah chauh thu an hril a.
20 An zînga ṭhenkhat Kupra thliarkâr leh Kurini khua aṭangin Antiokei khuaah an lo kal a, Grik ṭawng hmangte hnênah thu sawiin, Lalpa Isua chanchin ṭha an puang a.
21 Anni chu Jehova’n a ṭanpui a, mi tam tak ringtu lo niin Lalpa an zui ta a.
22 An chanchin chu Jerusalema kohhran beng a lo thlen chuan, Antiokei khua thlengin Barnaba an tîr chhuak ta a.
23 A va thlen chuan, Pathian khawngaihna nasa tak a hmu a, a lâwm hle a, thinlung zawng zawnga Lalpa thu zâwm zêl tûrin an vaiin a fuih a.
24 Ani chu mi ṭha tak a ni a, thlarau thianghlim leh rinnaa khat a ni. Chuvâng chuan, mipui tam takin Lalpa an ring ta a.
25 Tichuan, Saula a hmuh hma lohva zawng tûrin Barnaba chu Tarsa khuaah a kal ta a.
26 A hmuh hnuah Antiokei khuaah a hruai a. Chutah chuan kum khat zet kohhrana unaute bulah an awm a, mi tam tak a zirtîr ṭhîn a, Antiokei khua chu Pathian kaihhruainaa zirtîrte Kristian tia an koh hmasakna ber a ni.
27 Chûng hun lai chuan, Jerusalem aṭangin Antiokei khuaah zâwlneite an zuk kal a.
28 An zînga pakhat Agaba chu a ding a, lei pum puia ṭâm nasa tak a tlâk tûr thu thlarau thianghlim ṭanpuinain a sawi lâwk a, chu ṭâm chu Klaudia hun lai khân a tla a ni.
29 Tin, zirtîrte chuan Judai rama chêng an unaute tân an theih tâwk ṭheuhva chhawmdâwlna* thawn an tum a.
30 Upate hnêna ṭanpuina thawnin chutiang chuan an ti a, chu chu Barnaba leh Saula’n an kensak a ni.
Footnote-te
^ A nih loh leh, “hnial.”
^ A ngial a ngan chuan, “bêl ang tak.”
^ A nih loh leh, “Pathian kawngah ka lo ding thei dâwn em ni?”
^ A ngial a ngan chuan, “an ngawi ta a.”
^ A nih loh leh, “chhawmdâwl rawngbâwlna.”
