Tirhkohte Thiltih 16:1-40
16 Tin, Paula chuan Derbe khua a thleng a, chumi hnuah Lustra khuaah a kal leh a. Chutah chuan zirtîr pakhat Timothea a awm a, a nu chu ringtu Juda hmeichhia a ni a, a pa erawh chu Grik mi a ni.
2 Lustra leh Ikonion khuaa unaute chuan ani chu an fak hle.
3 Paula chuan Timothea chu amah zui tûra a duh thu a sawi a; tichuan, a hruai a, chu hmuna Juda awmte avâng chuan a serh a tansak a, chuta awmte chuan a pa chu Grik mi a ni tih an hre vek si a.
4 Khaw tina an kal pahin Jerusalema awm tirhkohte leh upate thu rêl thlûk kha, an zawm atân an hrilh zêl a.
5 Tichuan, kohhrana unaute chu rinnaah an nghet telh telh a, nî tin an pung zêl a.
6 Chu bâkah, thlarau thianghlimin Asia* rama thu hrilh a khap avângin, Phrugia leh Galatia ram an fang chhuak ta a.
7 Musia ram an thlen chuan Bithunia rama kal an tum a; nimahsela, Isua thlarauvin* a remti lo va.
8 Tichuan, Musia ram kal tlangin, Troas khaw lamah an chhuk ta a.
9 Tin, zânah Paula chuan inlârnaah Makedonia rama pa pakhat dingin a hnêna: “Makedonia ramah lo kal la, min pui rawh,” tia a ngên lai chu a hmu a.
10 Inlârna a hmuh zawh veleh, chu rama mite hnêna chanchin ṭha hril tûr chuan Pathianin min ko tih hriain, Makedonia ramah kal kan tum ta nghâl a.
11 Tichuan, Troas khua aṭangin lawngin kan chhuak a, tluang takin Samothraki thliarkâr kan thleng a, a tûkah Neapoli khua kan thleng leh a.
12 Tin, chuta ṭang chuan Phillipi khuaah kan kal a, chu khua chu Makedonia rama khaw pawimawh ber a ni. Chutah chuan ni eng emaw zât kan châm a.
13 Sabbath nîah chuan ṭawngṭai tûra mite an kal khâwmna hmun nia kan rin, kulh kawngkhâr pâwna lui bulah chuan kan kal a. Chutah chuan ṭhuin, chuta awm hmeichhiate hnênah chuan thu kan hril ṭan a.
14 Tin, Thuatira khuaa puan senduk zuartu leh Pathian betu Ludi chuan kan thusawite chu a ngaithla a. Paula thusawite a pawm theih nân, Jehova’n a thinlung chu zau takin a hawnsak a.
15 Amah leh a chhûngte’n baptisma an chan hnu chuan: “Jehova chunga rinawma min ngaih chuan lo kal ula, ka inah lo thleng rawh u,” tiin min sâwm chiam a. Amah zui tûrin min ti ta tlat a.
16 Tin, ṭawngṭaina hmun pana kan kal laiin, ramhuai zâwl aienthiam chhiahhlawh hmeichhe pakhatin min tâwk a, ani chuan a aienna hmangin a pute tân sum tam tak a thawk chhuak ṭhîn a.
17 Chu hmeichhia chuan Paula leh keini chu min zui reng a: “Hêng mite hi Pathian Chungnungbera bâwihte an ni a, chhandam in nih theih dân tûr an hrilh che u a nih hi,” tiin a au va.
18 Chutiang chuan ni tam tak chhûng a ti a. A tâwpah Paula chuan a ning a, lehhawiin ramhuai hnênah chuan: “Isua Krista hmingin a kawchhûng aṭang khân chhuak tûrin thu ka pe a che,” a ti a. Tichuan, a lo chhuak ta nghâl a.
19 Tin, a pute’n an sum lâk luhna a tâwp tih an hriat chuan, Paula leh Sila chu an man a, bazâra rorêltute hnênah an hnûk lût a.
20 Khawpui chhûnga rorêltute hnênah an hruai a: “He mite hian kan khua hi nasa takin an tibuai a ni. Juda mi an ni lehnghâl,
21 Rom mi kan ni tih hre reng siin kan tâna tih ve thiang lote chu an zirtîr a ni,” an ti a.
22 Tin, mipui chu anmahni bei tûrin a rualin an lo thawk a, khawpui chhûnga rorêltute chuan an kawrfualte an pawh thlêrsak hnuah, tianga vaw tûrin thu an pe a.
23 Vawi tam tak an vuak hnuah tân inah an khung a, tân in vêngtu hnênah chuan uluk taka vêng tûrin thu an pe a.
24 Tân in vêngtu chuan, chutiang thupêk a dawn avâng chuan, anni chu tân in chhûngril berah a khung a, an kêahte chuan thing kawl a buntîr bawk a.
25 Nimahsela, zan lai vêlah Paula leh Sila chu an ṭawngṭai a, Pathian fakin hla an sa a, mi tângte chuan an ngaithla a.
26 Thâwklehkhatah lîr nasa tak a lo nghîng a, tân in chu nasa takin a lo nghîng ta a. Chu bâkah, kawngkhâr zawng zawng chu a lo inhawng ta nghâl a, mi tin khaidiatte leh thing kawlte chu a lo inphelh ta vek a.
27 Tân in vêngtu a lo harh a, tân in kawngkhâr inhawngte a hmuh chuan, mi tângte chu an tlân chhuak emaw tiin a ngûnhnâm a phawi a, intihhlum a tum a.
28 Nimahsela, Paula chuan ring takin: “In tina suh, kan vaiin hetah kan awm e!” a ti a.
29 Tin, tân in vêngtu chuan a chhiahhlawh hnênah khâwnvârte a dîl a, hmanhmawh takin a lût a, hlauh avângin a khûr a, Paula leh Sila hmaah chuan a bawkkhup a.
30 Anni chu a hruai chhuak a, an hnênah: “Pute u, chhandam ni tûrin eng nge ka tih ang?” a ti a.
31 Anni chuan: “Pathian chhandamna dawng tûr chuan Lalpa Isua i ring tûr a ni a, i chhûngte tân pawh chutiang bawk chu a ni,” an ti a.
32 Tichuan, Paula leh Sila chuan amah leh a ina awm zawng zawng hnênah Jehova thu an sawi a.
33 Tin, chumi zân la la chuan anni chu a hruai a, an hliamte chu a silsak a, amah leh a ina chêng zawng zawngin baptisma an chang ta nghâl a.
34 Tichuan, anni chu a inah a hruai a, dawhkânah ei tûr a chhawpsak a, Pathian ringtu an lo nih tâk avângin amah leh a ina chêng zawng zawng chu an hlim ta hle a.
35 Khua a lo vâr chuan, khawpui chhûnga rorêltute chuan tân in vêngtu hnênah: “Khâng mite kha chhuah rawh,” tia hrilh tûrin vêngtute chu an tîr a.
36 Tân in vêngtu chuan an thusawi chu Paula hnênah hrilhin: “Khawpui chhûnga rorêltute’n chhuah tûr che uin mi an rawn tîr a. Chuvângin, tûnah lo chhuak ula, thlamuang takin kal rawh u,” a ti a.
37 Nimahsela, Paula chuan an hnênah: “Rom mi kan ni a, thiam loh chang pawh kan ni lo va, chuti chung chuan vântlâng hmuhah min vua a, tân inah min khung a, tûnah a rûkin min chhuah an tum leh si maw? A ni thei lo vang! Anmahni ngei lo kalin min rawn hruai chhuak rawh se,” a ti a.
38 Vêngtute chuan chûng thute chu khawpui chhûnga rorêltute hnênah chuan an va hrilh a. Rom mi an ni tih an hriat hnu chuan chûng mite chuan an hlau ta hle a.
39 Tichuan, lo kalin Paula leh Sila chu ngaihdam an rawn dîl a, an hruai chhuah hnuah khua aṭanga chhuak tûrin an ngên a.
40 Nimahsela, tân in aṭanga an chhuah hnu chuan Ludi inah an kal a. Tin, unaute an hmuh chuan an fuih a, an chhuak ta a.
Footnote-te
^ Thu Har Hrilhfiahna en rawh.
^ Hei hi Pathian hnên aṭanga Isua dawn thlarau thianghlim a ni.
