Tirhkohte Thiltih 5:1-42
5 Nimahsela, Anania leh a nupui Saphiri chuan an ram an hralh a.
2 Anania chuan a nupui hriatpuiin an hralhna sum ṭhenkhat chu a zêp ṭhen a, a bâk zawng chu rawn lain tirhkohte ke bulah chuan a rawn dah a.
3 Nimahsela, Petera chuan: “Anania, thlarau thianghlim bum tûr leh ram man zêp ṭhen tûrin, engvângin nge Setana i inthununtîr?
4 I hralh hma khân ram chu i ta a ni lo vem ni? I hralh hnuah pawh i hralhna sum chu i kutah a awm lo vem ni? Engtin nge hetiang thil sual tih hi i ngaihtuah theih? Mihring hnêna dâwt sawi i ni lo va, Pathian hnêna dâwt sawi i ni zâwk e,” a ti a.
5 Chûng thute a hriat chuan Anania chu a tlu a, a thi ta a. Tin, chumi chungchâng hriate chuan an hlau ta êm êm a.
6 Tichuan, tlangvâlte chu an tho va, a ruang chu puana tuamin an zâwn chhuak a, an phûm ta a.
7 Tin, chu thil a thlen aṭanga dârkâr thum hnu vêlah, a nupui chu thilthleng eng mah hre lovin a lo lût a.
8 Petera chuan a hnênah: “Min hrilh rawh, ram chu heti zât chauh hian maw in hralh?” a ti a. Ani chuan: “Aw, khati zât khân a ni,” a ti a.
9 Petera chuan a hnênah: “Engvângin nge Jehova thlarau fiah tûra in inthurual? Kawngkhâr pâwn lama ke pên ri chu i hria em? I pasal phûmtute ke pên ri a nih chu, nang pawh an zâwn chhuak ang che,” a ti a.
10 Chu veleh, a ke bulah chuan tluin a thi ta nghâl a. Tlangvâlte an lo luh chuan, ani chu thiin an rawn hmu a; tichuan, an zâwn chhuak a, a pasal bulah an phûm ta a.
11 Kohhran pum pui leh chumi chungchâng hretu zawng zawngte chuan an hlau ta hle a.
12 Chu bâkah, tirhkohte chuan mite zîngah chhinchhiahnate leh thil mak tam tak an ti zawm zêl a; tin, Solomona Hulhliapah chuan an vaiin an inhmu khâwm ṭhîn a.
13 Nimahsela, mi dang tu mah an zîngah an tel ve ngam lo; chutih rualin, mite’n anni chu an fak hle a ni.
14 Chu mai bâkah, Lalpa ringtu a hmei a pa tam tak an pung zêl a.
15 Tichuan, dam lote chu kawngpuiah an rawn zâwn chhuak a, chutah chuan Petera a kal paha a hlimthla talin an zînga ṭhenkhat a hliah theih nân, khum têahte leh pherahte an muttîr a.
16 Tin, Jerusalem chhehvêla awm khuate aṭangin dam lote leh ramhuaiin a tihbuaite hruaiin mi tam tak an lo kal a; tichuan, an vaiin an lo dam ta vek a.
17 Nimahsela, puithiam lalber leh Saddukaite zirtîrna pawmtu a hnêna awm zawng zawng chu an tho va, îtsîknain an lo khat a.
18 Tichuan, tirhkohte chu an man a, vântlâng tân inah an khung a.
19 Mahse, zânah Jehova vântirhkohvin tân in kawngkhârte chu hawngin a hruai chhuak a, an hnênah:
20 “Kal ula, biak inah dingin, nunna chungchâng thu zawng zawng hi mite hnênah va sawi zêl rawh u,” a ti a.
21 Chu thu an hriat hnu chuan, khawvâr veleh biak inah lûtin an zirtîr ṭan ta a.
Chutih lai chuan, puithiam lalber leh a hnêna awmte chuan, Sanhedrin-a* rorêltute leh Israel mite zînga upaho zawng zawng chu an ko khâwm a; tichuan, tirhkohte chu an hmaa rawn hruai tûrin tân inah chuan vêngtute an tîr a.
22 Nimahsela, vêngtute an va thlen chuan anni chu tân inah chuan an hmu lo va; tichuan, lêt lehin heti hian an va sawi a:
23 “Tân in chu him taka inkalh leh vêngtute pawh kawngkhâr bula dingin kan hmu a; nimahsela, kan hawn chuan a chhûngah tu mah kan hmu lo,” tiin.
24 Biak in hotu leh puithiam lalte’n chûng thute an hriat chuan, chumiin a thlen theih tûrte ngaihtuahin an mangang ta hle a.
25 Nimahsela, tu emaw lo kalin, an hnênah: “En teh u! Tân ina in khungte khân biak inah dingin mite an zirtîr a nia,” tiin a rawn hrilh a.
26 Tin, biak in hotu chu a hote nên an kal chhuak a, anni chu an rawn hruai a; nimahsela, mipuiin lunga an den an hlauh avângin tharum an hmang lo.
27 An rawn hruai chuan Sanhedrin hmaah an dintîr a. Tin, puithiam lalber chuan zawhna zâwtin,
28 an hnênah: “He hminga zirtîr tawh lo tûr hian khauh takin thu kan pe che u a ni lâwm ni? Nimahsela, en teh u! In zirtîrna thuin Jerusalem in tihkhah vek tawh hi, he pa thihna mawh hi min phurhtîr in tum a ni,”* a ti a.
29 Petera leh tirhkoh dangte chuan ani chu chhângin: “Mihring thu aiin Pathian thu kan zâwm zâwk tûr a ni.*
30 Bana* khai kânga in tihhlum tâk Isua kha, kan pi leh pute Pathianin a kai tho va.
31 Israelte an inlamlêt theih nân leh sual ngaihdamna an dawn theih nân, Pathianin ani chu Palai Ropui Ber leh Chhandamtu niin a kut ding lamah a chawimawi ta a ni.
32 Chûng thil chu a hretute kan ni a, Pathianin an rorêltu anga amah pawmtute leh a thu zâwmtute hnêna a pêk thlarau thianghlim pawhin a hriatpui bawk,” an ti a.
33 Chûng thu an hriat chuan an thinrim hle a, tirhkohte chu tihhlum an tum ta a.
34 Nimahsela, Pharisai pakhat Gamaliela chu Sanhedrin-ah a ding a, ani chu mi zawng zawng ngaihsân Dân zirtîrtu a ni a, ani chuan tirhkohte chu pâwna chhuahtîr rih tûrin thu a pe a.
35 Tichuan, an hnênah: “Israel mite u, hêng mite chunga in thiltih tumah hian fîmkhur rawh u.
36 Tûn hma pawh khân mi pawimawh taka inngai Theoda a awm a, a pâwl chu mi 400 vêl laiin an zawm a. Nimahsela, ani chu tihhlum a ni a, amah zuitu zawng zawng pawh an darh vek a, eng mah an ni tawh lo.
37 Chu pa hnuah chuan, chhiarpui laiin Galili mi Juda kha a lo awm leh a, amah zui tûrin mite a thlêm thlu a. Ani pawh chu tihhlum a ni a, amah zuitu zawng zawng pawh an darh ta vek a.
38 Chuvângin, ka hrilh a che u, he thil thlengah pawh hian hêng mite chungah hian eng mah ti lovin chhuah zâwk rawh u. An thiltih tum leh tih mêkte hi mihring aṭanga chhuak a nih chuan a tâwp ve leh mai ang.
39 Nimahsela, Pathian aṭanga chhuak a nih erawh chuan, in titâwp thei lo vang; chuti lo chuan, Pathian ngei dodâl in lo ni hlauh palh ang e,” a ti a.
40 Tichuan, a thurâwn chu an pawm a, tirhkohte chu kovin an vua a, Isua hminga thu sawi tawh lo tûra thu pein an kaltîr ta a.
41 Tichuan, Sanhedrin hma aṭang chuan an kal chhuak a, Isua hming avânga mualpho tuar tlâka ngaih an nih avângin an lâwm hle a.
42 Nî tin biak inah leh in tinahte, Krista Isua chanchin ṭha zirtîr leh puan chhuah chu an bâng chuang lo.
Footnote-te
^ Sanhedrin chu Judate rorêlna sâng ber a ni.
^ A ngial a ngan chuan, “he mi thisen mawh hi kan chunga tlâktîr in tum a ni.”
^ A nih loh leh, “rorêltu a nih angin Pathian thu kan zâwm zâwk tûr a ni.”
^ A nih loh leh, “thing.”
