Tirhkohte Thiltih 7:1-60
7 Nimahsela, puithiam lalber chuan: “Hêng thute hi a dik em?” a ti a.
2 Stephana chuan: “Unaute leh pate u, min ngaithla teh u. Ropuina Pathian chu kan pu Abrahama hnênah Haran khuaa a awm hma, Mesopotamia rama a awm laiin a inlâr a,
3 a hnênah: ‘I ram leh i chhûngkhatte hnên aṭang hian kal chhuak la, ram ka la entîr tûrah che chuan kal rawh,’ a ti a.
4 Tichuan, Kaldaiho ram aṭang chuan kal chhuakin Haran khuaah a va awm ta a. A pa thih hnuah, chuta ṭang chuan Pathianin tûna in awmna ramah hian a insawntîr leh a ni.
5 Chutih lai chuan, Pathianin rochan tûr eng mah, a ke nghahna tham lek pawh a la pe lo va; nimahsela, fa a la nei lo chung pawhin, amah leh a hnua a thlahte ro atân he ram hi pêk a tiam a ni.
6 Nimahsela, Pathianin a hnênah a thlahte chu mi ramah mikhual* an la nih tûr thu leh, mite’n kum 400 chhûng salah siama an la tihduhdah tûr thu a hrilh a.
7 Tin, Pathianin, ‘Sala an tânna tûr hnam chu ro ka rêlsak ang a, chumi hnuah chuan an lo chhuak ang a, he hmunah hian ka hnênah rawngbâwlna thianghlim an hlân ang,’ tiin a sawi bawk.
8 “Pathianin a hnênah serhtan thuthlung a pe bawk a. Tin, Abrahama’n Isaaka a neih hnuah a ni riat nîah a serh a tansak a, Isaaka chuan Jakoba a nei a, Jakoba chuan thlahtu 12-te kha a nei a.
9 Tin, thlahtute chuan Josefa an îtsîk a; tichuan, Aigupta ramah an hralh a. Nimahsela, a hnênah Pathian a awm a.
10 A hrehawm tawrhna zawng zawngah a chhan chhuak a, Aigupta lal Pharaoa duhsak hlawhtîrin, a hmaah a finzia lantîr theihna hun a pe a. Pharaoa chuan ani chu Aigupta ram awptuah leh a lal in enkawltuah a ruat a.
11 Tin, Aigupta leh Kanaan ram zawng zawngah chuan ṭâm a lo tla a, hrehawm nasa tak a lo thleng a, kan pi leh pute chuan ei tûr rêng rêng an hmu thei ta lo va.
12 Jakoba’n Aigupta ramah buh a awm tih a hriat chuan, kan pi leh pute chu a vawi khat nân a tîr chhuak a.
13 A vawi hnihnaah chuan, Josefa chu a unaute hnênah a inhriattîr a; tin, Josefa chhûngte chu Pharaoa’n a lo hre ta a.
14 Tichuan, Josefa’n a pa Jakoba leh a chhûngte zawng zawng chu Kanaan ram chhuahsan a, Aigupta rama kal tûrin thu a thawn a, chuta kal zât chu mi 75 an ni.
15 Tin, Jakoba chu Aigupta ramah chuan a chhuk a, chutah chuan a thi a, kan pi leh pute pawh chutah chuan an thi a.
16 An ruhte chu Sekem thlengin an zâwn a, chutah chuan Abrahama’n Sekem khuaa Hamora fapate hnên aṭanga tangkaraw pawisaa a lei thlânah chuan an phûm ta a.
17 “Pathianin Abrahama hnêna a puan chhuah a thutiam a lo thlen dâwn hnaihah chuan, Israel mite chu Aigupta ramah chuan nasa takin an lo pung ta a,
18 Josefa hre lo lal dang Aigupta rama a lo lal thleng khân.
19 Chu lal chuan kan pi leh pute chungah thil ṭha lo tak tiin, an nausênte an dam chhuah loh nâna paih tûrin thu a pe a.
20 Chutih lai chuan Mosia a lo piang a, ani chu a duhawm hle a,* a nu leh pate’n thla thum chhûng an inah an enkawl a.
21 Nimahsela, a nu leh a pate’n loh theih loh avânga an paih tâk hnu chuan Pharaoa fanuin a la a, a fapa angin a enkawl ta a.
22 Tin, Mosia chu Aigupta mite finna zawng zawng zirtîr a ni a. Ani chu thusawi thiam tak niin thil ropui tak takte a ti a.
23 “Tin, kum 40 a tlin chuan a unau Israel mite chu tlawh a tum ta a.
24 An zînga pakhat tihduhdah tuar lai a hmuh chuan a chhan a, tihduhdah tuartu phuba chu lain Aigupta mi chu a tihlum ta a.
25 Ani chuan Pathianin amah hmangin anni chu a chhandam dâwn tih a unaute chuan an hriat a ring a; nimahsela, an hre si lo va.
26 A tûkah chuan, an hnênah a kal leh a, mi pahnih insual lai a va hmu a, anni chu inremtîr tumin: ‘Unau in nih kha, engvângin nge in insual?’ a ti a.
27 Nimahsela, a ṭhenawm kutthlâktu zâwk chuan Mosia chu nam sawnin: ‘Tuin nge kan chunga rorêltuah leh hotuah ruat che?
28 Nimina Aigupta mi i tihhlum ang khân min tihhlum ve i tum a ni maw?’ a ti a.
29 Chu chu a hriatin Mosia chu a tlân bo va, Midian ramah ram dang mi angin a chêng a, chutah chuan fapa pahnih a nei a.
30 “Kum 40 a liam hnuah Sinai Tlâng bul thlalêra hnim buk alhah vântirhkoh pakhat a hnênah a inlâr a.
31 Mosia’n chu chu a hmuhin a thil hmuh chu mak a ti hle a. En fiah tûra a va pan hnaih chuan Jehova awin:
32 ‘Kei hi i pi leh pute Pathian, Abrahama te, Isaaka te leh, Jakoba te Pathian ka ni,’ tia a sawi chu a hria a. Tin, Mosia chu a khûr a, a enfiah zawm ngam ta lo va.
33 Jehova chuan a hnênah: ‘I pheikhawk kha phelh rawh, i dinna kha hmun thianghlim a ni si a.
34 Aigupta rama ka mite rah beha an awm chu chiang takin ka hmu a, an rûm rî pawh ka hria a ni, anmahni chhan chhuak tûrin ka lo chhuk a nih hi. Ti teh, Aigupta ramah ka tîr ang che,’ a ti a.
35 Chu Mosia chu: ‘Tuin nge hotuah leh rorêltuah ruat che?’ tia an hnâwl tâk ngei kha a ni a, hnim buka a hnêna vântirhkoh inlâr hmangin, Pathianin hotu leh chhan chhuaktu ni tûrin a tîr a ni.
36 Mosia chuan kan pi leh pute chu Aigupta ram aṭangin a hruai chhuak a, ani chuan Aigupta ramah te, Tuipui Senah te leh, thlalêra kum 40 an awm chhûngte khân thil makte leh chhinchhiahnate a ti a.
37 “Chu Mosia chu Israel mite hnêna: ‘Pathianin in unaute zîng aṭangin keimah ang zâwlnei hi a la ruatsak ang che u,’ tia sawitu kha a ni.
38 Ani chu thlalêra Israel mite zînga awm, Sinai Tlânga amah betu vântirhkoh leh kan pi leh pute bula awm kha a ni a. Ani chuan Pathian thu nungte a hria a, in hnênah a hlân chhâwng a ni.
39 Kan pi leh pute chuan a thu an zâwm duh lo va, ani chu hawisanin an thinlungin Aigupta rama lêt leh a duh a.
40 Arona hnênah: ‘Min hruaitu tûr pathiante min siamsak rawh. Aigupta aṭanga min hruai chhuaktu Mosia lah hi a chungah eng nge thleng kan hre si lo,’ an ti a.
41 Tin, chûng lai chuan bâwng no lem an siam a, milem hmaah chuan inthawina an hlân a, an thil siam chu lâwmin ruai an ṭheh a.
42 Tichuan, Pathianin anni chu a hawisan a, vâna thil awm nî te, thla te leh, arsite an biak theih nân a kalsan ta a, Zâwlneite lehkhabua: ‘Aw, Israel mite u, thlalêrah khân kum 40 chhûngin ka hnênah thil hlan leh inthawinate in hlân em ni?
43 Nimahsela, Moleka puan in leh chibai bûk atâna in siam arsi pathian Rephana lim chu in zâwn ṭhîn a. Chuvângin, Babulon piah lamah ka hnawt bo vang che u,’ tia a inziak ang khân.
44 “Kan pi leh pute’n thlalêrah khân Pathianin a awmpui tih târ langtu puan in an nei a, chu chu Pathianin Mosia a biak laia a lem a hmuhtîr ang chiaha siam a ni.
45 Tin, kan pi leh pute khân chu chu chhawm zêlin, Pathianin an hmaa a hnawh chhuah tâk hnamte awmna ramah khân Josua hovin an luhpui a, chu chu Davida hun thleng khân hetah hian a awm reng a ni.
46 Davida chuan Pathian duhsak a hlawh a, ani chuan Jakoba Pathian tân in sak a duh thu a sawi a.
47 Nimahsela, amah ni lovin Solomona’n in chu a sa ta zâwk a ni.
48 Amaherawhchu, Chungnungbera chu kuta sak inahte a awm lo, zâwlneiin:
49 ‘Jehova’n heti hian a ti: “Vân hi ka lalṭhutthlêng a ni a, lei hi ka ke nghahchhan a ni. Eng ang in nge mi saksak ang? Ka chawlhna hmun pawh khawiah nge?
50 Hêng zawng zawng hi ka kuta ka siamte an ni lo vem ni?”’ tia a sawi ang khân.
51 “Mi luhlul, beng chhu ngawng leh thinlung sak takte u,* thlarau thianghlim in dodâl fo ṭhîn, in pi leh pute’n an tih ṭhin ang khân.
52 Zâwlneite zîngah in pi leh pute’n an tihduhdah loh tu nge awm? Mi fel tak lo kal tûr puang lâwktute chu an tihlum a, tûnah chu mi fel tak phatsantute leh tihlumtute in lo nih tâk hi.
53 Pathianin vântirhkohte hmangin Dân a pe che u a; nimahsela, in zâwm si lo,” a ti a.
54 Tin, chûng thute an hriat chuan an thinur ta hle a, Stephana chu an ha an ṭhial khum a.
55 Nimahsela, Stephana chu thlarau thianghlimin a lo khat a, vân lam a thlîr reng a, Pathian ropuizia leh Pathian ding lama Isua ding a hmu a.
56 Tin, ani chuan: “En teh u! Vânte inhawng leh Pathian ding lama mihring Fapa ding ka hmu,” a ti a.
57 Chu veleh an theih tâwpa ringin an au va, an beng an hup a, ani chu an pan khâwm ta nghâl a.
58 Khawpui pâwna an hruai hnuah, lungin an dêng a. Thuhretu derte chuan an kawrfualte chu tlangvâl pakhat Saula ke bulah an dah a.
59 Tin, an den laiin Stephana chu: “Lalpa Isu, ka nunna* ka kawltîr a che,” tiin a ṭawngṭai a.
60 Tichuan, a ṭhingṭhi a, ring taka auvin: “Jehova, an thil sual tih mawh hi phurhtîr suh ang che,” a ti a. Chu thu a sawi zawh chuan thihnaah a muhîl ta a.
Footnote-te
^ A nih loh leh, “ram dang mi.”
^ A nih loh leh, “Pathian mit hmuhin a duhawm.”
^ A ngial a ngan chuan, “thinlung leh beng serhtan lohte.”
^ A nih loh leh, “thaw.” A ngial a ngan chuan, “thlarau.”
