Tirhkohte Thiltih 8:1-40
8 Saula pawhin Stephana tihhlum chu a remti a.
Chumi nî aṭang chuan Jerusalema awm kohhrana unaute chungah nasa taka tihduhdahna a lo inṭan a; tirhkohte tih loh, mi dang zawng zawng chu Judai leh Samari ram hmun tinah an darh ta vek a.
2 Nimahsela, Pathian ngaihsak tute emawin Stephana ruang chu lain an phûm a, nasa takin an ṭah a.
3 Saula erawh chuan kohhrana unaute chu nasa takin a bei ṭan ta a. In tinah luh khungin, a hmei a pain a hnûk chhuak a, tân inah a khung ṭhîn a.
4 Nimahsela, kal darh tate khân an kalna hmun apiangah chanchin ṭha an hril zêl a.
5 Tin, Philipa chu Samari khawpuiah a chhuk a, an hnênah Krista chanchin a puang a.
6 Tin, mipuite chuan Philipa thusawi chu rilru hmun khat puin an ngaithla a, a thil mak tihte chu an hmu bawk a.
7 Mi tam takin ramhuai an pai a, chûng ramhuaite chu ring taka auvin an lo chhuak a. Chu bâkah, zeng leh kebai tam tak tihdam an lo ni ta a.
8 Tichuan, chu khuaa awmte chu an lâwm hle a.
9 Tin, chu khuaah chuan mi pakhat Simona a awm a, ani chu mi ropui takah a inchhâl a, dawi thil a tih ṭhinte chu Samari rama awmte chuan mak an ti ṭhîn hle.
10 Mi zawng zawng, mi hnuaihnung ber aṭanga mi ropui ber thlengin ani chu an ngaihsak ṭhîn a: “He paah hian Pathian Thiltihtheihna Ropui Tak a awm a ni,” an ti a.
11 Tin, a dawi hmanga hun rei tak chhûng mak ti taka a lo siam tawh ṭhin avângin, anni chuan an ngaihsak hle a.
12 Nimahsela, Pathian Ram chanchin ṭha leh Isua Krista hming puangtu Philipa an rin hnu chuan, a hmei a pain baptisma an chang ta a.
13 Simona ngei pawh chu ringtu a lo ni a, baptisma a chan hnuah Philipa hnênah a awm reng a; tin, Philipa thil mak tihte leh thil ropui tak tak tihte a hmuh chuan mak a ti hle a.
14 Tin, Jerusalema awm tirhkohte chuan Samari rama mite’n Pathian thu an pawm ta tih an hriatin, an hnênah Petera leh Johana an tîr a.
15 Anni chu Samari ramah chuan an zuk kal a, an thlen chuan thlarau thianghlim an dawn theih nân an ṭawngṭaisak a.
16 Lalpa Isua hminga baptisma chang chauh an la ni a, an zînga tu mahin thlarau thianghlim an la dawng si lo.
17 Tichuan, Petera leh Johana chuan an chungah an kut an nghat a, thlarau thianghlim an dawng ta a.
18 Tirhkohte’n an chunga kut an nghahna apiangte’n thlarau thianghlim an dawng zêl tih a hmuhin, Simona chuan tirhkohte hnênah pawisa pêk a tum a.
19 Ani chuan: “An chunga kut ka nghahna apiangte’n thlarau thianghlim an dawn ve theihna tûrin he thuneihna hi min pe ve rawh u,” a ti a.
20 Nimahsela, Petera’n a hnênah, “Pathian thilthlâwnpêk pawisaa lei theih i inrin avângin, i pawisa kha i ruala tihboralin awm rawh se.
21 He thilah hian tel vena leh chanvo rêng i nei lo ve, Pathian mit hmuhah i rilru put hmang a dik si lo va.
22 Chuvângin, sim la, i kawng ṭha lo zawhte hi bânsan rawh. Jehova’n a ngaihdam theih nân che ṭawngṭaiin, i ngaihtuahna ṭha lo hi thlâk ang che;
23 tûr ang mai i ni tih leh fel lohna bâwih i ni tih ka hria,” a ti a.
24 Simona’n anni chu chhângin: “In sawi tâkte kha eng mah ka chunga a thlen loh nân, Jehova hnênah ṭawngṭaiin min dîlsak rawh u,” a ti a.
25 Tichuan, hmun tina kim chang taka thu an hril hnuah leh Jehova thute an sawi hnuin, Jerusalemah an haw leh a, an haw pahin Samari mite chênna khaw tam takah thu an hril zêl a.
26 Tin, Jehova vântirhkohvin Philipa a bia a, a hnênah: “Tho la, chhim lama awm Jerusalem aṭanga Gaza pan thlâkna kawngah khân kal rawh,” a ti a. (Chu chu thlalêr kawng a ni.)
27 Tichuan, a tho va, a kal ta a; tin, chutah chuan Ethiopia mi, mi tilreh, Ethiopia lalnu Kandaki hnuaia thuneihna sâng tak nei, a ro zawng zawng enkawltu a hmu a. Ani chu Jerusalema Pathian be tûra kal a ni a,
28 a haw lamah chuan a tawlailîrah ṭhuin, zâwlnei Isaia thuziakte chu a riin a chhiar a.
29 Tin, thlarau thianghlim chuan Philipa hnênah: “Kal la, tawlailîr saw va hnaih rawh,” a ti a.
30 Philipa chu a sîrah a va tlân a, zâwlnei Isaia thuziakte a ria a chhiar chu a hria a, a hnênah: “I thu chhiarte kha i hre thiam em?” a ti a.
31 Ani chuan: “Tu ma mi hrilhfiah lohvin engtin nge ka hriatthiam theih ang?” a ti a. Tichuan, Philipa chu a bula ṭhu tûrin a sâwm a.
32 Tin, Pathian Lehkha Thu a chhiar lai chu hei hi a ni: “Berâm ang maiin talh tûra hruai a ni a, berâm no a hmul mêttu hmaa ngawi renga a awm angin ani chuan a kâ a âng lo.
33 Tihmualphova a awm chhûngin dik lo taka rorêlsak a ni a. Amah thlahtute chungchâng chu tuin nge sawi ang? Lei aṭanga a nunna lâk bo a ni si a,” tih hi.
34 Tin, mi tilreh chuan Philipa hnênah: “Khawngaihin min han hrilh teh. Zâwlnei hian tu chungchâng nge a sawi? Ama chungchâng nge ni a, mi dang chungchâng?” a ti a.
35 Philipa chuan a thu lo chhiar lai mêk aṭanga ṭanin, Isua chungchâng chanchin ṭha a hnênah a hrilh a.
36 Tin, kawnga an kal lai chuan tui awmna hmun an thleng a, mi tilreh chuan: “En teh! Heta hi tui a awm e; baptisma ka channa tûr engin nge mi dâl?” a ti a.
37 ——
38 Tichuan, tawlailîr chu tiding tûrin thu a pe a, Philipa leh mi tilreh chu tuiah chuan an zuk chhuk a; tin, Philipa chuan ani chu a baptis ta a.
39 Tui aṭanga an chhuah chhoh chuan, Jehova thlarauvin Philipa chu a la bo ta nghâl a, mi tilreh chuan a hmu leh ta miah lo va; nimahsela, lâwm takin a kal zêl a.
40 Philipa erawh chu Asdod khuaah a kal a, Kaisari khua a thlen hma loh chuan khaw tinah chanchin ṭha a hril zêl a.
