Tirhkohte Thiltih 9:1-43
9 Saula erawh chuan, Lalpa zirtîrte vauna thu leh thah a tum thu a la sawi reng a, puithiam lalber hnênah kalin,
2 Lalpa Kawnga* kal a hmuh apiangte chu, a hmei a paa phuar chunga Jerusalema a hruai theihna tûrin, Damaska khuaa inkhâwmna intea pêk tûr lehkhate a dîl a.
3 Tin, Damaska khaw pana a kal lai, a thlen dâwn hnaihin thâwklehkhatah vân aṭangin êngin a rawn chhun a.
4 Tichuan, leiah a tlu a, awin a hnêna: “Saula, Saula, engvângin nge mi tihduhdah?” tia a sawi chu a hria a.
5 Ani chuan: “Lalpa, tu nge i nih?” tiin a zâwt a. Chu aw chuan: “Isua, i tihduhdah hi ka ni.
6 Nimahsela, tho la, khuaah lût la, i tih tûr hrilh i ni ang,” a ti a.
7 Tin, a hnêna kal vete chu sawi tûr hre lovin an ding reng a, aw chu hre mah se, tu mah an hmu si lo.
8 Saula chu lei aṭang chuan a tho va, meng mah se, eng mah a hmu thei ta lo va. Tichuan, a kutah kaiin, Damaska khuaah an hruai lût a.
9 Ni thum chhûng khaw hmu lovin a awm a, eng mah a eiin a in hek lo.
10 Damaska khuaah chuan zirtîr pakhat Anania a awm a, Lalpa’n inlârnain a hnênah: “Anania!” a ti a. Ani chuan: “Lalpa, heta hi ka awm e,” a ti a.
11 Lalpa chuan a hnênah: “Tho la, kawtthlêr, ‘Ngîl,’ an tihah kal la, Juda ina awm Tarsa khaw mi Saula va zawng rawh. Ngai teh! Ani chu a ṭawngṭai mêk a,
12 khua a hmuh leh theih nâna a chunga i kut i nghat lai inlârnaah a hmu a ni,” a ti a.
13 Nimahsela, Anania chuan: “Lalpa, chu pa chuan Jerusalema i mi thianghlimte a tihduhdah nasatzia mi tam takin an sawi ka hria a ni.
14 Tin, hetah pawh i hming lamtu zawng zawngte a man* theihna tûrin, puithiam lalte hnên aṭangin phalna a nei bawk,” a ti a.
15 Nimahsela, Lalpa chuan a hnênah: “Kal mai rawh! Ani chu hnamte hnênah te, lalte hnênah te leh, Israel mite hnênahte ka chanchin puang tûra ka thlan a ni si a.
16 Ka hming avânga hrehawm a tawrh tûr zawng zawngte chiang takin ka hmuhtîr dâwn a ni,” a ti a.
17 Tichuan, Anania chu a kal a, inah chuan a va lût a, a chungah kut nghatin: “Ka unaupa Saula, i lo kal lama kawnga i hnêna inlâr Lalpa Isua khân, khua i hmuh leh theih nân leh thlarau thianghlima i khah theih nân, i hnênah hian min rawn tîr a ni,” a ti a.
18 Thâwklehkhatah a mit aṭangin phuhlip ang tak hi a tla a; tichuan, khua a lo hmu leh thei ta a. Tin, a tho va, baptisma a chang a,
19 chaw a ei a, a lo chak ṭha leh ta a.
Damaska khuaah chuan zirtîrte hnênah ni eng emaw zât a châm a,
20 inkhâwmna inahte chuan Isua chu Pathian Fapa a nih thu a puang ta nghâl a.
21 A thusawi hretu zawng zawng chuan mak an ti hle a: “He pa hi Jerusalema Isua hming lamtute chunga hrehawm tam tak thlentu kha a ni lo vem ni? Heta a lo kal chhan pawh anmahni man a, puithiam lalte hnêna hruai* a ni lo vem ni?” an ti a.
22 Nimahsela, Saula chu a lo chak zual deuh deuh va, Damaska khuaa Juda awmte chu, Isua chu Krista a nih thu fiah taka hriattîrin a hnial dang ṭhîn a.
23 Tin, ni tam tak a liam hnuah, Judate chuan amah tihhlum tumin an phiarru a.
24 Nimahsela, amah an phiarrûkna thu chu Saula’n a lo hria a. Tin, amah an tihhlum theih nân, khawpui kulh kawngkhârahte chuan a chhûn a zânin an châng ṭhîn a.
25 Chuvângin, a zirtîrte chuan ani chu an hruai a, zânah kulh tukverhah bâwmin an thlâk thla a.
26 Jerusalem a thlen chuan, zirtîrte zînga tel a tum a; nimahsela, anni chuan zirtîr a nih an rin loh avângin, an vaiin an hlau va.
27 Tin, Barnaba chu amah ṭanpui tûrin a lo kal a, tirhkohte hnênah hruaiin, kawnga Lalpa a hmuh dân te, Lalpa’n a biak dân te leh, Damaska khuaa Isua hminga huai taka thu a sawi dânte chu chipchiar takin an hnênah a hrilh a.
28 Tichuan, Saula chu an hnênah a awm reng a, Jerusalemah zalên taka lût chhuakin, Lalpa hmingin huai takin thu a sawi ṭhîn a.
29 Ani chuan Grik ṭawng hmang Judate hnênah thu sawiin, anni chu a hnial ṭhîn a; chuvâng chuan, tihhlum an tum phah ta a.
30 Unaute’n chu chu an hriatin, Kaisari khuaah an hruai thla a, Tarsa khuaah an kaltîr a.
31 Tichuan, Judai ram te, Galili ram te leh, Samari ramtea kohhran zawng zawng chu thlamuang taka awmin an nghet deuh deuh va. Ṭih chunga Jehova rawng an bâwl avâng leh, thlarau thianghlim thlamuanna avângin an lo pung ta zêl a.
32 Tin, Petera chu ram zawng zawng fanga a zin kual pahin, Ludda khuaa awm zirtîrte hnênah a zuk kal a.
33 Chutah chuan mi pakhat Ainia, a zen avânga kum riat lai khuma mu tawh a zuk hmu a.
34 Petera chuan a hnênah: “Ainia, Isua Krista’n a tidam a che. Tho la, i khum kha siam rawh,” a ti a. Tichuan, a tho ta nghâl a.
35 Ludda leh Saron phaia chêng zawng zawngte’n Ainia chunga thilthleng an hmuh chuan, Lalpa ringtute an lo ni ta a.
36 Tin, Joppa khuaah chuan zirtîr pakhat Tabithi a awm a, chu chu lehlin a nih chuan, “Dorki,”* tihna a ni. Ani chuan thil ṭha tam tak tiin, khawngaih thilthlâwnpêk tam tak a pe ṭhîn a.
37 Ludda khuaa Petera a awm lai chuan Dorki chu a dam lo va, a thi ta a. Tichuan, an bual fai a, in chung pindanah an zalh a.
38 Ludda khua chu Joppa khaw bul lawka awm a ni a, zirtîrte’n chu khuaah chuan Petera a awm tih an hriatin: “Khawngaihin kan hnênah lo kal thuai rawh,” tia ngên tûrin a hnênah mi pahnih an tîr a.
39 Tin, Petera chu a tho va, an rualin a kal ta a. A va thlen chuan in chung pindanah an hruai a, Petera bulah chuan hmeithai zawng zawng an awm a, Dorki’n a dam laia kawr leh kawrfual a siamsakte chu ṭap chungin an lo hmuh a.
40 Tin, Petera chuan an vaiin a chhuahtîr vek a, ṭhingṭhiin a ṭawngṭai a. Tichuan, ruang lam chu a hawi a: “Tabithi, tho rawh!” a ti a. Tabithi chu a lo meng a, Petera a hmuh chuan a lo ṭhu chhuak ta a.
41 Petera chuan banin a kaitho va; tichuan, mi thianghlimte leh hmeithaite chu a ko va, anni chuan Tabithi chu a nung leh tih an rawn hmu a.
42 Chu chu Joppa khaw pum puiin an hre ta vek a, mi tam tak Lalpa ringtu an rawn ni ta a.
43 Petera chu Joppa khuaah chuan savun siamtu Simona inah hun eng emaw chen a châm a.
Footnote-te
^ Hei hian Kristian nun kawng leh zirtîrna a kâwk a ni.
^ A ngial a ngan chuan, “phuar; phuara dah.”
^ A ngial a ngan chuan, “phuar chunga a hruai theih nân.”
^ Grik hming Dorki tih leh Aramic hming Tabithi tih hi, “Sazuk la,” tihna ve ve a ni.
