Kum 2021 January thla khân, Governing Body chuan Bible zirna ṭanpuitu thar Chatuanin I Hlim Thei! a tih tlângzarh a nih thu a puang a. Engtin nge chu thu puan chhuah chu i lo dawnsawn? Canada rama mi Matthew-a chuan: “Ka phûr kher mai! Chu lehkhabu siam a nih chhan leh hman chhin a nih tawh dân sawifiahna thusawite leh video-te ka en lai chuan ka phûrna chu a nasa lehzual a. Hmuh leh hman theih a nih hun chu ka nghâkhlel tak zet a ni,” tiin a sawi.

 Chatuanin I Hlim Thei! tih lehkhabu hian Bible zirna kaihhruai dân thar a hmêlhriattîr a. Mahse, chu chu Bible zirna ṭanpuitu chhuak tawhte laka he lehkhabu danglamna awmchhun a ni lo. Chatuanin I Hlim Thei! tih chu a lehkhabua i hmang a nih chuan a danglamna i hre mai thei. A chhan hre tûrin, he lehkhabu siam a nih dân hi i lo bihchiang ang u.

 Lehkhapuan chhah zâwk. Engvângin nge chu chu a ngaih? Chatuanin I Hlim Thei! bu-ah hian milem 600 chuang a awm a, chu chu Min Zirtîr tih lehkhabu-a mi aiin a lêt sâwm dâwnin a tam! Lehkhabu tharah hian thuziak, a nih loh leh milem awm lohna phêk âwl a tam zâwk bawk. Hêng thil pahnihte hian harsatna a siam a ni: Lehkhapuan a pan chuan milemte chu a phêk lehlam aṭangin a hmuh theih ang. Chumi pumpelh tûr chuan, U.S.A. New York, Wallkill-a International Printing Department (IPD)-a kan unaute chuan tûna kan lehkha chhut chhuahna hmuna hman mêk lehkhapuan chi li an enchhin a. Governing Body-a Writing Committee chuan chûng an enchhin tinte chu bihchianna neiin a langtlang lo ber an thlang a ni. Kan thu leh hla chhuah tam zâwka kan paper hman aiin zaah 16 laiin to zâwk mah se, hei hian Bible zirlaite chu a phêk lehlama milem thla lang avânga buaina awm lovin Chatuanin I Hlim Thei! lehkhabu hi a chhiartîr thei a ni.

 A kâwm tuamna danglam tak. Lehkhabu thar kâwm hi a tuamna danglam tak, a nih loh leh a vênghimtu sarâng avângin kan lehkhabu dangte lakah a danglam hle. A tihtlêtna chî pângngaia tuam lovin, rawng lâr lo zâwka tuam a ni a, chu chuan a kâwma milem chu a tilangsâr lehzual a ni. A tuamna chuan hman ngun avânga a kâwm chhe mai tûr a vênghim bawk. Amaherawh chu, rawng lâr lo zâwka tuam chu a tlêa tuam aiin a lêt ngain a to zâwk thung. Chuvângin, branch hrang hrangte chu a tuamna rawng lâr lo zâwk, man tlâwm zâwka lei tûrin an thawkho a ni.

 Engvângin nge hmanraw man to zâwk thlan a nih? IPD-a thawk unaupa pakhatin heti hian a sawi: “He lehkhabu hi nasa taka hman a nih kan beisei a, chuvângin vawi tam tak hman a nih pawha a hmêl hem loh chu kan duh a ni,” tiin. Brazil branch-a, Printery Office-a thawk Eduardo-a chuan heti hian a sawi bawk: “Thawhlâwmte fing taka hman a nih ruala he lehkhabu mawi tak, tlo tak, leh hman nuam tak ni tûra hmanraw ṭha tak tak Jehova inawpna pâwlin a hmang hmuhna hian min tihlim hle,” tiin.

 Chatuanin I Hlim Thei! tih lehkhabu hi March 2021 aṭangin kan chhu chhuak ṭan a. COVID-19 hripui lên lai a nih avângin harsatnate a awm a ni. Bethel inkhârkhip a nih avângin tlâwmngaia inpete’n an rawn ṭanpui thei lo va, Bethel chhûngkaw member thar pawh sâwm luh theih an ni lo. Chuvângin, lehkha chhutna hmun ṭhenkhatahte chuan mihring an indaih lo va, a dangte chu sawrkâr khuahkhirna avângin khâr a ni bawk.

 Engtin nge hêng harsatnate hi paltlang a nih? Lehkha chhutnate hman leh theih a nih veleh, Bethel department danga unaute chu lehkha chhutnaah hun engemaw ti chhûng thawk tûra tih an ni a. IPD-a thawk unau Joel-a chuan, “An inpêkna rilru puthmang leh an chanvo thar zir an inhuamna hi he hna thawk zo tûra thil hlu tak a ni,” tiin a sawi.

 Harsatnate tâwk chung pawhin Chatuanin I Hlim Thei! tih lehkhabu chu bu maktaduai têl kan chhu chhuak tawh a. Chutianga chhu chhuak thei tûr chuan thu leh hla tihchhuah nâna hman hmanrua te, a kâwm tuamna tûr te, a lehkha te, lehkhatui te, leh a chârna te pawh tiamin, hmanraw chi hrang hrang a ngai a ni. Chhut chhuah ṭan a nih aṭanga thla nga chhûng lekin, hmaraw lei nân U.S. dollar maktaduai 2.3 chuang sên ral a ni. Sum leh pai sên titlêm tûrin kohhrante mamawh tâwk chauh lehkhabu chhu chhuak tûrin kan fîmkhur hle.

 Engtin nge Bible zirpuitute leh an zirpuite’n he Bible zirna ṭanpuitu lehkhabu thar hi an ngaih? Australia rama unau Paul-a chuan heti hian a sawi: “Chatuanin I Hlim Thei! lehkhabu hi hman nuam tak a ni, Bible zirna kaihhruai ka phûr thei hle. A bu buatsaih a nih dân hian mi a hîpin, phûrawm taka sawihona a ni tak zet. Hriattîrna chiang tak te, thinlung thlentu zawhna te, video te, milem te, chart te, leh zirlai tâna tih tum tûr te a chuang a. Thiam taka duan a nihna hian ka zirtîrnaa ka thiamna tihmasâwn tûrin min chêttîr,” tiin.

 United States-a Bible zirlai pakhat chuan: “He lehkhabu thar hi ka duh tak zet. Milemte hian a thu pawimawh laite hre thiam tûrin min ṭanpui a. Video-te hian ka thinlung a khawihin, thilti tûrin min chêttîr a ni,” tiin a sawi. He zirlai hian kâr khatah vawi hnih zirna a nei a, kohhran inkhâwmahte a tel ziah a ni.

 Chatuanin I Hlim Thei! lehkhabu hi ṭawng tam takin bu maktaduai têl chhut chhuah a la ngai a. A nihna takah chuan, Governing Body chuan tûn thleng hian, he lehkhabu hi ṭawng 710-a chhu chhuak tûrin a pawmpui tawh a, chu chu Min Zirtîr lehkhabu chhu chhuak tûra a pawmpui aiin ṭawng 340-in a tam zâwk!

 Engtin nge a chhut chhuahna sênsote chu phuhhrûk a nih? Khawvêl pum huap thawhlâwm hmangin a ni a, chûng zînga tam tak chu donate.pr418.com kal tlanga thawh a ni. Jehova chungchâng zir duhte leh ‘chatuana hlim’ duhte tâna Bible zirna ṭanpuitu ti chhuak thei tûra phal taka in thawhlâwm thawhte avângin kan lâwm tak zet a ni.—Sâm 22:26.