Jehova Thuhretute hian an Kristian unaute hi an ngaihtuah thei êm êm a. (1 Petera 2:17) Kan zînga mi tam tak chu Kenya rama unaunu Tannis-i sawi ang hi kan ni. Ani chuan, “Khawvêl pum huapa ka unau duh takte chunga thilthlengte hriat hi nuam ka ti,” tiin a sawi. Engtin nge Tannis-i leh Thuhretu dang maktaduai têlte chuan chûng chanchinte chu an hriat? Kum 2013 aṭangin kan website jw.org-a Chanchin Thar Huang tih section aṭangin chûngte chu kan hre thei a ni.

 Chanchin Thar Huang-ah chuan Bible tlâng zarhna te, chhiat tâwkte ṭanpuina te, in sakna hna te, leh thilthleng dang pawimawh tak tak te ang chî Jehova Thuhretute chungchânga chanchin rin tlâk takte pho chhuah a ni a. An rinna avânga lung in tâng kan unaute chanchinte pawh a chuang bawk. Chu bâkah, Chanchin Thar Huangah hian thuhrilhna campaign te leh Hriatrengna Inkhâwm te nêna inkûngkaih mi tichak thei tak thiltawnte pawh a tel bawk a ni. Hêng chanchin tharte hi tute’n nge zir chiang a, engtin nge an buatsaih?

 Chanchin Thar Huang hi Office of Public Information (OPI) ruahman a ni a. He department hi world headquarters-ah a awm a, Governing Body-a Coordinators’ Committee enkawlna hnuaiah hna an thawk a ni. OPI hi ziaktute, zirchîktute, lemziaktute, leh ṭawnglettute pawh tiamin thawktu unau 100 chuangte hmanga din a ni a—an zînga a tam zâwk chu tlâwmngaia inpe an ni. Mi dangte chuan sawrkâr thuneitute, mi thiamte, leh chanchinbu mite biak hna an thawk a ni. OPI hi khawvêl puma branch office-a Public Information Desks (PID) 80 chuangin a ṭanpui bawk.

 Chanchin tharte buatsaih nân OPI leh PID te nên an thawk dûn tlat a. Kan unaute’n chanchin pho chhuah tlâk nia an ngaihte an hmuh hian chu chu zir chiangin, rinchhan tlâk thute an la khâwm ṭhîn a ni. Chutah chuan biangbiakna huaihawtte leh mi thiamte kawm a tel thei a. Thu dikte an lâk khâwm zawh chuan chanchin thar chu an ziak a, an siam ṭha a, an chhiar nawn a, thlalâkte an telh a, tichuan Coordinators’ Committee hnênah pawmpui tûrin an thawn a ni.

 Kan unaute’n engtin nge Chanchin Thar Huang hi an ngaih? Philippines rama awm unaunu Cheryl-i chuan, “Jehova inawpna pâwl leh a mite chanchin chhiara, ni hman ṭan hi nuam ka ti tak zet,” tiin a sawi a ni.

 Chhiartu tam takte’n jw.org-a Chanchin Thar Huang leh media dangtea chanchin thar an hmuhte inan lohna an sawi a. Kazakhstan rama Tatiana-i chuan ti hian a sawi: “Chanchin thar jw.org-a kan hmuhte ka ring thei hi ka lâwm hle. A rin tlâk mai bâkah, a dik êm êm a ni,” tiin. Mexico rama unaunu Alma-i pawhin: “Chanchin thar danga ka hriat ṭhin chanchin ṭha lote lakah chuan Chanchin Thar Huang-a pho chhuahte chu mi tichak thei tak a ni,” tiin a sawi.

 Chanchin Thar Huang hi a rin tlâk mai piah lamah rinna tinghettu a ni bawk. Kenya rama Bernard-a chuan tihian a sawi a ni: “Chanchin Thar Huang hian khawvêl puma unaute chu khawi hmunah pawh chêng se, ka chhûngkua anga thlîr tûrin min ṭanpui a. Ka ṭawngṭainaah an hming lamin, an tân ka dîlsak theih phah a ni,” tiin. Kenya rama mi tho unaunu Bybron-i chuan: “Ṭawng danga Bible an tlâng zarh chanchin thuziak ka chhiar hian ka phûr thei lutuk! Hêng thuziakte hian Jehova’n duhsak bîk a nei lo tih min hriat nawntîr ṭhîn,” tiin a sawi.

 Unaute tihduhdahna tawrh chanchin pawhin a ṭha zâwngin nghawng a nei thei a. Kenya rama unaunu Jackline-i chuan, “An huaisenzia ka ngaihtuahna hian ka rinna a tichak tak zet a ni. Chhelna nei tûra anmahni ṭanpuitu chu hriat ka lo ṭum ṭhîn a. Ka hmuh chhuah chu hêng thil ‘pângngai’ tak—ṭawngṭaina, Bible chhiar, leh hla sak ang chî te—hian kan unaute tichak tûrin hmun pawimawh tak an chang tih hi a ni,” tiin a sawi.

 Costa Rica rama unaunu Beatriz-i ve thung chuan leilung chhiatna nêna inkûngkaih chanchin tharte hi a ngaihlu hle a. Ani chuan: “Chanchin Thar Huang hian kan inawpna pâwlin ṭanpui ngai unaute rang tak, ṭha tak, leh hmangaihna nei taka a ṭanpui dânte min hriattîr a. Chu chuan hei hi Jehova inawpna pâwl a ni tih min rinnghehtîr a ni,” tiin a sawi.

 Khawvêl puma kan unaute chanchin thar ber berte kan dawng zêl thei hi kan va lâwm tak êm! Hêng zawng zawng hi khawvêl pum huap rawngbâwlna atâna in thawhlâwmte tel lo chuan tihpuitlin theih a ni lo vang, chûng zînga a tam zâwk chu donate.pr418.com aṭanga thawh a ni. Phal taka in thawhlâwm thawhte avângin kan lâwm e.