Kum tin hian khawvêl pum huapa hunbi kima rawngbâwltute chu Petterson, New York-a, Watchtower Educational Center-a neih, Watchtower Bible School of Gilead kal tûrin sâwm an ni a. a He school-ah hian zirlaite chuan Jehova inawpna pâwla an chanvo dawn hrang hrangte ṭha leh zuala an hlen chhuah theih dân an zir a. Chu bâkah, an zirtîrna dawn chuan khawvêl puma kohhrante leh branch-te thuam ngheh leh tihchakna kawngah a ṭanpui bawk a ni.

 Gilead chu international school a ni a. Entîr nân, Kum 2019 a neih vawi 147-naah chuan ram 29-a zirlai 56-te an tel a ni. Gilead school rawn kalte chu Bethelite te, bial kantu te, missionary te, leh special pioneer ang chi hunbi kima rawngbâwlnaa telte an ni.

 Inbuatsaihna chu school inṭan hma daih aṭanga neih a ni a. Entîr nân, World Headquarters Travel Department (WHQ Travel) chuan he school-a kal tûrte thlawhna ticket a lei a. Gilead class 147-na kalte tâna Patterson thlenga kal lam leh haw lam sênso chu a chawhrualin mi pakhat tân $1,075 (U.S.) a ni. Solomon Thliarkâr aṭanga lo kal zirlaite phei chuan Patterson lo thleng tûrin thlawhna vawi li an thlâk a ngai a, an haw lamah chuan vawi thum an thlâk a ngai a ni—a belhkhâwmin kilometer 35,400 (mêl 22,000) laia thui an zin a nih chu! Chûng thlawhnate atân chuan mi pakhat tân $2,300 (U.S.) sên a ni. A tlêm thei ang bera insêngso tûrin, WHQ Travel chuan ticket man inâwm tâwk a hmuh theih nân computer hmanga ticket book-na software a hmang a. Ticket hauh a nih hnuah pawh, chu computer program chuan a man tlâwm zâwk a awm dah lo maw tiin a kâr têl, a thla têlin a la zawng zêl a ni. WHQ Travel chuan unaute pêk thlawhna chuan zin dâna hmuh airline mileage leh airline voucher-te chu ticket leinaah an hmang bawk.

 Zirlai tam tak tân United States-a rawn luh nân visa neih a ngai a. Chumi atân chuan, World Headquarters Legal Department chuan zirlai visa hmu tûrin anni chu a ṭanpui a ni. Visa man leh registration-na atân zirlai pakhat tân chawh rualin $510 (U.S.) zêl sên a ni bawk.

 Hêng zirlaite dawn zirtîrna hi engtin nge kan hlâwkpui? Hendra Gunawan-a hi Asia Chhimchhaka awm kohhran upa a ni a. A awmna kohhranah chuan Gilead zir chhuak nupa tuak khat an awm a ni. Ani chuan: “Tûn hma chuan, kan kohhranah regular pioneer thawk an awm lo. An nupa an rawn thlen hnuah erawh, an ṭhahnemngaihna leh inpêkna avângin mi dangte pawhin pioneer an thawk ṭan a. A hnu lamah chuan, kan kohhrana unaunu pakhat phei chu Lalram Chanchin Ṭha Puangtute School-ah a kal thei hial a ni,” tiin a sawi.

 Asia Chhimchhak Bethel pakhata awm Sergio Panjaitan-a chuan Gilead zirchhuakte nên hna an thawkho va. Ani chuan: “Zirtîrna an dawnte chu an tân chauh ni lovin, kan tân pawh malsâwmna a ni. Thil an va hre tak êm! Mahse, mi dangte aia challan zâwk tum aiin, an thil zir leh hriatte chu mi dangte an zirtîr zâwk a. Chu chuan thlarau lama intihchakna a thlen a ni,” tiin a sawi.

 He school atâna sênsote chu eng anga phuhrûk nge ni? Khawvêl pum huap thawhlâwm hmanga phuhrûk a ni a, a tam zâwk chu donate.pr418.com aṭanga thawh a ni. Khawvêl pum huap he school ṭanpui nâna phal taka in pêk thawhlâwmte avângin in chungah kan lâwm tak zet a ni.