Kum tin hian mi nuai tam takin baptisma an chan avângin, Pathian biakna atâna hman inte mamawhna chu a pung zêl a. Chuvângin, khawvêl puma Local Design/Construction Department-te chuan kum 2020 rawngbâwl kum chhûngin biakna atâna hman in 2,700 chuang sa thar tûr, a nih loh leh thawm ṭha tûrin ruahmanna a siam a ni. a

 Vânduaithlâk takin, hêng ruahmannate hi COVID-19 hripui hian a tikhaihlak a. Kan unaute vênhim nân leh sawrkâr dânte zawm nân, Governing Body-a Publishing Committee chuan khawvêl pum huapa in sakna zawng zawng deuhthaw chu a chawlhtîr rih a ni. Chuti chung pawhin, hri lêng kârah pawh kum 2020 rawngbâwl kum chhûng hian biakna atâna hman in 1,700 chuang sak thar leh thawm ṭhat hman a ni. Chu bâkah, branch 100 chuanga hna lian takte chu zawh fel hman a ni bawk. Kan unaute’n in sakna project pahnih zawh felna an hlâwkpui dân i lo ngaihtuah ang u.

 Cameroon branch. Douala khuaa awm branch hlui chu a têin, nasa taka siam ṭhat a ngai a ni. Publishing Committee chuan branch chu thawm ṭhat dân a ngaihtuah a; mahse, a thawm ṭhatnaah a in hlutna aia tam sênso a ngai dâwn a ni. Hmun thara in thar sak leh in ding lai leia thawm ṭhatte pawh a ngaihtuah a; mahse, engmah a hlawhtling thei chuang lo.

 Chutih lai chuan, unaute’n Douala hmâr lama awm kan Assembly Hall kiangah sawrkârin kawngpui siam a tum tih an hria a. Kawng chuan inkalpawhna a tiawlsamin, kan hmun chu hmun ṭangkai leh hlu tak a nihtîr dâwn a ni. He hmasâwnna hi branch-in a mamawh tak a ni a. Chuvângin, Governing Body chuan Assembly Hall bula hmun ruakah branch thar sak phalna chu a pe ta ni.

 Thuhretute leh pâwn lam contractor-te chuan an thawkho va—hei hian hun leh tha a tlêm thei ang ber hmangin min thawhtîr thei a ni. A nihna takah chuan, kan beisei aiin U.S. dollar maktaduai hnih chuangin kan sêng tlêm a. Bethel chhûngkua chu COVID-19 hripui lên hma lawkah in tharah chuan an insawn lût hman a ni.

 Cameroon-a bethel chhûngkua chuan chênna nuam zâwk leh hna thawhna hmun ṭha zâwk an nei a, branch thar chu Jehova thilthlâwnpêk angin an thlîr a ni. Nupa tuak khat chuan, “Rim lehzuala hna thawkin he thilpêk kan ngaihhlutna lantîr kan duh a ni,” tiin an sawi.

 Tojolabal Remote Translation Office (RTO), Mexico. Kum tam tak chhûng chu Tojolabal translation team te chuan Mexico City bula awm Central America branch-ah hna an thawk a. Mahse, Tojolabal ṭawng chu kilometer 1,000 (mêl 620) vêla hlaa awm Altamirano leh Las Margaritas khuaahte an hmang a! Chuvângin, ṭawnglettute chuan Tojolabal ṭawng tuallêng hriat chu harsa an ti a ni. Chu bâkah, branch chuan an chheh vêlah Tojolabal ṭawng lehlinna leh audio recording-tea ṭanpui thei tûr unaute zawn hmuh chu harsa a ti bawk.

 Hêngte avâng hian, Governing Body-a Writing Committee chuan RTO chu Tojolabal ṭawng hmanna hmuna sawn a duh a. Chumi atân, branch chuan in ding lai lei a, thawm ṭhat chu a rêl thlu a ni. Chutianga tih chu in thar sak leh luah hawh aiin a tlâwm zâwk a ni.

 Ṭawnglettu pakhat chuan a hlâwkpui dân heti hian a sawi: “Branch-a kum sâwm chhûng ṭawngleta ka awm chhûngin, ka ṭawng hmang chhûngkua pakhat mah ka hmu lo. Tûnah chuan kan office chu Tojolabal ṭawng hmangte awmna hmun laili takah a awm tawh a. Nî tin Tojolabal ṭawng hmangte nên kan inbe thei tawh a ni. Hei hian ṭawngkam thar tam tak min hriattîr a, ka ṭawng lehlin pawh a ṭha sâwt hlein ka hria,” tiin.

 Kum 2021 rawngbâwl kum chhûngin, dinhmunin azir chuan RTO 75 leh Bible school atâna hman tûr inte chu sak tum a ni a. New York Ramapo-a world headquarters project leh Argentina leh Italy branch-te sawnna pawh tiamin, branch project lian pariatte chu kalpui zawm zêl a ni ang a. Chu bâkah, Kingdom Hall thar 1,000 chuang mamawh belh a ni a, inkhâwmna hmun atâna hman mêk hmun 6,000 chuangte chu hman tlâk tawh loh leh thlâk ngai a nih bâkah, Kingdom Hall 4,000-te chu thawm ṭhat a ngai bawk a ni.

 Engtin nge hêng in sakna leh thawm ṭhatna atâna sumte hi kan neih theih? Cental America Branch Committee member Unau Lázaro González-a chuan Tojolabal RTO chungchâng sawiho a nih laiin, he zawhna hi a chhâng a ni. “Kan branch bial chhûngah hian, sum kan nei tam lo hle a. Chuvângin, khawvêl pum huapa kan unaute ṭanpuina tel lo chuan, tualchhûnga kan unau duh takte tâna translation office sak chu thil theih a ni lo vang. Khawvêl pum huapa unaute thawhlâwm thawhte chuan ṭawnglettute chu an ṭawng hmanna hmunahte a awmtîr thei a ni. Phal taka thawhlâwm thawhtu khawvêl puma kan unaute chungah kan lâwm tak meuh a ni,” tiin. A dik a ni, hêng in saknate kalpui a nih theih chhan chu, khawvêl pum huap rawngbâwlna atâna thawhlâwm inthawhna zârah a ni a, a tam zâwk chu donate.pr418.com aṭanga thawh a ni.