Kum 2020 March thla khân World Health Organization chuan COVID-19 hi hripui a nih thu a puang a, mi tam tak chuan kum khat hnuah he hri lêng hi a reh mai an ring a ni. Jehova Thuhretu ṭhenkhat pawh tiamin, mi maktaduai tam takte chuan he hripui vâng hian tîsa lam, rilru lam leh sum leh pai lamah hrehawm an tuar a. Engtin nge Jehova Thuhretute chu he harsatna tawh chhûng hian chhawmdâwlna kalpui tûra an inruahman?

 Jehova Thuhretute Governing Body-a Coordinators’ Committee kaihhruaina hnuaiah COVID-19 hripui chhân lêt nân khawvêl pum huapin Chhawmdâwlna Ngaihtuahtu Pâwl, DRC 950 chuang din a ni a. Dinhmun ṭhenkhatah chuan tualchhûnga unaute ṭanpui dân tûr an ruahman a, dinhmun dangah erawh chuan Thuhretute’n sawrkâr ṭanpuina pêk an dawng a ni. DRC-te chuan chhawmdâwlna nasa tak a huaihawt a ni.

 Entîr nân, Paraguay ram dinhmun hi lo ngaihtuah ta ila. Chanchinbu pakhat chuan hripui lêngin sum leh pai lama nasa taka a nghawng avângin, “Paraguay rama mi tam tak chu mahni inah ril ṭâmin an awm,” tiin a târ lang a ni. Mahse, Paraguay ramah DRC chuan chawlhkâr hnih chhûng daih tûr ei tûr te, tihthianghlimna hmanrua te, leh invawn faina tûr hmanruate awmna bâwm chu mi pali awmna chhûngkaw khat hnênah a pe dêr tawh a ni. Bâwm pakhat hlut zâwng chu $30 (U.S.) vêl zêl a ni.

 Engtin nge hêng chhawmdâwl hna thawktute hian anmahni leh mi dangte chu COVID-19 kai lo tûra an invên? Hmui tuamna an vuah a, mi dangte nêna him tâwka inhlatah an awm bawk. Chu bâkah, hmun thianghlima buatsaih, himna lama kaihhruaina zâwmtu company-te hnên aṭang chauhvin ei leh in tûr an lei a ni. Chutah chuan, ei tûr dahna bâwm buatsaihtu zawng zawngte’n invênhimna thuam an inbel em tih te, an lîrtheite chu natna inkaichhâwn theih loh tûrin an tifai em tih te, leh ei tûr dahna bâwmte chu hmun tihfaisaahte an dah em tihte a tel a. A tâwp berah, chûng bâwm rawn dahtute chu a dawngtu unaute nên a him tâwka inhlatin an awm bawk.

 Kum 2021 January thlaah Coordinators’ Committee chuan COVID-19 tuarte chhawmdâwl nân U.S. dollar maktaduai 25 hman a remti a. Branch-te leh DRC-te chuan chûng thawhlâwmte chu fîmkhur taka hmang tûr leh thil lei ngaite a man tlâwm thei ang bera lei tûrin theih tâwp an chhuah a ni. Entîr nân, Chile rama unaute chuan chhawmdâwlna atân dâl kg 750 (1,653 lb) lei tûrin ruahmanna an siam a. Mahse, dâl man chu thla khat chhûng lekin a lêtin a to! Dâl chu man to zâwka lei tûra an inbiakrem hnu dârkâr hnih lekah, dâwr neitu chuan dâl leitu dangin a leisa a rawn dah lêt leh thu unaute chu a hrilh a. Chuvângin, an inbiakrem tawhsa anga man to taka leitîr aiin, chûng dâl an rawh dah lêt lehte chu thla hmasaa a zawrhna angin man tlâwm zâwkin a leitîr a ni!

 Mahse, kan unaute dâl la tûra an va kal chuan dâwr neitu chuan pâwl dangte tih ṭhin anga thlei bîk neia ei tûr sem tumah puhin leitîr leh loh a tum a. Kan unaute zînga pakhat chuan rilru ṭawngṭaina tawi tê a neih hnuah, kohhran tina a mamawh tak zettute zir chian an nih tawh thu dâwr neitu chu a hrilh a. Chu bâkah, unaute chuan a dawngtute chu ṭobul hrang hrang an nih avângin ei tûr bâwmte chu a dawngtu tûrte tâna ṭangkai ber a nih tûr thu an hrilh bawk a. A tâwp berah, dâwr neitu hnênah chuan sum leh paite leh a thawktute chu tlâwmngaia inpe Jehova Thuhretute hnên aṭanga neih a nih thu an hrilh a. A rilru a khawih êm avângin dâwr neitu chuan dâl man a tih tlâwmsak mai bâkah, ni danga an chah lehnaah dâl kg 400 (882 lb) thawhlâwm atân a thawh hial a ni.

 Liberia rama hmeithai pitar Lusu-i te chhûngkua chu mi paruk an ni a. Ni khat chu tûk ṭhuan an ei paha ni châng an chhiar laiin, Lusu-i tupa kum sarih mi chuan ei tûr an nei tawh lo tih a hria a. “Eng nge kan ei ang?” a ti a. A pi Lusu-i chuan ṭanpuina dîla a ṭawngṭai tawh avângin Jehova’n ei tûr a pe ang tih a rin tlat thu a hrilh a ni. Chumi tlai chuan, Lusu-i chuan kohhran upate hnên aṭangin phone call a dawng a, chhawmdâwlna ei tûr ṭhenkhat la tûrin an hrilh a ni. Ani chuan tihian a sawi: “Ka ṭawngṭaina a chhân avângin Jehova chuan ṭawngtainate a ngaithlain a chhâng thei a ni tih ka tupa chuan a hre ta,” tiin.

 Democratic Republic of Congo rama nu pakhat chu Thuhretu chhûngkaw khat ṭhenawmah a chêng a. Thuhretu chhûngkuain an Kristian unaute hnên aṭangin ei tûr an dawng tih a hmuh hnuah tihian a sawi a ni, “Hripui lêng a tâwp hunah, Jehova Thuhretu kan ni ang, a chhan chu he hun harsa tak kârah hian anni chuan an unaute an ngaihsak a ni,” tiin. A pasal chuan, “Buhfai ip khat vâng maiin Jehova Thuhretu i ni ang maw?” tiin a zâwt a. Ani chuan, “Ni lo ve, he buhfai ip hian hmangaihna dik tak a târ lan vâng zâwkin,” tiin a chhâng a ni.

 He hripui lên chhûnga phal taka in thawhlâwm thawhte avângin Jehova Thuhretute chuan kan unaute mamawh chu rang takin an pe nghâl thei a. Kan website donate.pr418.com-a târ lan thawhlâwm thawh theih dânte hmanga in thawhlâwm thawhte avângin kan lâwm tak zet a ni.