Isua chuan a zirtîrte hnênah: “Kâwlkil thleng pawhin ka thuhretute in ni ang,” tiin a hrilh a. (Tirhkohte 1:8) Tûn laia Jehova Thuhretute chuan chu mawhphurhna chu ṭhahnemngai takin an hlen a ni. Mahse, mihring tamna hmun, hmun zau tak pawh tiamin, khawvêla hmun ṭhenkhatah chuan chipchiar taka thu hrilh a la ni lo. Ram ṭhenkhatah phei chuan Thuhretu an tlêm hle. (Matthaia 9:37, 38) Mi a tam thei ang berte hnên thleng tûrin eng nge kan tih?

 Isua thupêk zâwm tûrin Jehova Thuhretute Governing Body-a Service Committee chuan khawvêl puma mamawhna hmuna rawngbâwl tûrin missionary-te a ruat a. Tûnah hian, khawvêl pumah missionary 3,090 an awm a ni. a A tam zâwkte chuan Lalram Chanchin Ṭha Puangtute School ang chi Bible school aṭangin zirtîrna an dawng a. Missionary-te chuan an in chhuahsan leh ram danga insawn an inhuam a. An puitlinna te, zirtîrna an dawn te, leh an thiltawnte azârah hêng missionary rinawmte hian chanchin ṭha theh darhnaah an ṭanpui a, zirtîr tharte tân entawn tûr ṭha an siam bawk a ni.

 Chênna in inâwm tâwk, hrisêlna lama inenkawlna, leh an intunnunna tûr sum leh pai tlêm azâwng ang chî, missionary-te mamawh ngaihsak tûrin Branch office tinah, Service Department-a Field Ministers Desk chu Branch Committee nên an thawk dûn a. Kum 2020 rawngbâwl kum chhûng khân, Jehova Thuhretute chuan missionary-te enkawl nân dollar maktaduai 27 (U.S.) an hmang a. Hêng ruahmanna avâng hian missionary-te chuan an ngaihtuahna leh tha leh zungte rawngbâwlna ngaihsak lehzual nân an hmang thei a, chu bâkah, an tualchhûng kohhran tihchak nân an hmang bawk a ni.

 Engtin nge missionary-te chuan thu hrilh rawngbâwlnaah hlâwkna an thlen? Malawi Branch Committee-a rawngbâwl Unau Frank Madsen-a chuan heti hian a sawi: “Missionary-te hian an huaisenna leh an thiamna avângin tlawhpawh harsa taka awmte leh ṭawng dang hmangte awmna bial ang chia thu hril tûrin kohhrante chu an ṭanpui a. Chu bâkah, tualchhûng ṭawng leh tih dânte theih tâwp chhuaha an zirna chuan mi dangte phûrna a pêk mai bâkah, hunbi kima rawngbâwlna kawngah ṭhalaite chungah nghawng ṭha tak an nei a ni. Missionary-te avângin Jehova chungah kan lâwm tak zet,” tiin a sawi.

 Ram danga Branch Committee member pakhat chuan: “Jehova mite chu khawvêl puma inpumkhat tak kan nihzia missionary-te hian an lantîr a ni. Thuhretu ni lote pawhin, hnam avângin kan inṭhen hrang lo va, chu aiin, Bible zirtîrnate chuan unau inpumkhat tak ni tûrin min ṭanpui a ni tih chiang takin an hmu thei,” tiin a sawi.

 Engtin nge missionary-te chuan tualchhûnga thuchhuahtute chu an ṭanpui? Timor-Leste rama Unau Paulo-a chu an kohhrana rawngbâwl tûra missionary-te ruat an nih avângin a lâwm hle a. Ani chuan: “Kan awmna hmun hi a lum hle a. Missionary-te chu hmun vawt tak aṭanga lo kalte ni mah se, khaw lum chu thu hrilh loh phah nân an hmang ngai lo. Zîng lama thlawhhma rawngbâwlna atâna inhmuh khâwmnaah an tel ziah a. Chhûn pachang khaw lum vânglai tak leh tlai lam thleng pawha tlawhkîrte an kal chu kan hmu fo va. Keimah ngei pawh tiamin, mi tam tak chu thutak zir tûrin an ṭanpui a ni. Jehova rawngbâwl nân phûr tak leh ṭhahnemngai takin an nun pumhlûm chu an hmang a, chu chuan kohhrana unau zawng zawngte chu tam lehzuala rawngbâwl tûrin a chêttîr a ni,” tiin a sawi.

 Malawi rama regular pioneer Unaunu Ketti-i chuan missionary nupa tuak khatin an chhûngkua an ṭanpui dân chu hetiang hian a sawi: “Missionary nupa tuak khat kan kohhrana rawngbâwl tûra ruat an nih lai chuan kan chhûngkuaah Thuhretu awmchhun ka ni a. Mahse, an hnên aṭangin ṭanpuina ṭha tak ka dawng a, kan chhûngkuaah an rawn tlângnêl ta hle a ni. An entawn tûr ṭha siam chuan ka fate chu Jehova rawngbâwlnain nun hlimawm tak leh lungawithlâk tak a thlen dân hmu tûrin a ṭanpui a ni. Missionary-te ṭhatna avângin, ka fanu pathumte chuan regular pioneer an thawk a, ka pasal pawh inkhâwmahte a tel ṭan tawh bawk,” tiin a sawi.

 Missionary-te enkawlna sênsote chu engtia phuhhrûk nge a nih? Khawvêl pum huap rawngbâwlna atâna thawhlâwm hmangin a ni a, chûng thawhlâwm tam tak chu donate.pr418.com hmanga thawh a ni. Phal taka pêk chûng thawhlâwmte chu kan ngaihlu hle.