Kan regional inkhâwmpuia video-te hian kan thinlung a khawihin, Bible zirtîrnate hre thiam lehzual tûrin min ṭanpui a. Kum 2020 “Lâwm Fo Rawh U”! Regional Inkhâwmpuiah hian Governing Body leh anmahni ṭanpuitute thusawi 43 pawh tiamin video 114 a tel a ni. Hêng video-te tichhuak tûr hian thawhrim leh sênso a ngaih nasat dân tûr chu i ngaihtuah ngai em?

 Khawvêl pum huapa kan unau 900 vêlte chuan video-te siam chhuah nân an hun leh thate bâkah, an thiamnate an thawh a. He kum hnih chuang awh project atân hian a belh khâwmin dârkâr 1,00,000 deuhthaw an hmang a. Chutah chuan minute 76 awh Bible lemchan Nehemia: ‘Jehova Chunga Lâwmna Chu In Chakna A Ni’ tih video zawh fel nâna hman dârkâr 70,000 a tel a ni.

 I ngaihruat ang ngeiin, hêng tlâwmngaia inpete an nî tin mamawh phuhrûk nân te, technical lama an mamawh ṭanpuina te, khâwl thil te, leh hna zawh fel nâna mamawh a hmunte atân hian sênso a hautak hle a ni.

 “Governing Body-a Teaching Committee chuan kan video-a hnam dân hrang hrang leh hmun hrang hrangte telh chu a duh a. A chhan chu khawvêl pum huap unaute kan nih anga video-a chumi lan chhuahtîr chu kan duh a ni,” tiin Audio/Video Services-a thawk Jared Gossman-a’n a sawi. “Chumi atân chuan ram 11-a team 24-te chuan an thawkho va. Chutianga khawvêl pum huapa thawhhona neih nân sum tam tak, ruahmanna tam tak, leh inrâwn khâwmna tam tak a awm a ngai a ni,” tiin a sawi belh a ni.

 Kan video tam takte siam chhuak tûrin hmanraw ṭha bîk leh setting hrang hrang kan mamawh a. Entîr nân, Nehemia: ‘Jehova Chunga Lâwmna Chu In Chakna A Ni’ tih lemchan hi Patterson, New York, U.S.A. bula awm Mt. Ebo building chhûnga lâk a ni a. Lemchan chu hmân lai hun ang taka a lan theih nân leh thawhlâwmte ṭha taka hman a nih theih nân unaute chuan lemchan bungrua zâng takte hmangin hmân lai Jerusalem kulh bang angte chu an siam a. A relte chu meter ruka sâng (20 ft) thinga siam an ni hlawm a, chu chu thil zâng tak, foam-a an tuam vek hnuah lung ang thei tûrin rawng an hnawih leh a ni. Hêng “lung bangte” hi tam tak siam a ngaih lohna tûrin, a ṭûl anga hmun danga hman leh theih tûra siam a ni. Chuti chung pawhin, he lemchan lâk nâna mamawh hmanruate siam nân ringawt pawh $1,00,000 (U.S.) dâwn lai hman a ni. a

 Hêng thilte chipchiar taka hriatna hian kumin regional inkhâwmpui kan ngaihhlutna a tipung a. He program tichhuak tûra theih tâwp chhuahna chuan khawvêl pumah Jehova chawimawina a thlen ang tih kan chiang a ni. Khawvêl pum huapa kan rawngbâwlna ṭanpui tûra donate.pr418.com aṭangin leh kawng danga phal taka thawhlâwm in thawhte avângin kan lâwm tak zet a ni.