Bible chuan kan hun lai hian indonate leh lîrnghîngte a thleng dâwn tih leh, hrite a lêngin, ‘thil hlauhawm’ dangte a lo awm dâwn tih a sawi lâwk a. (Luka 21:10, 11) Chûng hrilh lâwkna thute chu kum 2022 rawngbâwl kumah pawh khân a la thleng famkim zêl a ni. a Entîr nân, Ukraine ram beihna chu chhunzawm zêl a la niin, chu chuan mi maktaduai têlte nun chu a nghawng mêk a. Ram tam takah chuan COVID-19 hripui a la lêng reng bawk. Chu mai bâkah, Haiti rama lîrnghîngte leh Central America te, Philippines te, leh Africa chhim chhak lama thlipui na tak tleh ang chi leilung chhiatnate chuan mi tam takte nun chu nasa takin a nghawng a ni. Engtin nge Jehova Thuhretute’n chhiat tâwkte chu an ṭanpui?

 Kum 2022 rawngbâwl kumah khân, kan inawpna pâwl chuan chhiat tawhna hrang hrang 200 vêlah a tuartute tân chhawmdâwlna a pe a! Belh khâwmin, chhawmdâwlna atân dollar maktaduai 12 deuhthaw sên a ni. b Chhiat tawhna thleng pahniha a tuartute ṭanpui nâna thawhlâwmte hman a nih dân hi han ngaihtuah teh.

 Kum 2021, August 14 khân magnitude 7.2-a nain Haiti chhim lamah lîr a nghing a. Lungchhiatthlâk takin, thuhretu mi pathumin—unaunu pahnih leh unaupa pakhatin—an nunna an chân a ni. Dam khaw chhuakte pawhin an thil neihte chânin, rilru lamah hliam na tak an tuar bawk. Unau Stephane-a chuan: “Khawpui chhûngah nunna chân an tam êm avângin, thla hnih chuang vêl chu chawlhkâr tin mitthi vuina hun serh eng emaw zât a awm reng a ni,” tiin a sawi a. Unaupa dang Éliézer-a pawhin: “Thuhretu tam tak chuan awmna tûr in te, thawmhnaw hâk tûr te, pheikhawk bun tûr te, leh nî tin mamawh bulpuite chu an nei lo va. Thla eng emaw zât chhûng chu lîrnghîng tênau zâwk a thlen deuh reng avângin, mi tam tak chu râl ṭi takin an awm a ni,” tiin a sawi.

 Kan inawpna pâwl chuan unaute chu a ṭanpui nghâl vat a. Haiti branch chuan ei leh in ton 53 bâkah, puan in te, tuipuan te, âwngphah te, leh phone charge-na tûr solar charger-te a sem chhuak a ni. Chu bâkah, kum 2022 rawngbâwl kum chhûng khân, in 100 chuang chu sak ṭhat leh thawm ṭhat a ni a. Chhawmdâwlna atân dollar maktaduai khat aia tam sên a ni bawk.

 Kan unaute chu an lâwm hle a. Unaunu Lorette-i chuan: “Lîrnghîng chuan kan in leh eizawnna a tichhe vek a. Ei tûr pawh kan nei tawh lo. Mahse, Jehova inawpna pâwl chuan kan mamawh zawng zawng min pein min ṭanpui a ni,” tiin a sawi. Micheline-i pawhin: “Lîrnghîng chuan ka fapa pahnihte nêna kan chênna bûk tê chu a tichhia a. Ṭanpui dîla ṭawngṭai ngawt loh chu tih tûr eng mah ka hre lo va, Pathian Jehova’n a inawpna pâwl hmangin ka ṭawngṭainate chu min chhânsak a ni. Tûnah chuan, chênna tûr in ṭha tak kan nei tawh a. Jehova chunga ka lâwmzia lantîr tûra ka tih theih apiang tih ka tum tlat a ni,” tiin a sawi.

 Tualchhûng thuneitute pawhin kan chhawmdâwlna thiltih chu an hria a. L’Asile khua sawrkâr office-a an hotu chuan: “Mi dangte ṭanpui tûra rang taka in rawn thawh chhuah avâng hian in chungah ka lâwm hle a. Thuneitute chunga zahna thûk tak in lantîr avâng pawh hian ka fak khawp mai che u. In thiltihte hi sum duh vâng ni lovin, mi dangte ṭanpui in duh vâng a ni tih ka hmuh hian ṭha ka ti hle a. Hmangaihna avânga ti in ni tak zet a ni,” tiin a sawi.

 Kum 2022, January 24 khân Ana Thlipui chuan Mozambique ram a nuai hnuah Malawi thlang lam a nuai leh a. Chu thlipui chuan ruah nasa tak keng telin, dârkâr khata kilometer 100-a (62 mph) chakin a tleh a. Kâwlphetha pêk chhuahna hmunpuite leh leite chu tichhiain, tui lian nasa tak a thlen bawk a ni.

 Thlipui chuan Malawi leh Mozambique rama Thuhretu mi 30,000 aia tamte chu a nghawng a. Chhawmdâwlna hna thawktu zînga unau Charles-a chuan: “Unaute tawrhna leh an chân nasatzia ka hmuh chuan hrehawm ka ti hle a, ṭanpui dân tûr ber pawh ka hre lo,” tiin a sawi. Dinhmun tiharsa zual tûrin, an ei tûr dah khâwl sate leh an thlai chînte chu tui lianin a la vek a. Mi tam tak chuan an inte an chân hial a ni. Lungchhiatthlâk takin, unaupa pakhat chuan an chuanna chhanchhuahna lawng a leh thut avângin a nupui leh a fanu pahnihte a chân bawk.

 Thlipui chu a na hle a. Zîng lam 1:00 vêlah chuan Malawi thlang lama awm Nchalo khuaa unau Sengeredo-a te chhûngkua chuan tui luang ri hum hum thâwm an hria a. Lui pahnih chu a lo lian reng mai a! Unau Sengeredo-a te chhûngkua chu an in aṭangin an tlân chhuak a. A hnu lawka tui lianin an in a tihchim avângin, an tlân chhuak hman chu an vânnei hle a ni. Tui lian chuan an thil neih ṭhenkhat tichhiain, a ṭhen a la a. An in aṭanga kêa kala minute 30 vêla hlaa awm Kingdom Hall lam chu an pan a. Hemi ṭum hi chuan, Kingdom Hall thleng tûrin dârkâr hnih lai hun an hmang a. A tâwpah, huh vek leh chau tak chungin him takin an thleng thei ta hrâm a ni.

 Malawi leh Mozambique branch-te chuan chhawmdâwl hna an thawk nghâl vat a. Bial kantute leh kohhran upate hnênah chhiat tâwk unaute mamawh hriat tum tûr leh thlarau lam leh rilru lama ṭanpui tûrin kaihhruaina an pe a ni. Chhiat Tâwkte Chhawmdâwlna Ngaihtuahtu Pâwl (Disaster Relief Committees) eng emaw zât chu chhawmdâwl hna enkawl tûra tih an ni a, chûng pâwlte chuan unaute hnênah ei tûr leh an mamawh zualpui dangte pein an ṭanpui nghâl vat a ni. Mite ṭanpui nân $33,000 sên a nih bâkah, in thawm ṭhat leh sak ṭhat nân $3,00,000 chuang sên a ni bawk.

 Chhiat Tâwkte Chhawmdâwlna Ngaihtuahtu Pâwl-te chuan thawhlâwmte chu ṭha takin an hmang a, thil man a sân êm avângin chu chu thil pawimawh tak a ni. Entîr nân, chhawmdâwl hna ṭan a nih aṭanga thla sarih chhûngin chhang phut—Malawi mite chaw ei ber—man chu zaa 70-in a sâng chho va. Tuialhthei man pawh a sâng hle bawk. Chhawmdâwlna sumte ren chem zâwka hman a nih theih nân, unaute chuan ei tûr leh in sakna bungruate chu tualchhûngah a hlâwmin an lei a. Man tlâwm zâwka an lei theih bâkah, a phurh man pawh a tlâwm zâwk bawk a ni.

 Chhawmdâwl hna chuan Jehova mite thinlung a khawih hle a. Mozambique rama chêng unau Felisberto-a chuan: “Inawpna pâwl chuan in sakna bungruate min pein min phurhsak a, in sakna hna thawktu tûr leh ei tûrte min pêk bâkah, kaihhruaina duhawm takte min pe a, hetiang khawpa ṭanpuina pe chhuak nasa inawpna pâwl hi ka la hre ngai lo. He chhawmdâwl hna hi Johana 13:34, 35-a Isua sawi hmangaihna lantîrna ropui tak a ni,” tiin a sawi. Malawi rama thlipuiin a in a nuai chhiatsak hmeithai Unaunu Ester-i pawhin: “In thar sak lehna tûr sum ka neih loh avângin ka rilru a hah hle a. Mahse, unaute’n in thar min saksak a, chu chuan Paradis-a awm tawh ang maia inhriatna min neihtîr a ni,” tiin a sawi.

 Pathian tiam khawvêl thar kan hnaih zêl rualin, chhiatna tam lehzual a lo la thleng ang tih pawh kan hria a. (Matthaia 24:7, 8) Amaherawhchu, phal taka thawhlâwm in thawhte avângin kan lâwm tak zet a, Jehova mite’n an mamawh ang chhawmdâwlna an dawng ngei ang tih ka ring tlat bawk. Thawhlâwm thawh theih dânte chu donate.pr418.com-ah târ lan a ni. In thilphalna avângin kan lâwm e.